Read Tshiluba Yeshaya 22 Bible Online

Yeshaya 22 - Tshiluba bible

Yeshaya 22

¹Badi bamanyisha malu adi atangila bena “Tshibandabanda, muaba udi Maweja-Nangila uleja malu.[167]” Yerushalayime, tshidi tshienzeka muebe nanku ntshinyi? Tshidi bantu bebe bonsu babandila ku misaka ya nzubu ntshinyi?

²Mitoyi bungi nanku mu tshimenga, mbila mikole nya tshinyi? Bantu mbasanke anyi? Bafue ba muebe ki mbafuile mu mvita anyi? Kabavua babashipe anyi?

³Balombodi ba tshituilu tshiebe bavua banyema bonsu, baluishi babu kabayi banji kubela mikete.[168] Bantu bonsu bavua muluishi mupete, uvua ubela mu lukanu, nansha bavua banyeme kule mene.

⁴Ke pandi nkuambila ne: “Kutangidi bualu buanyi to. Undekele, ndile bikole. Lekelayi kuditatshisha bua kunsamba, bua bana betu bonsu bavuabu bashipe.

⁵Bualu lelu, Maweja-Nangila, Mvidi Mukulu muena bukole buonsu, mmututshiompakaje.” Mbalutshimune, tuetu kutangalaka mu tshibandabanda, muaba udi Mvidi Mukulu uleja malu, kudila muadi mukole.[169]

⁶Bena mvita ba bena Elame bisumbu ne bisumbu, badi bambula mata ne mikete; bakuabu badi babanda mu matempu, babanda pa nyama ya tubalu. Bena mvita ba bena Kire badi balongolola ngabu yabu.[170]

⁷Wewe Yerushalayime, bena matempu ne bena tubalu, mbabuele mu bibandabanda biebe bilengela. Mbele mualu wa mvita ku tshibuelelu tshiebe.

⁸Yuda kena ne udi mua kumusungidila. Dituku adi, nuvua bavuluke bia mvita bivuabu bateke mu nzubu muabu binyika ne: “Nzubu wa Muitu.”[171]

⁹Nuvua bamone miaba yonsu ivua miupuke, mu tshimana tshivua tshinyungulukila Tshimenga tshia Davide. Nuvua basangishe mayi mu tshiina tshia mayi tshia kuinshi.[172]

¹⁰Nuvua babadike nzubu ya Yerushalayime. Nuenu kupulamu mikuabu, kuangata mabue bua kukolesha nawu tshimana tshia tshimenga.

¹¹Nuvua bumbule tshiina tshia mayi, munkatshi mua bimana bibidi,[173] bua kukoka mayi avua mu tshiina tshia mayi tshikulukulu. Kadi kanuena bavuluke ne: Mvidi Mukulu ke udi muenze malu onsu. Uvua mualongolole ku kale. Kadi nuenu kanuvua bamone bualu ebu.

¹²Dituku adi, Maweja-Nangila, Mvidi Mukulu muena bukole buonsu, uvua munubele bua nudile muadi, bua nunyingalale, nubeye nsuki, nuvuale bilamba bia mu madilu.

¹³Kadi nuenu kusanka amu kusanka, kushipa ngombe, kukosa mikoku mitu, kudia minyinyi, kunua maluvu… Nuenu kuamba ne: “Tudiayi, tunuayi, bualu malaba netufue.”[174]

¹⁴Kadi Maweja-Nangila muena bukole buonsu, uvua mungambile ne: “Ndi nditshipa, tshiena ndekela tshilema etshi, amu nuenu bamane kufua.” Maweja-Nangila, Mvidi Mukulu muena bukole buonsu udi ujadika nanku.

¹⁵Maweja-Nangila, Mvidi Mukulu muena bukole buonsu, uvua mungambile ne: “Uye kudi Shebna, mulami wa bintu bia mu nzubu wa bukalenga, umuambile ne:

¹⁶Bumfumu buudi nabu muaba ewu mbumfumu kaayi? Bulela buudi nabu apa mbulela kaayi? Udi udiumbuila lukita, udiumbuila majambu pa mukuna, udiumbuila webe muaba wa ndekelu munda mua lubuebue bishi?

¹⁷Wewe udi udimona bu muntu udi ne bukole, kadi Maweja-Nangila neakuele panshi, ku tshisusu amu tshimue. Neakusuike bikole bu kabuki.[175]

¹⁸Neakuele kule, mu ditunga dialabale, amu bu mudibu bela ndundu wa dinaya nende. Muaba awu ke uwafuila, neufuilemu, pabuipi ne matempu ebe audi uditemba nawu, bualu udi munyange lumu lua lubanza lua mfumuebe!

¹⁹Maweja-Nangila udi wamba ne: nenkuipate pa mukuna webe, nenkumushe pa muaba uuvua musombe.

²⁰Dituku adi, nembikile muntu wanyi Eliyakime, muana wa Ilkiya.

²¹Nemmuvuadike tshilamba tshiebe, nemmusuike mukaba webe wa mu nshingu, nemmupeshe bumfumu buuvua wewe nabu. Neikale bu tatu wa bantu bonsu ba mu Yerushalayime, ne ba mu bukalenga bua Yuda.

²²Nenteke pa dikaya diende, nsapi wa bukalenga bua Davide. Padiye unzulula tshiibi, kakuena muntu udi utshinjila. Padiye utshinjila, kakuena muntu udi utshiunzulula.[176]

²³Nemmushindike muaba mukole, bu mudibu basa mulonda. Bana babu bonsu nebapete lumu kudiye.”

²⁴Kadi ndelanganyi ya mu diku diende yonsu, bakulu ne bana, nebatekemene amu kudiye, amu bu mudibu bakudika bintu bia mu tshikuku, ngesu ne makopu, ku mulonda umue. Bionsu ebi mbujitu kaayi!

²⁵Maweja-Nangila muena bukole buonsu udi wamba ne: “Dimue dituku, mulonda, nansha bobu bawase muaba mukole, neutuke, neupone panshi. Bionsu bivua bikudikaku nebitshi-bukangane.” Maweja-Nangila Mvidi Mukulu wa bena Izrayele udi ujadika nanku.