Read Tshiluba Yeshaya 15 Bible Online

Yeshaya 15 - Tshiluba bible

Yeshaya 15

¹Badi bamanyisha malu adi atangila bena “Mowabe.” Butuku bumue badi babutula tshimenga tshia Are tshidi mu ditunga dia Mowabe. Bantu badi bapuwa, bibatonda. Butuku bumue badi babutula tshimenga tshia Kire, tshidi mu ditunga dia Mowabe, bantu bapuwa bibatonda.[122]

²Bena mu Dibone badi baya muaba wabu wa tshijila bua kudila. Bena Mowabe kuela miyenga, pa mukuna wa Nebo ne mu tshimenga tshia Medeba. Badi bakungula mu mitu, babeya miedi.[123]

³Mu misesu ya mu bimenga, bantu badi bavuala bilamba bia madilu. Bonsu badi bela miyenga, badila pa mitu ya nzubu, ne mu bisalu.[124]

⁴Bena mu Eshebone, ne bena Elale, badi bela mbila, balomba diambuluisha. Mbila yabu idi miumvuike too ne mu Yakase. Ke padi bena mvita ba bena Mowabe, bakuatshika bowa, kabayi ne tshia kuenza.[125]

⁵Ndi ndila, nkeba badi mua kuambuluisha bena Mowabe. Bena Mowabe badibu bipata, badi banyema too ne ku Soware, ne ku Eglate-Shelishiya. Badi benda babanda ku Lukite. Bakuabu badi banyema ku njila wa ku Oronayime, bela mbila ya dikenga.[126]

⁶Mayi a ku Nimrime mmanyanguke, mitshi yonsu idi miume; mashinda mmafube. Kakuena kabidi tshisosa tshibishi.[127]

⁷Bintu bikese bivua bantu bashale nabi, badi baye nabi kule, dia muamua dia musulu wa Mitshi ya pepliye.

⁸Badi bumvua mbila ya miyenga, nseke yonsu mu ditunga dia Mowabe. Miadi idi yumvuika, too ne ku Eglayime, ne ku biina bia Elime.[128]

⁹Mayi adi apitshila mu Dimone,[129] neakunze ne mashi. Maweja-Nangila udi wamba ne: “Nensakidile makenga, ku adibu nawu mu Dimone. Ndi ntuma nyama wa ntambue, bua akuate mu Mowabe bantu badi bashala ne muoyi, bena ditunga badi kabayi bafue mu mvita.”