Read Tshiluba Yeshaya 35 Bible Online

Yeshaya 35 - Tshiluba bible

Yeshaya 35

¹Tshipela ne buloba bume nebileje disanka diabi. Ditunga divua ne minanga nedisangale, nedimeneshe bilongu

²bilenga bu kapapankole! Eyowa, ditunga dimeneshe bilongu, disangale, diele mbila ya disanka! Maweja-Nangila neadipeshe buimpe bua mikuna ya Lebanone, bulenga bua mukuna wa Karmele, ne bua mpata wa Sarone.[250] Nenku bantu bonsu nebamone butumbi bua Maweja-Nangila, buneme bua Mvidi Mukulu wetu.

³Koleshayi mu maboku bantu badi bapungile, kankamikayi binu bidi bitenkakana.[251]

⁴Ambilayi badi batekesha mu maboku ne: “Kanutshinyi, kolayi bo bo bo, Mvidi Mukulu wenu udiku! Udi ufika bua kunusombuela, bua kupingajila bena lukuna benu malu mabi avuabu banuenzele. Yeye mene udi ufika bua kunupandisha.”

⁵Diba adi, mesu a bampofu neatabale, amone bimpe, matshi a bena mapapa, neunwue biakane.

⁶Diba adi, batebuki nebatupike, baja ne maja, bu ngulungu mu mpata.[252] Tumama netuele mbila ya disanka. Bualu mu tshipela, nemupatuke mayi: Misulu neipueke mu ditunga divua ne munanga.

⁷Lusenga luvua luosha, neluandamuke dijiba. Ditunga divua kadiyi ne mayi, nediandamuke mpokolu wa mayi. Miaba ivua mibuabua ilala, malenge ne nshiba nebitolokemu.

⁸Koku aku, nekuikale njila. Nebamuinyike ne: “Njila wa tshijila”. Muntu mupie mikiya kakupitshilaku to. Mutendeledi wa mvidie kakuendakanamu to. Njila awu neikale mutekela bantu ba Maweja-Nangila, patuadijabu luendu luabu.

⁹Mu njila amu kamuena ntambue. Nyama wa lonji nansha umue kena upitshilamu. Kabena basanganamu nyama ayi. Momu ke muendelabu amu kudi bantu, badi Maweja-Nangila mupikule.

¹⁰Bantu badi Maweja-Nangila musungidile, nebapinganyine mu njila awu. Nebafike mu Siyone, bimbe misambu ya disanka. Disanka dia kashidi nedikale pa mpala yabu. Disanka dinene nediuwuje mioyi yabu. Makenga ne masumpakana mbimane kubashila muaba kashidi.