Read Tshiluba Yeshaya 28 Bible Online

Yeshaya 28 - Tshiluba bible

Yeshaya 28

¹Nuenu bena Efrayime,[210] nuenu badi bakuathika maluvu, nudi bena diakabi. Nudi nuditambisha bua tshimenga tshienu tshia Samariya, tshidi bu tshikata tshia lumu, tshinuvua base kulu, tshitangilangane ne tshibandabanda tshidi ne madimi mimpe. Kadi tshiotshi tshidi amu bu tshifulu tshienza ne bilongu bimpe. Bilongu ebi bidi bifubidile pa mitu ya bakuatshiki ba maluvu.

²Kadi Maweja-Nangila neatume muntu udi ne bukole, udi mufuane mvula mukole wa mabue, nansha tshipupu tshidi tshinyangakaja bionsu. Udi bu mvula wa mudimbi, wa mayi mapasalala miaba yonsu. Maweja-Nangila udi olola tshianza, utonkola tshimenga panshi musangu umue.

³Tshikata tshia lumu tshivua bakuatshiki ba maluvu ba bena Efrayime baditambishila, nebatshidiatakaje ku makasa.

⁴Bilongu bikadi bifubidila. Bivua ku tshifulu tshivua tshitangilangane ne tshibandabanda tshia madimi mimpe, nebabidiatakaje mu makasa. Tshimenga tshia Samariya netshikale bu tshimuma tshia mfiku, tshidi tshidianjila kuboba, tshikondu tshia kupola, katshiyi tshianji kukumbana. Muntu wa kumpala watshimona, udi utshipola diakamue, udia.

⁵Dituku dikuabu, Maweja-Nangila muena bukole buonsu neikale tshikata tshia lumu, tshifulu tshilengeja ne bilongu bimpe, tshisankisha bantu badi bashala ne muoyi.

⁶Neambuluishe bandumbulula, bua bakose nsambu amu pa yoyi. Neapeshe bantu bukitu bua kuipata muluishi udi ukeba kubuelela ku tshiibi tshia tshimenga.

⁷Nansha batuangaji ne bambi, badi batenkakana, bakuatshika maluvu makole. Bavua banua maluvu makole mapite bungi, kabayi nansha mua kuimana kulu, lungenyi luabu lujimina. Bambi badi bamona malu, kabayi mua kuajingulula. Batuangaji badi bakosa bilumbu, batatakana, badishinda panshi.

⁸Badi balukila pa mesa onsu. Bukoya buabu budi miaba yonsu.

⁹Badi baseka, bakonka ne: “Yeshaya ewu, udiye musue kulongesha nnganyi? Udiye musue kumvuija bidibu bamuleja nnganyi? Tudi bana ba mu tshiadi badibu balekesha dibele amu mpindiewu anyi?

¹⁰Umvuayi mudiye ukukumina ne: B-A-BA, B-A-BA, B-E-BE, B-E-BE; ku dileta ku dileta, ku muaku ku muaku.[211]”

¹¹Kadi panudi kanuyi basue kunteleja, Maweja-Nangila mpindiewu neanutumine benyi, bua banumanyishe malu, mu muakulu wabu, unudi kanuyi mua kumvua.

¹²Maweja-Nangila uvua mumane kunuambila ne: “Nunteleje, bua nupete dikisha. Bantu bakadi bapungile, nuanyishe bua bikishe. Kundi meme ke kudi bupole.” Kadi kanuvua basue kunteleja nansha.[212]

¹³Ke mudi Maweja-Nangila musue kunuambila amu ne: “B-A-BA, B-A-BA, B-E-BE, B-E-BE, ku dileta ku dileta, ku muaku ku muaku.” Nenku nenunyeme, nudishinda, nutshibuka nyima. Nenubuele mu nzubu wa lukanu, nupanga mua kupatukamu.

¹⁴Nuenu basekianganyi, badi balombola[213] bantu aba ba mu Yerushalayime, umvuayi bidi Maweja-Nangila wamba ne:

¹⁵“Nukadi nuamba ne: tudi batue ndondu ne lufu, tudi bumvuangane ne bajangi. Tshipupu katshiena mua kutukuata, paditshi tshipita. Bualu tudi bamone dishima bu muaba wa kunyemena, ne kudinga bantu, bu muaba wa kusokomena.”

¹⁶Kadi umvuayi mudi Maweja-Nangila Mvidi Mukulu wamba: “Ndi nteka dibue dia tshitaku mu Siyone, dibue dia kunuteta nadi, dibue dia mushinga dia mu ditumba, didibu kabayi mua kunyungisha. Pa dibue edi mpafunde ne: muntu yonsu udi utekemena kundi, kena unyunga to.[214]

¹⁷Monji wa kupima nawu, newikale buakane. Nshinga wa kululamija nende, ke kuenza malu mimpe.” Kadi mabue a mvula neumushe, dishima dienu dinudi batekemene. Mayi neabumbule, muaba unuvua banyemene.

¹⁸Nebashipe ndondu yenu ne lufu. Diumvuangana dienu ne bajangi, kadiakuikalaku kabidi to. Pafika tshipupu, netshinuboze.

¹⁹Dinda dionsu, tshipupu netshinukuate, nansha bufuku katshiakunushila muaba. Bantu pumvuabu batshitela, nebafue bowa bunene!

²⁰Eyowa, bu muambile bakulu ne: bulaalu mbupite buipi, muntu kena mua kudiololapu. Mbulankete mmupite bukese, muntu kena mua kudijingilamu.

²¹Maweja-Nangila neafike, neakuate mudimu, muvuaye muenze pa mukuna wa Perashime, muvuaye muenze mu mpata wa Ngibone.[215] Kadi mudimu wende neukemeshe bantu.

²²Nenku mpindiewu, lekelayi bilele bienu bibi, bua kabayi kukolesha majita a mionji ya mu nshingu yenu. Bualu Maweja-Nangila Mvidi Mukulu muena bukole buonsu, mmungambile ne: ndi mujadike bua kubutula ditunga dijima.

²³Ntelejayi bimpe, teyayi matshi enu kundi, umvuayi bionsu bindi mua kuamba.

²⁴Kanuena banji kumanya ne: Tshidima udi musue kumiamina ntete, udi upitshishila diba diende dijima, amu ku dibundulula budimi, ku diela mabula, ne ku dilandakaja anyi? Nansha kakese!

²⁵Kadi padiye ujikija dilandakaja buloba mu budimi, udi umiamina ntete mishilangane, ya ndungu, ya tumbumba ne ya mponda, ya kuenza bukula, ne mikuabu, ifika ne ku mielelu ya budimi.[216]

²⁶Ke tshivua Maweja-Nangila wende mumuleje bua kuenza. Ke tshivuaye mumulongeshe.

²⁷Bua kushipula ntete udi wangata amu tshiamu, nansha mutshi udi mukumbanyine ntete ayi.[217]

²⁸Ntete ya kuenza bukula, badi bayishipula ne tshiamu tshia bujitu. Kadi kabena batungunuka ne mudimu awu kashidi, kabena bazaza ntete.

²⁹Lungenyi lua kuenza nanku ludi lufuma kabidi kudi Maweja-Nangila muena bukole buonsu. Mvidi Mukulu udi uleja bantu nanku, mudi meji ende a kukema, mudiye mumanye malu onsu.