Read Tshiluba Sira 9 Bible Online

Sira 9 - Tshiluba bible

Sira 9

¹Paudi munange mukajebe kumufuidi mukawu to, bualu udi mua kumufikisha ku lungenyi lua kukuenzela bibi.

²Kuena mua kudifila kudi mukaji mukuabu nansha umue to, bualu udi mua kuvua kukudiata mu dikasa.

³Kuena mua kulaya mukaji muena tshiendenda tshintu, bualu udi mua kuvua kupona mu buteyi buende.

⁴Kuena mua kusesela mukaji udi wimba lunkomba, bualu udi mua kuvua kupona mu milowu yende.

⁵Kuena mua kulengamena nsongakaji, bualu udi mua kutuula makuta bikole.

⁶Kuena mua kudifila kudi bakaji bena buendenda, bualu udi mua kubabutuila biudi nabi.

⁷Lekela kukenzakana eku ne eku paudi mu misesu, kuikadi wenda nansha wimana miaba idi kayiyi bantu.

⁸Lekela kutangila mukaji muimpe, kabidi kulengamenyi mukaji mulengela udi kayi webe. Bantu ba bungi mbajimine bua bulenga bua mukaji, bualu bua mukaji mulenga, dinanga didi ditema bu kapia.

⁹Kuena mua kusomba pamue ne mukaji wa bende, nansha kunua nende mala. Bualu majinga ebe a tshianana adi mua kukujimija.

¹⁰Kulekedi mulunda webe wa kale, bualu mulunda mupiamupia kena ne mushinga wa momumue ne wende. Mulunda mupiamupia udi bu nwinyo mupiamupia, badi mua kumuangata ne mushinga amu padiye ukulakaja.

¹¹Kualakanyi dikasa dimpe dia muena buenzayi, bualu kuena mumanye dikenga didi dimuindila.

¹²Kuena mua kusanka bua dikasa dimpe dia babi, umanye ne: kabena bafua Mvidi Mukulu kayi mubanyoke.

¹³Umbuka kudi muntu udi ne bukole buakushipangana: nenku lufu kuluena mua kukukuatshisha bowa. Kadi paudi uya kudiye, kuenji bualu bubi to, bualu udi mua kukushipa. Manya ne: udi wenda munkatshi mua mateyi, kabidi udi muaba wa kulongela ndudi, anu bu mudi muntu udi wenda pa mutu pa bimana bia tshimenga.

¹⁴Keba muebe muonsu mua kumanyangana ne bantu. Kadi ukebe ngenyi amu kudi badi ne meji.

¹⁵Yukila ne bantu ba lungenyi. Mayuki ebe ikale pa mikenji ya Muena Kulu.

¹⁶Udie ku mesa ne bantu, badi banemeka mikenji ya Maweja-Nangila. Disanka diebe dikale amu bua paudi utshina Mvidi Mukulu.

¹⁷Bantu badi batumbisha bena midimu ya bianza bua midimu idibu benza, kadi badi batumbisha mulombodi wa ditunga bua meji adiye wakula nawu.

¹⁸Muena mutoyi badi bamutshina mu tshimenga. Udi wakula kayi wela meji, badi bamudiwula kudi bantu.