Read Tshiluba Yeshaya 24 Bible Online

Yeshaya 24 - Tshiluba bible

Yeshaya 24

¹Maweja-Nangila neanyange buloba, neabushiye tshipela. Udi uvundulula buloba, utangalaja badi basombapu.

²Bualu bua mumue budi bukuata batuangaji ne bantu bakuabu, bukuata bamfumu ne bapika babu, bukuata bamamu ba nzubu ne bena mudimu babu, bukuata basumbishi ba bintu ne badi basumba, bukuata basombeshanganyi ba bintu ne badi basomba bintu, bukuata bangatshi ba kasombela ne bafidi ba kasombela.

³Mu buloba nemushale mutupu bulelela. Nebabutule buloba bujima. Bualu Maweja-Nangila udi wamba ne:

⁴“Buloba budi mu madilu, budi bubutuka. Bukua bintu budi buenda bujimina, bubutuka. Diulu kabidi didi dienda dinyanguka, tshiapamue ne buloba.[187]”

⁵Bantu bavua banyanga buloba, bualu bavua babenga mikenji ya Maweja-Nangila, batupa ku diyi diende, bupula ndondu uvua ubasuikakaja ne Mvidi Mukulu wa kashidi.

⁶Ke padi buloba bujima bupeta diakabi, bualu Mvidi Mukulu mmubuele mulawu. Bantu badi babuela mu dikenga, bualu bavua bapia tshibawu. Badi bajimina bonsu, bashale amu bungi bukese.

⁷Mionji ya mvinyo idi ifubidila. Kamuena kabidi mvinyo mupiamupia. Bavua basanka kale, badi batua mikemu.

⁸Muadi wa ngoma, udi upuwa. Mutoyi wa bantu badi basanka mu tshibilu, mmujike. Kabena bimba kabidi nzenze.[188]

⁹Kabena bimba kabidi misambu, padibu banua maluvu basanka to. Maluvu makole akadi umvuika ne bululu kudi badi baanua.

¹⁰Tshimenga tshidi tshinyanguke, katshiyi ne bantu ba bungi. Bantu badi bashala, badi badipayila mu nzubu.

¹¹Bantu badi badidila mu misesu, bualu kabatshiena ne mvinyo. Disanka dionsu ndijike, tuseku ntujimine mu ditunga.

¹²Mu tshimenga mudi mushale amu nzubu minyanguke. Tshiibi tshia tshimenga ntshitshibulukangane tshionsu.

¹³Eyowa, pa buloba bujima, miaba yonsu idi bantu basomba, kakuena tshia nsongu tshidi tshishalepu to. Bidi bu mudi mitshi ya olive, bantu bamane kupola tumuma tuonsu, nansha bu mionji ya mvinyo, bantu bakebamu tumuma tua ndekelu tuvua tushale.

¹⁴Bantu bikale bashale ne muoyi nebimbe musambu, batumbisha bunene bua Maweja-Nangila. Badi bela mbila ya disanka, bafuma ku luseke ludi diba dibuelela, bamba ne:

¹⁵“Nuenu bena ku luseke ludi diba dipatukila, tumbishayi Maweja-Nangila. Nuenu badi basomba ku mielelu ya mayi manene, kobolayi dina dia Maweja-Nangila Mvidi Mukulu wa Izrayele.”

¹⁶Tudi tunwua musambu ewu, udibu bimba ne ku ndekelu kua buloba, bamba ne: “Mvidi Mukulu udi ukosa nsambu pa yoyi, atumbe!” Kadi meme kuamba ne: “Tshingenza ntshinyi? Mioyi mminshikile munda. Dikenga ndimane kunkuata.” Benzedianganyi ba bibi badi amu benzelangana bibi, badi baditua amu mu dielangana bifufu.

¹⁷Nuenu bantu badi basomba pa buloba, bowa bukole, dijimba, ne buteyi, bidi binuindila.[189]

¹⁸Muntu yonsu wanyema, bua mbila idi mukuatshisha bowa, neapone mu dijimba. Kadi pikalaye mupatuke mu dijimba, buteyi nebumukuate. Mvula wa bungi nealoke mulu.[190] Buloba nebuzakale ne kuinshi kuabu.

¹⁹Buloba budi butayika, bupandika, butenkakana bikole.

²⁰Buloba nebulenduke bu muntu mukuatshike maluvu, nebutenkakane eku ne eku bu kazubu ka bisosa. Nebudishinde panshi, bualu mibi yabu mipite bujitu. Kabuena bujuuka kabidi to.

²¹Dituku adi Maweja-Nangila neanyoke makole a mulu, ne bakalenga badi pa buloba.

²²Nebabasangishe bonsu pamue bu bena lukanu, babela mu dijimba. Nebabakangile mu nzubu wa lukanu. Papita matuku mavule, bonsu aba nebapitshile ku tshilumbu.

²³Pashishe ngondu neakunzubile, diba nedibuitshidile ne bundu. Bualu Maweja-Nangila muena bukole buonsu, neadie bumfumu mu Yerushalayime pa mukuna wa Siyone. Bakulu ba ditunga, nebamone butumbi buende.[191]