Read Tshiluba Yeshaya 3 Bible Online

Yeshaya 3 - Tshiluba bible

Yeshaya 3

¹Mfumu munene, Maweja-Nangila muena bukole buonsu, neanyenge bena mu Yerushalayime, ne bena mu bukalenga bua Yuda, bionsu bidi mua kubambuluisha: biakudia ne biakunua bidibu nabi mu mayeba, ne bantu bonsu badi mua kubatua nyama ku mikolu.

²Udi umbusha bisumbu bia bena mvita, bena mvita bapiluke ne bena mvita bakuabu, bandumbulula, bambi, bena mbuku, ne bakulu ba ditunga,

³balombodi ba bena mvita, ne banene ba ditunga, bafidi ba ngenyi, bena dialu,[16] ne bena majimbu.

⁴Maweja-Nangila udi wamba ne: “Ndi mbapesha bansongalume, bashale bamfumu babu. Nebabaludike mudibu basue.”

⁵Netshikale tshikondu tshia buntomboji, tshia kufuila mianzu. Bansonge nebakengeshe bakulumpe, bantu babule meji nebapetule bantu ba mushinga.

⁶Bantu nebakuate muanabu wa mu tshiota, nebamuambile ne: “Wikale mfumuetu, bualu utshidi ne tshinkutu.[17] Akaja ditunga dietu didi dinyanguke.”

⁷Awu kabidi neandamune ne: “Meme tshiena ne tshintu tshia kunuenzela to. Ku nzubu kuanyi nkutupu. Kakuena nansha biakudia, nansha kazaku. Kanunteki mfumuenu to.”

⁸Yerushalayime mmubutuke, Yuda mmudishinde panshi. Bualu bidi bena Yuda bamba, ne bidibu benza, bidi amu bileja mudibu babenga Maweja-Nangila, bamutuila nkanana.

⁹Bu mudibu bakosa nsambu ne kansungansunga, nebabafunde ku tshilumbu. Bu muvua bantu ba mu tshimenga tshia Sodome benza,[18] ke mudi bena Yuda benza buenzavi, munda munya, kabayi babusokoka. Eyowa, mbena diakabi, bualu badi badilongoluela kabutu kabu!

¹⁰Vulukayi ne: diakalenga ndia bantu badi bitaba Mvidi Mukulu, bualu bidibu benze nebibapeteshe tshipeta tshimpe.

¹¹Bantu babi mbena diakabi. Nebabenzele muvuabu benzela bantu nabu.

¹²Maweja-Nangila udi wamba ne: Bantu badi bamfumu ba tshisamba tshianyi, badi amu bu nyunyu midianganyi. Badi bashala mu bumfumu badi amu bena lukuka.[19] Tshisamba tshianyi, bantu badi bakulombola, badi amu bakupambula, baya nebe mu njila mubi.

¹³Maweja-Nangila mmujuke bua kukosa nsambu. Udi muimane kulu bua kulumbuluisha tshisamba tshiende.[20]

¹⁴Udi ufunda bafidi ba ngenyi, ne bamfumu ba tshisamba tshiende, ku tshilumbu ne: “Nuenu ke badi banyanga budimi buanyi bua mvinyo.[21] Nudi buwuje nzubu yenu, ne bintu binudi banyenga bapele!

¹⁵Nudi nuzaza bantu banyi, nukengesha bapele bua tshinyi? Meme Maweja-Nangila ndi nnuebeja nanku!”

¹⁶Maweja-Nangila udi wamba ne: “Bakaji ba mu Yerushalayime badi ne ditambisha. Badi benda bela mitu mulu, bakenzakana kabayi bundu, benda balunduka badisua, badidisha nkanu yabu ya ku mikolu.”

¹⁷Nenku Maweja-Nangila neabakungule mu mutu, neabashiye butaka.[22]

¹⁸Dituku adi, Maweja-Nangila neumbushe bionsu bidi bibalengeja: nkanu ya ku mikolu, bilengejilu bileja diba nansha ngondu;[23]

¹⁹tukanu tua ku matshi, bikupa bia ku maboku, ne bitambala bia ku mutu;

²⁰bifulu, tukanu tua ku mikolu, mikaba ya bilamba miluka, tubuta tuwule ne mpingu, nansha ne manga;

²¹tukanu tua ku minu, ne tua ku diulu;

²²bilamba bia dituku dia tshibilu, binkutu, bilamba bia kujingila mu nshingu, bibuta bia ku bianza;

²³mintumpu, mitelu mimpe, bitambala bia mu nshingu, ne bia ku mutu.

²⁴Pa mutu pa kununka mupuya muimpe wa manananshi, nebanunke mupuya mubi wa bintu bibole. Pa mutu pa mukaba, nebavuale anu muonji. Pa mutu pa kulukisha nsuki bimpe, nebakungule mu mutu. Pa mutu pa bilamba bilenga, nebavuale bia madilu. Eyowa, bulenga buabu nebuandamuke bundu.[24]

²⁵Yerushalayime, bantu balume bebe, nebafue ku muele. Nansha bilobu biebe mene nebanshipe mu mvita.

²⁶Nenku mu tshimenga tshijima, nebateke madilu, nebadile miadi, bu mudi mukaji udi mujimije bana bende, ushala musombe panshi nkayende.