Read Tshiluba Yeshaya 26 Bible Online

Yeshaya 26 - Tshiluba bible

Yeshaya 26

¹Dituku adi, mu ditunga dia Yuda, bantu nebimbe musambu, bamba ne: “Tudi ne tshimenga tshivuabu bakoleshe ne bimana. Bua kutshilama bimpe, Maweja-Nangila mmutshinyungulule ne bimana, kabidi ne mushiki wa buloba.

²Unzululayi biibi. Bantu badi ne diyi dimue, badi bakumbaja tshidibu balaye, babuele.[198]

³Bualu ke bantu badi bajadika malu ne muoyi umue.[199] Wewe Maweja-Nangila udi ubalama ne bupole, bualu badi batekemena kuudi.

⁴Tekayi muoyi wenu matuku onsu kudi Maweja-Nangila, bualu yeye udi Mvidi Mukulu wetu. Yeye neatukube kashidi.

⁵Bualu yeye uvua mutulule panshi bantu bavua basombe miaba mitumbuke. Uvua mushimbule, tshimenga tshivuabu kabayi mua kukuata. Uvua mubumbule bimana biatshi, mubilandakaje, mubiele panshi.

⁶Mpindiewu bantu bapele ne badibu bapetula, badi mua kudiata muaba awu.”

⁷Maweja-Nangila, wewe udi uleja bantu badi bakuitaba, njila mululame wa kulondabu. Njila uudi wewe uleja bantu, udi ubafikisha buludi muaba mene udibu bakeba.

⁸Maweja-Nangila, bua tumone mua kukumbaja biudi wewe musue, tudi tutekemena amu kuudi. Kutela dina diebe, kukuela mbila, ke tshidi mutshima wa muntu yonsu ujinga.

⁹Meme kabidi bufuku, ndi nkujinga. Ndi nkukeba ne muoyi wanyi mujima.[200] Pawikala ulumbuluisha, unyoka bantu badi basomba pa buloba, nebamanye mua kusomba bimpe.

¹⁰Kadi padibu bafuile benji ba bibi luse, kabena balonga bidibu ne bua kuenza to. Nansha mu ditunga edi mudi bantu bakutshina, badi benza amu bibi, kabayi bavuluke muudi wewe Maweja-Nangila ne bukole.[201]

¹¹Maweja-Nangila, wewe udi olola tshianza bua kubanyoka, kadi kabena bamona biudi musue kuenza to. Udi ubaluisha bundu, ubanyoka, bua bamone muudi unanga bantu bebe bikole! Kapia kaudi mufundile bena lukuna bebe, kababutule bonsu bungi buabu![202]

¹²Maweja-Nangila, neumpeshe tshionsu tshitudi tukengela.[203] Bualu wewe ke udi mutuenzele bionsu bituvua bakumbaje.

¹³Maweja-Nangila Mvidi Mukulu wetu, tuvua ne bamfumu bakuabu. Kadi wewe nkayebe, ke utudi tuvuluka.

¹⁴Bamfumu betu ba kale bakadi bamane kufua, kabena bapeta muoyi kabidi to. Badi amu bu mundidimbi, kabena bajuuka kabidi to. Bushuwa, wewe ke uvua ubanyoka, ubabutula. Muntu nansha umue kena mua kubavuluka kabidi to.

¹⁵Maweja-Nangila, Wewe uvua mutantshishe tshisamba tshietu. Wewe kusemeja mikalu yonsu ya ditunga dietu kule. Ke muuvua mupete lumu lunene.

¹⁶Maweja-Nangila, patuvua mu dikenga, tuvua bakujinge. Pauvua mutunyoke, tuvua bakusengelela.[204]

¹⁷Maweja-Nangila, tuetu kukukeba, tudila, bu mukaji udi udinyenga, udila muadi, diba dikadiye pa kulela.

¹⁸Tuetu kabidi tuvua ne bua kulela, tuvua mu dikenga dia pa lulelu. Kadi tuetu kulela amu lupepele. Katuena basungidile bantu ba mu ditunga dietu. Buloba buvua bushale munda mutupu.

¹⁹Tshisamba tshianyi, bafue bebe nebabike ku lufu, — nenku bitalu bia bantu banyi nebipete muoyi. — Badi balale mu buloba, nebajuuke, beela tunkunduluila.[205] Bualu Maweja-Nangila, neakutumine lumuma ludi lupetesha muoyi. Nanku buloba nebupatule ne muoyi bafue bavua amu bu mundidimbi.

²⁰Bena tshisamba tshianyi, buelayi munda mua nzubu yenu, nukange biibi. Nupaye mabaya ku bitupa bionsu bibidi bia tshiibi. Anjayi kusokoma katupa kipi, too ne pajika tshiji tshia Maweja-Nangila.

²¹Maweja-Nangila udi upatuka mu nzubu muende, bua kunyoka badi pa buloba, bualu bua malu mabi avuabu benze. Bavua bapumune, basokoke mu buloba, mashi a bantu bavua kabayi ne bualu. Kadi buloba kabuena buabuikila kabidi to. Nebuleje patoke bantu bavuabu bashipe.