Read Tshiluba Yeshaya 19 Bible Online

Yeshaya 19 - Tshiluba bible

Yeshaya 19

¹Badi bamanyisha malu adi atangila “Ejipitu”. Maweja-Nangila ukadi ufika mu Ejipitu, muimane pa divuba didi diya lukasa. Mvidie ya tshianana ya mu Ejipitu, neizakale kumpala kuende. Bena Ejipitu nebatekete mu maboku.[147]

²Maweja-Nangila udi wamba ne: “Nensonsole bena Ejipitu, bua baluishangane bobu nkayabu. Muntu nealuangane ne muanabu, tshimenga netshiluishe tshikuabu, bukalenga nebuluishe bukuabu.[148]

³Bena Ejipitu nebapange tshia kuenza. Nennyangakaje bidibu balongolole. Nenku nebakonke mvidie yabu ya dishima, nebaye kudi babukishi ba mbuku, ne kudi bena lubuku lua muzangu.”

⁴Maweja-Nangila muena bukole buonsu, Mfumu wa bamfumu udi wamba ne: “Nemfile bena Ejipitu, ku bumfumu bua mfumu wa malu makole. Nebabamune kudi mukalenga wa tshinyangu.”

⁵Mayi a mu musulu wa Nile adi enda akama, musulu neume menemene.

⁶Mayi a mu misapa ya misulu adi enda anyanguka, anunka bibi. Mu misapa ya mu misulu ya mu Ejipitu, mayi neakepe, too ne muafikawu ku diuma. Mionji ya ntupu ne ya mukele neifubidile,

⁷amu bu mudi bisosa bia ku muelelu wa mayi, muaba udi musulu wa Nile uya kudiela mu mayi manene. Madimi onsu, avua musulu wa Nile mufukishe, akadi munda mutupu, lupepele lumana kuambula bivuamu. Kamuena mushala kabidi tshintu to.

⁸Balobi nebadile muadi, batua mikemu. Balobi ba ne ndobu, ne beedi ba makondu, badi ne tshinyongopelu tshinene.

⁹Bantu badi baluka bilamba bia ndanda, badi ne tshinyongopelu tshia mumue. Bakaji badi basulakaja manda, ne balume badi baaluka, badi bonsu ne bowa bunene.[149]

¹⁰Bakumi ba bilamba bonsu nebatekete mu maboku.[150] Bantu badi benza mudimu wa difutu, kabena bamona tshia kuenza.

¹¹Balombodi ba mu tshimenga tshia Sowane,[151] mbantu bapale. Bafidi ba ngenyi ba mukalenga wa bena Ejipitu, mbafile meji a tshianana. Kadi mmunyi mudi yonsu wa kunudi mua kuambila mukalenga wa Ejipitu ne: “Meme ndi muana wa muena meji, meme ndi lulelu lua mukalenga wa kale?”

¹²Mukalenga wa bena Ejipitu, bena meji bebe bepi? Bakulongeshe, bakumanyishe tshidi Maweja-Nangila muena bukole buonsu mujadike bua kuenzela ditunga dia Ejipitu!

¹³Balombodi ba tshimenga tshia Sowane, bakuandamuka bidingidingi. Balombodi ba mu tshimenga tshia Memfise,[152] mbantu batshimbakane. Amu bobu balombodi ba buloba, ke badi bapambula bena Ejipitu.

¹⁴Maweja-Nangila mmubatshiompakaje. Ke mudibu bapambula bena ditunga, mu midimu yonsu idi bena Ejipitu benza. Mbafuanangane ne muntu mukuatshike maluvu, utetukila mu bilushi biende.

¹⁵Mu Ejipitu kamuena muntu udi mua kukumbaja bualu buimpe. Nansha bena biuma, nansha bapele, nansha baneme, nansha bakalenga, bonsu mbapange mua kuenza bualu bua nsongu.

¹⁶Dituku dikuabu, bena Ejipitu nebazakale bu tukajikaji. Nebikale ne bowa, padibu bamona Maweja-Nangila wa bukole buonsu, olola tshianza bua kubanyoka.

¹⁷Nebavuluke ne luzakalu buloba bua bena Yuda. Misangu yonsu idibu batela bena Yuda, bena Ejipitu nebakuatshike bowa, padibu bela meji ku malu adi Maweja-Nangila Mvidi Mukulu muena bukole buonsu mua kubanyokela.

¹⁸Dituku dikuabu, mu Ejipitu mu bimenga bitanu, bantu nebakule muakulu wa bena Ebrewu. Nebatshipe mitshipu, batela dina dia Maweja-Nangila muena bukole buonsu. Tshikuabu tshia ku bimenga ebi, nebatshibikile ne nTshimenga tshia Diba.[153]

¹⁹Dituku adi, munkatshi mua ditunga dia Ejipitu, nemuikale tshilambuilu tshijidila mu dina dia Maweja-Nangila. Ku mikalu ya ditunga nebimanyike dibue bua kunemeka Maweja-Nangila.

²⁰Ebi nebileje mudi Maweja-Nangila muena bukole buonsu usomba mu ditunga dia Ejipitu. Padibu bakengesha bena Ejipitu, bobu bela mbila kudi Maweja-Nangila, Mvidi Mukulu neabatumine mubapandishi, udi mua kubalumbuluila, ne kubasungidila.

²¹Nenku Maweja-Nangila neadimanyishe kudi bena Ejipitu. Bobu kabidi nebamumanye, bamutendelele ne milambu ya kuosha, ne milambu ya bia pa madimi. Nebaditshipe kudiye, nebashale balama mitshipu yabu.

²²Maweja-Nangila neanyoke bena Ejipitu, bua bamone mua kudilengeja. Nebapingane kudiye. Yeye neanyishe malomba abu, neabambuluishe.

²³Dituku adi, njila neumuke ku ditunga dia Ejipitu, uya ku ditunga dia bena Ashure. Bena Ashure nebaye mu Ejipitu; bena Ejipitu nebaye mu Ashure. Bonsu pamue nebatendelele Maweja-Nangila.

²⁴Dituku adi, matunga asatu, dia bena Ejipitu, dia bena Ashure, ne dia bena Izrayele, neikale mulongu umue. Nealeje bantu ba pa buloba bujima mudi Maweja-Nangila wela bantu lupemba.

²⁵Maweja-Nangila muena bukole buonsu neele bantu lupemba ne miaku ya ne: “Ndi ngeela lupemba, bena Ejipitu, bantu banyi, bena Ashure bandi musonge ne bianza bianyi, ne bena Izrayele bandi musungule.”