Read Tshiluba Yeshaya 11 Bible Online

Yeshaya 11 - Tshiluba bible

Yeshaya 11

¹Lutonga ludi lupatuka ku tshikuku tshia Ishayi.[89] Ditamba dipiadipia didi dimena ku miji yende.

²Mueyelu wa Maweja-Nangila udi nende kashidi. Mueyelu udi umupa meji, umuambuluisha bua asunguluje malu. Neamanye tshia kuenza, neapete bukitu bua kutshikumbaja. Mueyelu neumuludike bua amanye Maweja-Nangila, neumulongeshe bua kumunemeka.

³Disanka diende didi dia kunemeka Maweja-Nangila.[90] Kena ukosa nsambu anu ku bidi bimueneka kudi bantu to. Kena ukosa tshilumbu ku biambamba bia bantu.

⁴Nealumbuluile bantu badibu bapetula. Neakose tshilumbu tshia bapele ba mu ditunga amu pa tshiotshi. Meji ende adi bu mutshi wa kutekesha nawu bantu ba mu ditunga. Udi ukosa nsambu, ushipesha muena tshibawu.[91]

⁵Bu mudi muntu ne mukaba musuike mu tshimonu diba dionsu, udi ne muoyi umue, wenza amu bidi bimpe[92] kayi ulekela.

⁶Nenku tshisumpa-ntambue netshisombe kaba kamue ne kana ka mukoku, nkashama wa tshimungu nealale pamue ne kana ka mbuji. Muana wa ngombe ne muana wa ntambue nebidiile kaba kamue.[93] Nebende babisaka kudi muana mutekete.

⁷Ngombe neadie bulunda ne nyama wa lonji.[94] Bana bayi nebalale kaba kamue. Ntambue neadie mashinda mudi ngombe udia.

⁸Muana wa pambidi neanayile ku buina bua nyoka. Nsongalume neele tshianza tshiende ku buina bua nyoka wa ntoka.

⁹Kabakuenzelangana kabidi bibi, nansha kunyangilangana bintu pa mukuna mujima wa tshijila wa Maweja-Nangila. Ditunga dijima nediuwule ne dimanya dia Maweja-Nangila, amu bu mudi mayi uwuja mayi manene.[95]

¹⁰Muana wa ku ndelanganyi ya Ishayi neikale mulombodi wa bukua bisamba. Bukua bisamba nebuye kumulomba meji.[96] Muaba wikalaye musombe, neukenke ne butumbi bua Mvidi Mukulu.

¹¹Dituku adi Maweja-Nangila neenze tshiakabidi muende muonsu,[97] bua kupikula bantu bende. Neapingaje kuabu bavua bashale ne muoyi mu ditunga dia Ashure ne dia Ejipitu, mu ditunga dia Patrose ne dia Kushe, mu Elame ne mu Babilone, mu Amate wa bena Arame, ne mu matunga a ku muelelu wa mayi manene.

¹²Nease dibendele, bua kuvuluija bukua matunga, mudiye musue kusangisha bena Izrayele, bavuabu baye nabu mu bupika, pamue ne bena Yuda bavua bamuangalake ku ntengu ne ntengu ya buloba.

¹³Nenku bena Efrayime nebalekele mukawu, udibu batekela bena Yuda. Bena Yuda kabakuluisha kabidi bena Efrayime nansha.[98]

¹⁴Nebaye bonsu pamue batangile luseke ludi diba dibuelela, ku mikuna ya bena Peleshete. Bonsu babidi nebaye batangile luseke ludi diba dipatukila, bua kupawula bisamba bidi mu tshipela. Nebakuate ditunga dia bena Edome ne dia bena Mowabe. Bena Amone nebikale ku bumfumu buabu.[99]

¹⁵Maweja-Nangila neakamishe musapa wa mayi manene a Ejipitu. Yeye neakanyine ne tshianza tshiende musulu wa Perate. Ku bukole bua Mueyelu wende, neaukosolole tusulu muanda mutekete, tudibu mua kusabuka ku makasa.[100]

¹⁶Bu muvua bena Izrayele bavua bapatuka mu Ejipitu, benda mu njila munene, ke mudi bantu bavua bashale ne muoyi, mu ditunga dia bena Ashure, mua kuenda kabidi mu njila munene.