Read Tshiluba Yeshaya 48 Bible Online

Yeshaya 48 - Tshiluba bible

Yeshaya 48

¹Nuenu tshisamba tshia Yakobe, telejayi. Nudi nudisua, bua panudi ne dina dia Izrayele, bua panudi ndelanganyi ya Yuda. Nudi nutshipa, nutela dina dia Maweja-Nangila, nutela Mvidi Mukulu wa Izrayele. Kadi kanuena nuditshipilamu, kanuena ne muoyi wa kukumbaja tshinudi nulaya ne mutshipu.

²Nuenu nudi nudisua, bua padibu banuinyika ne: “Bena tshimenga tshijidila.” Nudi nuditemba nuamba ne: tudi tunemenena kudi Mvidi Mukulu wa bena Izrayele, udibu binyika ne: “Maweja-Nangila muena bukole buonsu.” Kadi telejayi bualu ebu:

³Mvua munumanyishe kale malu avua ne bua kuenzeka.[334] Mvua munulayewu, mvua munumanyishewu. Pashishe musangu umue meme kuakumbaja!

⁴Kadi ndi mukumanye, muudi muena tshitunu, muudi tshisamba tshidi tshitomboka, tshisamba tshia mutu mukole bu tshiamu.

⁵Meme kudianza kukuambila malu aa onsu, kaayi manji kukukuata. Meme kukulejawu, kaayi manji kumueneka. Nanku kuambi ne: “Lupingu luanyi ke ludi luenza bualu ebu. Mvidie wanyi wa mutshi, nansha wa tshiamu tshikunze, ke udi ukumbaja bualu ebu.”

⁶Nuenu nuvua bumvue tshimvua mudianze kuamba. Nudi bajadike mpindiewu ne: bionsu bivua amu bikumbane mumvua muambe. Kabiena nanku anyi? Ndi nshima anyi? Kadi bituadije ku lelu, ndi nnumanyisha malu mapiamapia, amvua mulame munda, audi kuyi muelele meji.

⁷Ebu ki mbualu bua kale to. Malu aa neamueneke amu mpindiewu. Kuvua mumvue lumu luawu kumpala kua dituku dia lelu, bua kuambi ne: tukadi bamane kumanya bualu ebu.

⁸Bushuwa kanuvua bateleje, kanuvua basue kumanya, kanuvua bateye matshi bua kumvua. Ndi munumanye ne: nudi bena lunsonge, biangatshile ku buana buenu. Bonsu badi bamanye munudi “bantomboji”.

⁹Kadi bu mundi Mvidi Mukulu, tshiena mua kulonda tshiji tshianyi. Ndi musue bua bantu banemeke dina dianyi. Ke mundi nnufuila luse. Tshiena musue kunubutula.

¹⁰Mvua mukutete. Tshiena mukutete mu kapia, bu mudibu bateta tshiamu tshitoke tshia mushinga mukole. Kadi mvua mukupitshishe mu makenga.

¹¹Pandi muenze nanku, bidi amu bua lumu luanyi, eyowa, amu bua lumu luanyi. Bualu tshiena musue bua bapepeje dina dianyi.[335] Tshiena musue bua bantu bakuabu bangate lumu ludi luanyi meme.

¹²Maweja-Nangila udi wamba ne: Tshisamba tshia Yakobe, teleja, wewe Izrayele undi mubikile, teya matshi. Ndi wa momumue matuku onsu, ndi wa kumpala, ne kabidi wa ndekelu.[336]

¹³Ndi mushindike buloba ne bianza bianyi meme. Ndi mbalula ne diulu. Pandi mbikila diulu ne buloba, diakamue bidi bimueneka kundi.

¹⁴Bena Izrayele, kungilayi muaba umue, telejayi bonsu buenu: Ndi ne mulunda wanyi,[337] neakumbaje meji andi muelele Babilone. Neakuate mudimu, bua bena Babilone bumvue mundi ne bukole. Kadi wa munkatshi muenu, uvua munumanyishe bualu ebu nnganyi? Kakuena nansha umue.

¹⁵Kadi meme nkavua mubuambe. Meme nkayanyi, mvua mubikile muntu ewu. Meme kumufikisha kunu. Nanku tshionsu tshidiye mutuadije, neatshikumbaje.

¹⁶Semenayi pabuipi nanyi, bua nuteleje bualu ebu: mvua ngamba malu onsu patoke, bituadijile ku tshibangidilu. Kabidi katshia malu aa abanga, udi wakumbaja ke meme. (Kadi mpindiewu, Maweja-Nangila Mvidi Mukulu ke udi untuma, umpesha Mueyelu wende[338]).

¹⁷Wa tshijila wa bena Izrayele, Maweja-Nangila, uvua muangate bualu buenu ne manza abidi. Ke yeye udi ukuambila ne: “Meme Maweja-Nangila ndi Mvidi Mukulu webe. Meme ndi nkulongesha, malu adi ne bua kukulengelela. Meme ndi nya nebe mu njila uudi ne bua kulonda.

¹⁸Eyi! bu wewe munteleje bimpe, bu wewe mukumbaje tshimvua mukutumine diyi! Nanku musulu wa diakalenga uvua mua kukupuekela. Lupandu luvua mua kufika kuudi, bungi bu mavuala a mayi manene!

¹⁹Ndelanganyi yebe ivua mua kuvulangana, bu tutete tua lusenga ku muelelu wa mayi manene. Meme tshivua mua kuyibenga. Dina diayi kadivua mua kujimina kumpala kuanyi.”

²⁰Patukayi mu Babilone.[339] Nyemayi lubilu lukole. Nuele mbila ya disanka, numanyishe bualu ebu, too ne ku nshikidilu kua buloba. Buambayi, bumanyishayi, nuambe ne: “Maweja-Nangila mmuangate bualu bua Izrayele, muntu wende, ne manza abidi.”

²¹Udi mufile bena diende mu tshipela. Nyota kayena ibasuma. Bua kubanuisha, udi upatula mayi mu lubuebue. Udi upanda lubuebue, mayi kupatuka.

²²Kadi Maweja-Nangila udi wamba ne: diakalenga edi, kadiena bua bantu badi kabayi bitaba, kabayi balama mikenji.[340]