Read Tshiluba Yeshaya 37 Bible Online

Yeshaya 37 - Tshiluba bible

Yeshaya 37

¹Mukalenga Izkiya mumane kumvua bionsu bivuabu bambe, kudipandaye bilamba biende. Kuvualaye bilamba bia madilu. Kuyaye mu nzubu wa Maweja-Nangila.

²Kutumaye diakamue Eliyakime, mulombodi wa nzubu wa bukalenga, Shebna, mufundi, ne bakulu ba batuangaji, kudi muambi Yeshaya, muana wa Amose. Bantu abu kuvuala kabidi bilamba bia madilu.

³Kuyabu kuambila muambi Yeshaya ne: “Mukalenga Izkiya udi wamba ne: — Lelu ndituku dia kutukengeshabu, dia kutunyokabu, ne kutufuishabu bundu. Bu mudibu bamba ne: muana ukadi pabuipi, kadi mamuende kena ne bukole bua kumulela to.

⁴Mukalenga wa bena Ashure, mmutume mulombodi wa bena mvita, mumuambuluishi, bua kupendabu Mvidi Mukulu wa muoyi. Eyowa, ndi njinga bua Maweja-Nangila Mvidi Mukulu webe umvue bipendu bionsu ebi, anyoke muntu uvua mumupende! wewe lombaku Maweja-Nangila, akuile bantu bende badi bashala ne muoyi.”

⁵Bantu bavua mukalenga Izkiya mutume bamane kuyukila ne muambi Yeshaya,

⁶awu kubambila ne: “Nuye kuambila mfumuenu ne: Maweja-Nangila udi wamba ne: Uvua muteleje muvua balombodi ba bena mvita ba mukalenga wa bena Ashure bampenda. Kadi kutshinyi bionsu bivuabu bakula abi to.

⁷Mukalenga neapete mukenji. Nanku meme nemmuenzeje mua kupinganaye mu ditunga diende. Nemmushipeshe kuende kudi bantu mu ditunga diende.[262]”

⁸Mulombodi wa bena mvita, muambuluishi wa mukalenga wa bena Ashure, kumvuaye lumu lua ne: mfumuende mmumuke mu tshimenga tshia Lakishe, bua kuluisha tshimenga tshia Libna.[263] Nenku kuyaye kumonangana ne mfumuende mu tshimenga atshi.

⁹Pashishe kuyabu kuambila mukalenga wa bena Ashure ne: Tiraka, muena Kushe, mukalenga wa bena Ejipitu, mmufike bua kukuluisha. Nanku, Senakeribe kutumina Izkiya,

¹⁰mukalenga wa bena Yuda, muntu bua kumuambila ne: “Wewe udi mutambe kutekemena amu kudi Mvidi Mukulu webe. Udi wela meji ne: Mvidi Mukulu neankandike bua meme kukuata tshimenga tshia Yerushalayime anyi? Kadi Mvidi Mukulu kakushimi to.

¹¹Udi mumane kumanya muvua bakalenga ba bena Ashure benzele matunga makuabu onsu, baanyangakaje. Nanku wewe udi wela meji ne: neupanduke anyi?

¹²Bakalenga bavua mu bukalenga kumpala kuanyi, bavua babutule bimenga ebi: Ngozane, Arane, Reshefe ne Telashare, tshimenga tshikulu tshia bena Edene. Mvidie ya matunga aa kayena mipandishe bimenga ebi to.

¹³Ela meji bimpe. Bakalenga ba mu tshimenga tshia Amate, tshia Arpade, tshia Layire, tshia Sefawayime, tshia Ena ne tshia Eva, badi penyi?[264]”

¹⁴Izkiya kuangata mukanda uvuabu bamutuadile kudi bena Ashure. Kuubalaye. Pashishe, kubuelaye mu nzubu wa Mvidi Mukulu, kuulejaye Maweja-Nangila.

¹⁵Kutendelelaye, wamba ne:

¹⁶“Maweja-Nangila muena bukole buonsu, Mvidi Mukulu wa bena Izrayele, wewe udi usomba ku mutu kua bakerubine. Wewe nkayebe ke Mvidi Mukulu, mfumu wa makalenga onsu a pa buloba. Wewe ke udi mufuke diulu ne buloba.[265]

¹⁷Maweja-Nangila, telejaku mudi bantu ba mukalenga Senakeribe bakupenda, wewe Mvidi Mukulu wa muoyi! Tangila dikenga ditudi nadi!

¹⁸Eyowa, Maweja-Nangila, bakalenga ba bena Ashure mbabutule matunga makuabu, banyangakaje maloba.

¹⁹Bavua boshe, banyangakaje mvidie ya matunga aa, bualu kayivua mvidie ya bushiwa to. Ivua amu mpingu ya mitshi, nansha ya mabue masonga kudi bantu.

²⁰Kadi wewe, Maweja-Nangila Mvidi Mukulu wetu, utusungidile mpindiewu mu bianza bia Senakeribe. Nankumu makalenga onsu a pa buloba, nebamanye ne: amu wewe Maweja-Nangila nkayebe ke udi Mvidi Mukulu.”

²¹Pashishe muambi Yeshaya, muana wa Amose, kutuma muntu bua kuambila Izkiya ne: “Maweja-Nangila Mvidi Mukulu wa bena Izrayele udi wamba ne: Ndi mumvue muudi ulombela Senakeribe, mukalenga wa bena Ashure.

²²Teleja malu andi muandamune Senakeribe: Tshimenga tshia Siyone tshidi tshikudiwula, tshikupepeja. Tshimenga tshimpe tshia Yerushalayime, tshidi tshikuseka, tshikupa mutu.

²³Uuvua upenda nnganyi? Uuvua ujana ne dikamakama nnganyi? Wewe mutshimbakane, uuvua mutangile ne kapeja nnganyi? Uvua usendeka amu meme, Mvidi Mukulu wa tshijila wa bena Izrayele!

²⁴Wewe uvua mutume bantu bebe, bua bampende meme Maweja-Nangila. “Uvua wamba ne: ‘Meme Senakeribe, ndi ne matempu a mvita mapite bungi. Ndi mubande ku nsongu ya mikuna. Ndi muye ne munkatshi mua ditunga dia Lebanone, bua kukosa mitshi ya sedre, idi mipite mikuabu yonsu ku buimpe, ne mitshi ya siprese, idi mipite mikuabu yonsu ku bule. Nemfike ku nsongu ya mikuna, ku ndekelu kuayi, ne munkatshi mua ditu.

²⁵Meme ndi mumbule biina bia mayi, ndi munue mayi mu matunga a bende.[266] Nengumishe misapa ya Nile, amu pandi ndiata makasa mu ditunga dia Ejipitu.’

²⁶“Kadi wewe Senakeribe, kuena mumanye bualu ebu anyi? Meme ke udi mulongolole malu aa kumpala kua bidimu! Ku kale kuaka, nkavua mujadike bua kuenza malu andi nkumbaja mpindiewu. Meme ke uvua mukupeshe bukole bua kubutula bimenga bivuabu bakoleshe ne bimana.

²⁷Bena bimenga abi kabavua ne bukole. Bavua batshina bikole, bumvua ne bundu. Bavua bafuanangane ne bikunyibua bia mu madimi, nansha ne bisosa bia mu mpata, nansha ne mitshi idi itoloka ku misaka ya nzubu, idi lupepela lua kudi diba dipatukila luosha.[267]

²⁸“Ndi mumanye malu ebe onsu, ndi mumanye paudi ujuuka[268], nansha paudi usomba, paudi upatuka, nansha paudi ubuela, ne paudi umfunyina meme.

²⁹Wewe udi umfunyina meme! Mvua mumvue pauvua umpenda ne dikamakama. Nenku nenkutekeshe, nkuele kakanu ku diulu, ne lukanu lua tshiamu mukana. Nenkupingaje kuebe, amu mu njila muuvua mufumine.

³⁰Kadi wewe Izkiya, ndi nkuleja malu adi ne bua kuenzeka: tshidimu etshi, nebadie bukula buenza ne ntete ya bidimenena. Tshidimu tshialonda kabidi ne benze nanku. Kadi tshidimu tshia panyima, nudi mua kumiamina ne kunowa ntete ya kuenza bukula, nudi mua kukuna mionji yenu ya mvinyo, ne kupola tumuma tuayi.

³¹Bena mu bukalenga bua bena Yuda badi bashala ne muoyi, nebikale tshiakabidi bu mutshi udi muele miji mu buloba: matamba awu neikale ne bimuma bia bungi.

³²Eyowa, mu Yerushalayime nemupatuke bantu badi bashala ne muoyi; bantu abu nebimane pa mukuna wa Siyone.” Yeshaya kuamba kabidi ne: “Maweja-Nangila wa bukole buonsu neakumbaje bualu ebu, bualu udi mununange menemene.

³³Kadi mpindiewu, telejayi: bua mukalenga wa bena Ashure, Maweja-Nangila udi wamba ne: — Kakubuela mu tshimenga etshi to. Kena mua kuasa muntu wa mu tshimenga etshi mukete to. Ngabu yende kayena mua kumuambuluisha bua kuluishaye tshimenga etshi. Kena mua kusemena pabuipi natshi to. Kena mua kuela dibula dia kuluangana mvita momu to.

³⁴Neapingene mu njila uvuaye mufumine. Kakubuela mu tshimenga etshi to. Meme Maweja-Nangila ndi ngamba nanku.

³⁵Nendame Yerushalayime, nemmusungidile, bualu ndi Mvidi Mukulu, kabidi ndi munange muntu wanyi Davide.”

³⁶Nanku, mutumibue wa Maweja-Nangila kuya mu mitanda ya bena Ashure. Kushipaye bantu binunu lukama ne makumi muanda mukulu ne bitanu. Butshia dinda, bantu bavua bashala ne muoyi babika, kumonabu bitalu bionsu abi.

³⁷Nanku, Senakeribe, mukalenga wa bena Ashure, kutudisha mitanda, kuya kusomba mu tshimenga tshiende tshikulu tshia Ninive.

³⁸Dituku dikuabu, pavua Senakeribe utendelela mu nzubu wa mvidie wende Nisroke, bana bende ba balume babidi: Adrameleke ne Sareshere kumushipabu. Pashishe kunyemabu, kuya mu ditunga dia Ararate.[269] Muanende mukuabu Asharadone, kumupinganaye mu bukalenga.