Read Tshiluba Yeshaya 57 Bible Online

Yeshaya 57 - Tshiluba bible

Yeshaya 57

¹Bantu bakane badi babutuka, kakuyi muntu udi usumpakana bualu buabu. Bantu bimpe badi bafua mu mvita, kakuyi muntu udi ubatangila. Kadi ndi mbapatula mu bianza bia bantu badi babakengesha.

²Nebabuele mu bupole buanyi. Nanku bantu badi balonda njila wa buakane, nebamone mua kuikisha talalaa.

³Semenayi apa, nuenu, bana ba mukaji muena mbuku, tshisamba tshia bena buendenda ne bena buenzayi.[383]

⁴Unudi nuseka nnganyi? Unudi nuela bibingu nnganyi? Unudi nuela kadimi nnganyi? Kanuena bana badi bantombokela anyi? Kanuena tshisamba tshia bena dishima anyi?

⁵Nudi nuenda buendenda muinshi mua mitshi minene, miaba yonsu idi mitshi ya dileji.[384] Ku muelelu wa misulu, muinshi mua mbuebue, nudi nulambula mvidie bana.

⁶Mabue a busenu a mu musulu,[385] ke tshiuma tshienu tshinudi nutendelela. Anu mabue awu ke anudi nulambula, nunuisha maluvu, ke anudi nulambula bia pa madimi. Ndi nnuebeja ne: bionsu ebi bidi mua kunsankisha anyi?

⁷Udi udilongoluela bulalu pa mikuna mitumbuke yonsu. Popu apu ke paudi ubanda bua kulambula milambu.

⁸Udi mukudike lupingu lua mvidie webe kunyima kua tshiibi tshiebe tshia ku nzubu. Udi uvula bilamba biebe, meme muikale kule. Udi ubanda pa bulalu buebe, ulongoluelamu muaba munene. Udi usumba balume baudi munange, usanka bua kulala nabu pa bulalu abu, wewe kumona bualu![386]

⁹Udi udilaba mafuta, udiela ne manananshi a mupuya muimpe, bua kuya kutendelela mvidie Meleke.[387] Uvua mutume bantu mutantshi mule ne mikenji. Wewe kubatuma too ne ku muaba wa bafue.

¹⁰Wewe kupungila ne luendu luebe lua kukeba mvidie. Kadi kuena muambe ne: “Mbikumbane.” Wewe kupeta tshiakabidi dikanda, kuyi uvuluka dipungi diuvua nadi to.

¹¹Udi mukukuatshishe bowa, uudi utshina bikole nanku, bua wewe kunshima, bua wewe kubenga kunzuluka, bua wewe kubenga kungangata ne mushinga, nnganyi? Bu mundi mupuwe mutantshi mule, kuena ungangata kabidi ne mushinga. Udi wela meji ne: biudi wenza mbiakane anyi?

¹²Kadi meme nensokoluele bantu bubi bua bionsu biudi muenze. Mvidie yebe ayi kayakukupetesha kantu nansha kamue.

¹³Paudi wela lubila, ulomba diambuluisha, mvidie yebe yonsu ayi ikupandishe, tumone! Kadi mvunde neaye nayi, lupepele neluyikombe! Amu bantu badi batekemena kundi, nebapiane ditunga, nebasombe pa mukuna wanyi wa tshijila.[388]

¹⁴Maweja-Nangila udi wamba ne: “Longololayi njila, koleshayi, pandayi njila, umbushayi mu njila bintu bionsu bidi ne njiwu, bantu banyi benda kamuyi lutatu.”

¹⁵Udi ku mutu kua bintu bionsu, udi usomba mu nzubu wa kashidi, udibu binyika ne: Wa Tshijila, ke yeye udi wamba ne: “Meme Mvidi Mukulu wa tshijila, ndi nsomba mulu. Kadi ndi ngenda kabidi ne bantu badi mu makenga, badi ne muoyi wa bupuekele. Nanku nempingajile muena bupuekele muoyi, nempingajile mukengi disanka.

¹⁶Bualu tshiena ntandisha bantu banyi, tshiena mbafikila munda kashidi. Tshianana bantu banyi bonsu bandi mufuke, nebajimine kashidi.

¹⁷Ntupakanyi ya bena Izrayele, ivua mianji kumfikisha munda.[389] Mvua mubanyoke ne tshiji. Tshivua musue kubatangila kabidi to. Kadi bobu bavua batungunuka amu ne dienza bibi, muvua muoyi wabu ubalongesha.

¹⁸Ndi mumanye bimpe mudibu benza. Kadi meme nembenzele nenku: Nembalengeje, nembalombole mu njila, nembakoleshe ku muoyi! Bantu bavua bavuala bilamba bia madilu,

¹⁹nembeleshe mbila ya disanka. Nempandishe, bushuwa nempandishe bantu bonsu, badi kule ne badi pabuipi.[390] Ke mundi ngamba meme, Maweja-Nangila.”

²⁰Kadi bantu babi, badi bu mayi manene adi ela mavuala, kaayi ne mushindu wa kubatama. Mayi a nanku adi muwule ne binyindanyinda kabidi ne bintu bibi bionsu tente.

²¹Mvidi Mukulu wanyi udi wamba ne: “Lupandu kaluena bua bantu babi[391] to.”