Read Tshiluba Yeshaya 44 Bible Online

Yeshaya 44 - Tshiluba bible

Yeshaya 44

¹Kadi mpindiewu, teleja, wewe tshisamba tshia Yakobe. Wewe Izrayele, muena mudimu wanyi, undi musungule.

²Teleja tshindi nkuambila: Meme Maweja-Nangila, ndi mukufuke, ndi mukuenze munda mua mamuebe, kabayi banji kukulela. Meme ndi nkuambuluisha: Kutshinyi, tshisamba tshia Yakobe, muena mudimu wanyi, Yeshurune undi musungule.[311]

³Bualu nempuekeshe mayi mu ditunga didi kadiyi mayi. Nempatule tusulu mu buloba buume. Nengitshikije Mueyelu wanyi pa bana bebe. Nengele ndelanganyi yebe lupemba.

⁴Ndelanganyi yebe neitoloke, idiunde, bu bisosa bidi ne mayi,[312] bu mitshi ya pepliye, idi mimene ku mielelu ya misulu.

⁵Diba adi, muntu neambe ne: ‘Ndi muntu wa Maweja-Nangila.’ Mukuabu neajinge, bua bamuinyike dina dia Yakobe. Munga neafunde pa tshianza tshiende ne: ‘Ntshia Maweja-Nangila.’ Neasanke bua kubuela mu tshisumbu tshia bena Izrayele.”

⁶Maweja-Nangila, mukalenga wa bena Izrayele, udi uludika, ulama bantu bende. Yeye ke Maweja-Nangila muena bukole buonsu. Udi ukuambila, wewe Izrayele, ne: “Meme ndi wa kumpala, ndi kabidi wa ndekelu.[313] Kakuena Mvidi Mukulu mukuabu, amu meme.

⁷Padi mvidie kampanda wela meji ne: tudi nende mumue, adileje apa, akule! Angumvuije bivuaye muenze. Uvua mumanyishe ku kale malu avua ne bua kuenzeka anyi? Udi mutuambile malu adi kaayi manji kuenzeka anyi?[314]

⁸Nuenu bantu banyi, kanutshinyi, kanuikadi ne bowa. Nkadi mumane kunumanyisha kale, nkadi mumane kunusokoluela, malu adi ne bua kuenzeka. Ke bualu bunudi bamanye bimpe. Ke bualu bunudi mua kujadika nuenu mene. Kudi Mvidi Mukulu mukuabu anyi? Too, kakuena Dibue dikuabu. Meme tshiena mumanye nansha dimue.”

⁹Bantu bonsu badi benza mpingu, bayitendelela, mbantu tshianana. Bintu biabu bidibu banange, kabiena bibambuluisha nansha kakese. Wewe muebeje batendeledi ba mvidie, bivua mvidie yabu yenza, nebafue bundu. Bualu ki mbanji kumona, ki mbanji kumvua, bualu buvua mvidie wabu muenze.

¹⁰Kuenza mvidie, kufuimba lupingu ludi kaluyi mua kukuambuluisha, mmudimu wa muntu mutshimbakane!

¹¹Bantu bonsu badi batendelela mvidie, nebafue bundu. Badi basonga mpingu, badi amu bantu. Badisangishe bonsu pamue, badileje bonsu apa: nebakuatshike bowa, nebafue bundu, pa kumona mvidie kayi wenza bualu!

¹²Mufudi udi ukosa tshitupa tshia tshiamu.[315] Udi utshiela mu kapia, utshifula ne ngindu. Udi ukuata mudimu muende muonsu. Kadi nzala idi imusuma, udi upanga bukole. Padiye upua muoyi bua kunua mayi, udi upungila bikole.

¹³Musongi wa mpingu ya mitshi, udi uteka tshipimu pa mutshi, ufunda tshimfuanyi tshia lupingu ne lupemba. Udi utuadija mudimu ne ntapu wa mutshi, pashishe ubulunguja ne dikangu.[316] Udi usonga lupingu luleja mpala wa muntu, mpala muimpe mutambe. Kadi badi baluteka mu nzubu, kaluyi lunyunga.

¹⁴Badi bakosa mutshi wa sedre, basungula mutshi wa lusanga, nansha wa terebinte. Mitshi eyi ivua kale mu ditu pamue ne mikuabu. Bumue badi mua kukuna mutshi wa pine, bua mvula aumeneshe.

¹⁵Mutshi ewu udi wambuluisha bantu, bua kutemeshabu nawu kapia. Nkunyi yawu badi bayota kapia, balamba nayi biakudia, benza nayi mvidie, udibu batuila mpala panshi. Badi benza nayi lupingu, ludibu batendelela.

¹⁶Badi bela mu kapia tshitupa tshia mutshi awu. Badi balamba natshi munyinyi, badia buukuta. Badi batshiota mu kapia, bamba ne: “Eyi, tudi tuota kapia ketu. Ndisanka kaayi, patudi tumona kapia!”

¹⁷Ne tshitupa tshikuabu tshia mutshi ewu, badi basonga natshi mvidie. Badi badisongela lupingu, bimana kumpala kualu, bantendelela, bamba ne: “Udi mvidie wetu, tupandishe!”

¹⁸Bantu aba badi mu mitu mitupu. Kabena bajingulula tshidibu benza to. Badi ne mesu mabuikila. Kabena basue kumona bimpe. Lungenyi luabu kaluena lukeba bulelela.

¹⁹Muntu nansha umue wa kudibu kena wela meji. Muntu nansha umue kena ne lubatshi, nansha ne lungenyi lua kuamba ne: “Mvua muoshe tshitupa tshia mutshi ewu. Mu mbabula, meme kulamba biakudia, kuosha munyinyi undi ndia ewu. Kadi ne tshitupa tshia mutshi tshidi tshishala, ndi mua kuenza mvidie udibu batendelela anyi? Akia! Nkadi nginamina tshitupa tshia mutshi!”

²⁰Bivua mua kuikala bimpe, batendelele nansha butu! Muoyi wabu mmubatshimbakaje, mubadinge. Mvidie wabu kena ubasungidila to. Kadi bobu mene kabena badiamba ne: “Bushuwa tshitudi natshi mu bianza, tshidi amu mvidie wa dishima.”

²¹“Wewe Izrayele, tshisamba tshia Yakobe, vuluka bimpe ne: Udi muntu wanyi. Ndi mukufuke, bua unkuatshile mudimu. Izrayele, tshiena nkupua muoyi to.[317]

²²Nkadi mukupule buntomboji buebe, ne bilema biebe, bu mudi divuba dipite lubilu, dijimine. Ndi mukupandishi webe. Pingana kundi.”

²³Eyowa, Maweja-Nangila udi muenze bualu. Diulu, leja disanka diebe patoke. Bidi mu kandondu ka buloba, imbayi ne meyi makole. Nuenu mitshi idi mu metu, nuenu kabidi mikuna, elayi mbila ya disanka. Bualu Maweja-Nangila udi upandisha bantu bende. Udi uleja lumu luende, padiye usungidila bena Izrayele.

²⁴Izrayele, Maweja-Nangila udi ukupandisha, udi mukuenze munda mua mamuebe, kabayi banji kukulela, ke udi ukuambila ne: “Meme ndi mufuki wa bionsu bidipu. Meme nkayanyi ndi muteke diulu, mutenteke buloba, tshiyi ne diambuluisha dia muntu.

²⁵Kadi mpindiewu malu onsu, adi bena mbuku bamba, ndi ngakudimuna a patupu. Bonsu badi bamanyisha malu atshidi kumpala, ndi mbapangisha malu abu. Ndi mbenga meji a bena meji, ndi ndeja mudi meji abu a bantu batshimbakane.[318]

²⁶Kadi ndi nkumbaja, bivua bantu banyi bamba.[319] Ndi nkumbaja malu avua bantu, bamvua mutume, bamane kumanyisha. Ndi njadika ne: ‘Bantu nebasombe tshiakabidi mu Yerushalayime. Nengasulule bimana bia tshimenga.’ Ndi ngamba kabidi ne: ‘Nebasulule bimenga bia bena Yuda.’

²⁷Udi utumina mayi manene diyi ne: ‘Kamayi’, udi umisha mayi, udi amu meme.

²⁸Ndi ngambila Koreshe ne: ‘Wewe ke mulami wa mikoku undi musungule. Wewe neukumbaje malu onsu, andi meme musue. Neutume diyi, bua bibakulule Yerushalayime, basulule[320] nzubu wa Mvidi Mukulu.’ ”