Read Tshiluba Yeshaya 5 Bible Online

Yeshaya 5 - Tshiluba bible

Yeshaya 5

¹Ndi musue kuimbila mulunda wanyi musambu, musambu wa budimi buende bua mvinyo. Mulunda wanyi uvua ne budimi bua mvinyo, pa mukuna wa buloba buimpe.

²Kusekunaye budimi bimpe, kumushaye ne mabue. Kukunaye ne mionji mimpe. Bua kulama bimpe budimi, kuasayemu nzubu wa tshialaminu. Kuibakaye ne tshikaminu tshia tumuma.[26] Mulunda wanyi uvua mutekemene kupeta tumuma tua mvinyo tulenga. Kadi budimi kupatula tumuma tua bululu.

³Ke mulunda wanyi kuamba ne: “Nuenu bantu badi basomba mu Yerushalayime, ne nuenu badi basomba mu Yuda, nukose tshilumbu, tshidi pankatshi panyi ne budimi buanyi.

⁴Tshingenzela kabidi budimi buanyi, tshimvua tshiyi muanji kuenza ntshinyi? Meme kutekemena tumuma tua nsongu, kadi bobu kukuama amu tua bululu!

⁵Kadi mpindiewu, ndi nnuambila tshindi musue kuenzela budimi buanyi. Nentule lupangu lua meba lumvua muaseku, nyama neidiemu. Nengupule tshimana tshia lupangu. Bantu badi bapita ne njila nebabudiatakaje.

⁶Nebushale lububa: muntu nansha umue kena mua kusolela budimi abu, muntu kena mua kubuipidila kabidi Meba ne mingonga nebitolokemu. Nenkandike mavuba, bua mvula kalokedi kabidi mu budimi ebu.”

⁷Budimi bua mvinyo bua Maweja-Nangila muena bukole buonsu, ntshisamba tshia bena Izrayele. Mionji mimpe ivua imusankisha, ntshisamba tshia bena Yuda. Maweja-Nangila uvua mutekemene ne: bantu bende nebenzelangane bimpe, kadi badi amu bakengeshangana. Uvua mutekemene ne: bantu bende nebenze amu bidi bimpe. Kadi miaba yonsu, badibu bakengesha, badi badila amu miadi ya kanyinganyinga.[27] (Tun. 8-24: 10.1-4)

⁸Bantu bonsu badi basakidila nzubu ku mikuabu, balamika madimi ku makuabu, mbena diakabi. Ku kakese ku kakese nebangate miaba yonsu. Nebashale bobu nkayabu mu ditunga!

⁹Mvua mumvue Maweja-Nangila muena bukole buonsu uditshipa, wamba ne: “Ndi nditshipa ne: nzubu yonsu eyi nebayinyangakaje. Miaba minene yonsu idi milengeja bimpe, kabakuyisomba kudi bantu.

¹⁰Budimi bua mvinyo bua metre nkama isatu, kabuena bupatula litre makumi atanu ya maluvu to. Muntu udi umiamina kilo makumi atanu ya ntete, neanowe kilo amu dikumi.”

¹¹Bantu bonsu badi bafuilakana maluvu makole dindadinda, banua too ne mudi butuku buila, bakuatshika, mbena diakabi.

¹²Bisanji, lunzenze, ngoma ne nshiba, bidi bidila, padibu banua maluvu, kabayi balekela. Kadi kabena belangana meji ku bidi Maweja-Nangila wenza, kabena bavuluka mudimu udiye ukuata.

¹³Ke padi Maweja-Nangila wamba ne: “Tshisamba tshianyi, nebaye natshi mu bupika, bualu katshiena tshiumvua bualu nansha bumue. Bamfumu batshi nebafue nzala, bantu batshi bonsu nebafue nyota.”

¹⁴Bakadi bunzulule muaba wa bafue, mbaudiundishe bikole. Bamfumu ne bena Yerushalayime nebabuelemu bonsu, batshikale munkatshi mua tshibilu, basanka.

¹⁵Nanku bantu bonsu nebiname badia buloba. Nansha muntu muena ditambisha, neinyike mesu panshi.

¹⁶Maweja-Nangila muena bukole buonsu nealeje bukole buende. Nealongolole bionsu amu bimpe. Mvidi Mukulu wa tshijila nealeje tshijila tshiende, padiye ukosa nsambu pa yoyi.

¹⁷Mu misesu ya mu tshimenga nemuikale tshisuku. Mikoku neidiemu bisosa, amu bu bidiyi idia mu mpata. Bana ba mbuji ba manyi,[28] nebakebemu biakudia biayi.

¹⁸Bantu badi badikebela dinyoka, bualu badi bakoka malu abu mabi, mudi ngombe ukoka ditempu dia bujitu. Bonsu aba mbena diakabi.

¹⁹Bantu aba badi bamba ne: “Maweja-Nangila enze lukasa tshionsu tshidiye musue kuenza. Tudi basue kutshimona. Mvidi Mukulu wa tshijila wa bena Izrayele enze tshionsu tshidiye muelele meji, tudi basue kutshimanya!”

²⁰Bantu bonsu badi bamba bualu buimpe ne: mbubi, bamba bualu bubi ne: mbuimpe, bamba butoke ne: mmidima, bamba midima ne: mbutoke, bamba bintu bisheme ne: bidi ne bululu, bamba bidi ne bululu ne: mbisheme, mbena diakabi.

²¹Bantu bonsu badi baditangila bu bena meji, ne bena lungenyi, mbena diakabi!

²²Bantu bonsu badi bilobu amu bua kukuatshika maluvu, badi ne bukitu amu bua kusambakaja mala, mbena diakabi!

²³Badi babingisha muena tshibawu, bualu udi ubakosa mishiku. Badi bapisha muntu udi kayi ne bualu.

²⁴Nenku bantu aba nebabutuke, mudi kapia kuosha bisosa, mudi ndimi ya kapia ilakuka ku bisuku. Nebabutuke bonsu mudi miji ibola, mudi bilongu biuma, bipona panshi. Bualu bavua badiwule dilongesha, dia Maweja-Nangila muena bukole buonsu, babenge diyi dia Mvidi Mukulu wa tshijila wa bena Izrayele.

²⁵Nanku Maweja-Nangila mmufikile bantu bende munda. Mmubakanyine, mubatume. Mikuna imona nanku, kuzakalayi. Bitalu bia bantu kushala panshi mu misesu, bu butu bua kuimansha mu dyala. Kadi tshiji tshia Maweja-Nangila katshiena tshijike to. Udi amu ukanyina bantu bende.[29]

²⁶Maweja-Nangila udi wasa tshimanyinu, ubikila tshisamba tshidi kule.[30] Udi wela monzu ku ntengu ya buloba, mudi muntu ubikila mbua. Monayi tshisamba etshi tshidi tshifuma kule, tshienda lukasa lukasa, tshiambuluja bua kufika!

²⁷Munkatshi mua tshisamba atshi, kamuena muntu mupungile, kamuena udi ukoka makasa panshi, nansha udi ubungila ne tulu. Kakuena udi ulaala, nansha udi musulule mukaba, nansha udi musulule nshinga ya tshisabata.

²⁸Mikete yatshi idi minona bimpe, mata adi mamana kunana. Tubalu tuatshi, tudi ne bikonu bikole bu mabue. Nkata ya matempu atshi, idi inyema lubilu mifuane mvunde.

²⁹Bibingu bia mvita bidibu beela kudi bena tshisamba atshi, bidi bu nyama wa ntambue mukaji ukungula, bu nyama wa lonji udila ukuata nyama, uya kumuteka muaba musunguluke, kakuyi udi mua kumunyenga.

³⁰Dituku adi, nebabuele mu ditunga dia bena Izrayele, benda beela bibingu bikole, bu biona bia mayi manene. Bantu nebatangile mu ditunga, kadi kabakumona tshintu to, amu midima mikole, ne mavuba adi abuikila butoke.