Read Tshiluba Yeshaya 47 Bible Online

Yeshaya 47 - Tshiluba bible

Yeshaya 47

¹Maweja-Nangila udi wamba ne: Wewe Babilone,[331] tuluka mu nkuasa webe wa lumu. Somba mu lupuishi. Eyowa, somba panshi pa buloba, bualu kutshiena mukalenga mukaji to. Udi mujimije mianzu yebe, kabatshiena bakuinyika ne: “Babilone, mukaji mulengele”, “Babilone, nsongakaji muimpe”.

²Angata mabue abidi a kupela nawu, upele bukula. Umbushe tshilamba tshidi tshikubuikila mpala. Ubandishe muntumpu uudi muele, uleje bantu mikolu yebe, bua umone mua kusabuka musulu.

³Lekela kumvua bundu. Leja bantu, bamone biudi musokoke. Meme nendisombuele, muntu nansha umue kayi unkandika.[332]

⁴Ndi Musungidi wa bantu banyi. Dina dianyi mMaweja-Nangila muena bukole buonsu, wa tshijila wa bena Izrayele.

⁵Wewe Babilone, somba talalaa, puwa. Sokoma mu miidima, bualu udi mujimije muanzu webe wa “Mukalenga mukaji wa makalenga mangi.”

⁶Mvua mufikile bantu banyi munda. Nenku meme kubadiwula. Meme kubafila mu bianza biebe. Kadi kuvua ne luse nansha lukese. Bakulakaje mene, uvua mubakengeshe bikole.

⁷Uvua uditangila wewe bu mukalenga mukaji, uvua ne bua kudia bumfumu kashidi mu bantu. Kadi kuvua muele meji bimpe, ku malu avua enzeka diba adi. Kuvua nansha muele meji, ku bivua ne bua kuenzeka to.

⁸Nenku teleja mpindiewu, wewe mulunda wa masanka, udi musombe talalaa kuyi ne bualu. Wewe udi udiambila munda ne: “Meme tshiena ne undi mfuanangana nende! Tshiakuikala mukaji mukamba to. Tshiakufuisha bana banyi to.”

⁹Kadi makenga aa abidi, neakukuate amu dituku dimue. Neufuishe bana bebe ne bayebe amu diatshimue. Bionsu ebi nebikuenzekele, nansha baloji ne bena majimbu benza tshinyi ne ntshinyi, bua kukusungidila.[333]

¹⁰Uvua mutekemene lupandu, amu bua bibi biuvua wenza. Uvua wamba ne: “Muntu kena ummona”. Kadi budiambi buebe bua ne: Ndi mumanye, ndi ne lungenyi lutue, ke budi bukutshimbakaja! Ukadi wamba ne: “Meme tshiena ne undi tufuanangana nende!”

¹¹Nenku, makenga neakukuate, audi kuyi mua kuepuka. Kabutu nekapone pambidi pebe, kaudi kuyi mua kunyema. Mvula wa tshipupu neakutokele diakamue, uudi kuyi muelele meji.

¹²Wewe tungunuka ne mbuku yebe, enza anu malu ebe onsu a majimbu. Ke biuvua mulonge bikole, pautshivua muana. Bumue nebikuambuluishe! Bumue nebipate baluishi bebe!

¹³Udi upungila patupu, kuyi upeta tshintu, ukonka badi bamanye malu a mitotu. Bantu aba badi bakosolola diulu mu bitupa, bajoja mabulunge, bamanyisha ku ngondu ku ngondu bidi mua kukukuata, bamueneke, badileje tumone, bavue kukusungidila!

¹⁴Kapia nekaboshe bu bisosa. Ndimi ya kapia neibabutule. Kakakuikala kapia ka makala makese, kadibu mua kuosha diampa, nansha tshiota tshia nkunyi mikese, idibu mua kuota to!

¹⁵Ke muenzelabu bena mbuku bebe, bauvua wangata ne mushinga, bauvua ukonka matuku onsu bituadijile ku buana buebe. Nebaye bonsu, muntu yonsu mu wende njila, bakushiya. Muntu nansha umue kena ushala bua kukusungidila.