Read Tshiluba Yeshaya 13 Bible Online

Yeshaya 13 - Tshiluba bible

Yeshaya 13

¹Maweja-Nangila kutumina Yeshaya, muana wa Amose, mukenji bua amanyishe “Babilone[102]” ne:

²Maweja-Nangila udi wamba ne: “Asayi dibendele pa mukuna, padi kapayi mitshi. Elayi kabobu ka mvita. Bikilayi bena mvita ne tshianza, bua babuelele ku biibi bia bantu badi badifila ku budisuile buabu.[103]

³Meme ndi ntumina, bantu badi banyi meme, meyi anyi. Ndi mubikidishe bilobu bianyi, bamiadiamvita badi bela mbila ya disanka, bua bakumbaje tshidi tshiji tshianyi tshijadika.”

⁴Umvuayi tshiona tshidi tshifumina ku mikuna, tshifuanangane ne mutoyi wa tshisumbu tshinene tshia bantu. Bavua badisangishe mbafume ku makalenga mavule. Bena matunga ne matunga badi muaba umue. Bualu Maweja-Nangila muena bukole buonsu, ke udi ukenketa bantu bende bua baye ku mvita.

⁵Badi batumina ku matunga a kulekule, muaba udi diulu ne buloba bituangene, bua kuya kunyanga ditunga dijima: ke Maweja-Nangila ne badiye muangate, bua kunyoka bantu ba buloba bujima.

⁶Dilayi muadi, bualu dituku dia Maweja-Nangila dikadi pabuipi, didi Mvidi Mukulu muena bukole buonsu musue kubutula bantu ne bintu.[104]

⁷Ke padi bonsu bateketa mu maboku, kabayi dikanda.

⁸Monayi bakadi bapanga tshia kuenza. Bowa ne dikenga mbibakuate. Badi badinyenga bu bakaji pa lulelu. Bakadi batangilangana, buminyine ne bowa, mpala yabu mikunze ne bundu.

⁹Monayi dituku dia Maweja-Nangila dikadi pabuipi, dituku kadiyi tuseku, dia tshiji, dia tshinyangu ne tshikisu. Maweja-Nangila neandamune ditunga dijima, dishale amu tshipela. Bena buenzavi nebabutuke bonsu.

¹⁰Mitotu ya mulu, ne bidimina nzaji kabiakukenka kabidi to. Diba nedibuitshidile, amu patshididi dipatuka. Ngondu kakutokesha kabidi ne nkenke yende to.[105]

¹¹Maweja-Nangila udi wamba ne: “Ndi musue kumana bubi bua bantu, kujikija ditambisha dia bena lutambishi, kunyoka bena tshibawu, kukepesha didisua dia bena tshikisu.

¹²Nenkepeshe bantu, bashale bakese, bu tshiamu tshia mpawungi muimpe, bu mpawungi wa mu Ofire.[106]”

¹³Diulu nedizakale,[107] buloba nebunyungakane, dituku didi Maweja-Nangila muena bukole buonsu, uleja tshiji tshiende.

¹⁴Dituku adi, bantu nebamone, mudi muntu yonsu unyema ku tshisamba tshiabu, upingana kuabu lubilu, bu ngulungu mikuatshika bowa, bu mikoku idi kayiyi ne muyilami.

¹⁵Nenku wa kumpala wapetabu mu njila awu, nebamuase mikete ya bungi. Muntu yonsu wakuatabu, neafue ku muele.

¹⁶Nebazaze bana babu, bobu batangile. Nebapawule bintu biabu, nebabuelele bakaji babu mu nzubu ku bukole.

¹⁷Maweja-Nangila udi wamba ne: “Nensonsole bena lukuna babu, bena Madayi, bantu ba muoyi mupape, badibu kabayi mua kubuejila, badi kabayi bangata mabuejila, nansha a biamu bitoke bia mushinga mukole, nansha a mpawungi.

¹⁸Nebase bansongalume mikete. Kabena bafuila bana ba ku dibele, nansha bana batekete bakuabu, luse to.”

¹⁹Bukalenga bua mu Babilone, budi bupite makuabu onsu ku buimpe. Bena Babilone badi babusankidila bikole. Kadi Mvidi Mukulu neabubutule, muvuaye mubutule kale Sodome ne Ngomore.[108]

²⁰Ditunga dia Babilone nedishale munda mutupu kashidi kashidi. Nansha bena ngendu, kabena basamu mitanda yabu to. Nansha badishi ba bimuna, kabena bimanamu to.

²¹Kadi nyama ya mikenga neisombemu. Bipungulu nebibuele mu nzubu yabu. Nyunyi ya tufyondu neisombemu. Mbuji ya mpumbu neitupikemu.[109]

²²Nyama ya bimungu neilale[110] mu nzubu minene ya mu tshimenga. Nyama ya mibuabua neidile mu nzubu ya bakalenga. Tshikondu tshia kubutula Babilone tshikadi pabuipi. Bakadi bamane kubala matuku ende.