Read Tshiluba Yeshaya 23 Bible Online

Yeshaya 23 - Tshiluba bible

Yeshaya 23

¹Badi bamanyisha malu adi atangila tshimenga tshia “Tire”. “Nuenu badi benda ne matu mu mayi manene, asayi muadi, bualu bavua babutula tshisabu tshienu, ne nzubu inuvua mua kunyemena, kuikishila.[177]” Amu matu afika, afuma ku tshidiila tshia Kitime, ke bobu kushisha kumanya bualu ebu.

²“Nupuwe ne bowa bu tumama, nuenu badi basa ku muelelu wa mayi manene, nuenu bangenda mushinga ba mu Sidone, badi batuma bantu badi bapitshila

³mu mayi manene.[178]” Bena Sidone badi basumba, basumbisha, bionsu bidibu bamiamina, banowa ku muelelu wa Nile. Amu bobu bena Sidone, ke badi bangata bintu, bidibu bapana mu bisamba bionsu.[179]

⁴Nuenu bena Sidone, nudi mua kumvua bundu, ne nuenu kabidi bena tshimenga tshia Tire tshivuabu bakoleshe ne bimana. Mayi manene, adi kaayi amona matu, adi amba ne: “Ndi bu mamu uvua kayi mumvue makenga, kayi mulele bana, kayi mukele bana ba balume, kayi mukoleshe bana ba bakaji.[180]”

⁵Bena Ejipitu nebikale kabidi mu dikenga, padibu bapeta lumu lua bionsu bivua bienzekela tshimenga tshia Tire.

⁶“Nuenu badi basa ku muelelu wa mayi manene, sabukayi mayi manene too ne ku tshimenga tshia Tarshishe. Asayi miadi.[181]

⁷Etshi ntshimenga tshienu, tshivua bantu basankidile kale anyi? Tshimenga tshienu bavua batshiase kukadi bidimu bipite bungi. Bena tshimenga tshienu, ke bavua baye kusomba, mu matunga a kule.[182]”

⁸Tire ke uvua wabanya makalenga. Bangenda mushinga bende ke bavua balombodi ba matunga. Bapanyishi bende ba bintu, ke bavua bantu banemeka. Kadi udi mujadike bua kubutula Tire nnganyi?

⁹Amu Maweja-Nangila muena bukole buonsu ke udi mujadike bualu ebu, bua kujikija ditambisha, dia bantu badi badipa lumu, bua kupepeja bantu aba, badibu banemeka pa buloba.

¹⁰“Nuenu Tire, dimayi mpindiewu madimi enu, bualu kakuena kabidi tshisabu, muaba udibu benza matu a pa mayi manene.[183]”

¹¹Maweja-Nangila uvua mukanyine mayi manene, uvua muzakaje makalenga. Maweja-Nangila uvua mutume diyi, bua babutule bimenga bia bena Kenaane, bivuabu bakoleshe ne bimana.[184]

¹²Maweja-Nangila uvua muambe ne: “Nuenu bena Sidone, kanuena mua kusanka kabidi to. Tshimenga tshienu tshidi bu nsongakaji, udibu babuelela mu nzubu ku bukole. Nansha nuenu baye, basabuke mayi manene, bafike ku tshidiila tshia Kitime, kanuakupeta dikisha nansha kakese.

¹³Tangila buloba bua bena Babilone,[185] bantu aba kabenaku kabidi to. Bena Ashure mbamane kuenzamu tuleya bua kuluisha bena Babilone. Bavua babumbulamu nzubu ya bakalenga, tshimenga tshishale dikolu.

¹⁴Nuenu badi benda ne matu mu mayi manene, asayi muadi, bualu bavua babutule tshisabu tshienu, ne nzubu inuvua mua kunyemena, kuikishila.”

¹⁵Nenku, nebapue Tire muoyi bidimu makumi muanda mutekete. Ke bidimu bidibu babala bua bumfumu bua mukalenga umue. Padi bidimu ebi makumi muanda mutekete bijika, nebenzele Tire, bu mudibu bimba mukaji muena tshiendenda mu musambu ne:

¹⁶Wewe mukaji muena tshiendenda, udibu kabayi bavuluka kabidi, angata lunzenze luebe,[186] wendakane mu tshimenga. Imba lunzenze luebe bimpe, imba amu kuimba misambu. Bumue bantu nebakuvuluke.

¹⁷Padi bidimu makumi muanda mutekete bipite, Maweja-Nangila neambuluishe tshimenga tshia Tire. Netshituadije kabidi kupeta makuta ku buendenda ne makalenga mashilangane onsu a pa buloba.

¹⁸Kadi bintu bidibu bapeta mu mushinga, nebabijidile mu dina dia Maweja-Nangila. Kabena babumba bintu ebi to. Kabena nansha babilama. Kadi bidi amu bua kudisha, kukutshisha ne kuvuadika bimpe bantu badi batendelela Maweja-Nangila.