Read Tshiluba Yeshaya 10 Bible Online

Yeshaya 10 - Tshiluba bible

Yeshaya 10

¹Nudi bena diakabi, bualu nudi nuela mikenji idi kayiyi miakane, ne meyi adi akengesha bantu banyi.

²Nudi nubenga kuteleja bantu banyi, badi kabayi ne bukole. Nudi nubenga kupesha bapele, bidibu ne bua kupeta. Nudi nunyenga bakaji bakamba bidibu nabi, nuiba bana ba nshiye bintu biabu.

³Kadi dituku didi Maweja-Nangila ukosa nsambu, tshipepele tshikole tshifuma kule netshinupete. Diba adi, nenuenze tshinyi? Nenuye kudi nganyi? Nenupete diambuluisha muaba kaayi? Nenuye kuteka mpetu yenu penyi?

⁴Diba adi, nudi mua kusungula amu malu abidi: kubuelakana ne bena lukanu, nansha kufua. Kadi tshiji tshia Maweja-Nangila katshiena tshijika, tshianza tshiende tshitshidi tshiela mulu.[70]

⁵Maweja-Nangila udi wamba ne: Bena Ashure[71] mbena diakabi. Mvua mubangate bua kunyoka nabu bantu banyi. Bobu ke badi bambula mutshi, undi ntalaja nawu tshiji tshianyi.

⁶Meme kubatuma bua kuluisha tshisamba tshidi tshimbenga. Meme kubambila bua kubunda tshisamba tshidi tshimfikisha munda. Meme kuanyisha bua biibe, bapawule bantu aba, babadiatakaje bu bitotshi bia mu njila.

⁷Kadi mukalenga wa bena Ashure kena wanyisha bionsu abi nanku. Udi wela manga meji munda muende. Udi musue kunyanga ne kubutula matunga onsu adiye mua kuluisha.

⁸Bualu udi wamba ne: “Balombodi ba bena mvita banyi, badi ne bukole bu bua bakalenga ba matunga!

⁹Meme kukuata tshimenga tshia Kalne, kukuata ne tshia Karkemishe. Meme kukuata tshimenga tshia Amate, kukuata tshia Arpade, kukuata Samariya, kukuata Damase.[72]

¹⁰Meme kutekesha makalenga avua ne mvidie mipite ya mu Yerushalayime, nansha ya mu Samariya, ku bukole.

¹¹Mumvua munyoke tshimenga tshia Samariya ne mvidie yatshi, ke mundi ne bukole bua kunyoka tshimenga tshia Yerushalayime ne mvidie yatshi.”

¹²Pikala Maweja-Nangila mumane kujikija mudimu wende pa mukuna wa Siyone ne mu Yerushalayime, neanyoke kabidi mukalenga wa bena Ashure, bualu udi uditambisha, upepeja bantu bakuabu.[73]

¹³Udi wamba ne: “Ndi muenze bionsu amu ku bukole buanyi. Meme ndi mumanye malu, ndi muena budimu bupite. Ndi mushipe mikalu idi munkatshi mua matunga. Meme kupawula bintu bivuabu balamina mu mayeba. Meme kuipata ne bakalenga mu nkuasa yabu ya bumfumu.[74]

¹⁴Mvua mupete biuma bia bantu, bu mudi muntu ukuata disua dia nyunyi. Meme kusangisha bintu bionsu bidi pa buloba, bu mudi muntu usangisha makele malekela kudi nyunyi. Kakuvua muntu uvua mubuuke, nansha mukangule muinu, nansha mudile muadi.”

¹⁵— Tshisuyi tshidi mua kudimona tshipite mfumuatshi anyi? Nseele wa kupanda nende mabaya udi mua kudiangata ne mushinga mupite wa muenaye anyi? Dikombu kadiena dijuula muntu, kadi muntu ngudi udijuula! Tshibonge katshiena tshinyungisha muntu, muntu ngudi utshinyungisha.[75]

¹⁶Nenku mfumu wa bamfumu, Maweja-Nangila muena bukole buonsu, neajimije bubanji budi bena Ashure nabu.[76] Neoshe lumu luabu, ne bionsu bidibu nabi.

¹⁷Maweja-Nangila, butoke bua bena Izrayele, neikale bu kapia, kadi kosha meba ne mingonga, kabibutula dituku dimue.

¹⁸Neavingutule ditu dijima, ne mitshi ya bimuma yonsu. Ne bikale bu muntu munyane ne disama.

¹⁹Mu ditu dia bena Ashure, nemushale mitshi bungi bukese, budi muana mutekete mua kubadika.

²⁰Dituku adi, bena Izrayele badi bashale ne muoyi, bena diku dia Yakobe badi kabayi bafue mu mvita, nebumuke kudi muntu uvua mubakume. Kadi nebanyemene kudi Maweja-Nangila, Mvidi Mukulu wa tshijila wa bena Izrayele. Nebamulamate kashidi.

²¹Kasumbu kadi kashala nekapingane. Bushuwa, bena Izrayele badi bashala nebapingane kudi Mvidi Mukulu wa bukole.[77]

²²Wewe Izrayele, nansha muvua bantu bebe bungi bu lusenga lua ku muelelu wa mayi manene, kadi amu bakese nebapingane kudi Maweja-Nangila. Wewe neubutuke, bualu nebakunyoke muvuabu bakose tshilumbu.

²³Bushuwa, Maweja-Nangila Mvidi Mukulu muena bukole buonsu, neakumbaje musuaye muambe. Neakubutule, bantu ba pa buloba bujima batangile.[78]

²⁴Nanku umvuayi tshidi Maweja-Nangila Mvidi Mukulu wa bukole buonsu wamba: “Bantu banyi, nuenu badi basomba mu Siyone, lekelayi kutshina bena Ashure, badi banutuuta ne mitshi, banuambuila tshibonge, muvua bena Ejipitu banuenzela bangabanga.[79]

²⁵Bualu panenga tshitupa, tshiji tshimvua natshi bualu buenu netshituye. Nenkudimukile bena Ashure bua meme kubanyoka.[80]”

²⁶Maweja-Nangila muena bukole buonsu neakengeshe bena Ashure, bu muvuaye muenzele bena Madiyane pa lubuebue lua Orebe. Neolole dikombu diende pa mayi manene, bu muvuaye munyoke bena Ejipitu.[81]

²⁷Dituku adi, neakumushile bujitu budi bukunemenena pa makaya. Neakupepejile mutshi uuvua wambula nawu bintu bia bujitu pa dikaya diebe.[82] Bena mvita ba bena Ashure badi baya mu Samariya,[83]

²⁸bafika pabuipi ne tshimenga tshia Ayate, bapitshila mu Migrone, bashiya mabuki abu mu Mikmase.[84]

²⁹Kupitshilabu mu lupongu.[85] Kuambilanganabu ne: “Tuasayi mitanda mu Ngeba. Badi mu Rama badi ne bowa. Badi mu Ngibeya, tshimenga tshia Shawule, badi banyema.

³⁰Elayi mbila, nuenu bena mu Ngalime, nuenu bena mu musoku wa Layisha, telejayi, nuenu bena mu Anatote, andamunayi.[86]”

³¹Bena mu Mademena badi banyema. Badi basomba mu Ngebime mbaye kusokoma.

³²Dituku dimue adi bena Ashure badi bakuata tshimenga tshia Nobe. Badi bakanyina bena mu Siyone, mukuna wa Yerushalayime.

³³Mfumu wa bamfumu, Maweja-Nangila muena bukole buonsu, udi ubabunda bu mudibu bakosa matamba a mutshi ne muele mutue.[87] Nebakose mitshi milemile; idi mitumbuke nebayupule, bayele panshi.

³⁴Badi basola muitu mitshi yonsu ne tshisuyi, mitshi ya sedre mile ya mu Lebanone idi panshi.[88]