Read Tshiluba Yeshaya 7 Bible Online

Yeshaya 7 - Tshiluba bible

Yeshaya 7

¹Tshikondu tshivua Akaze, muana wa Yotame, ne muikulu wa Uziya, mukalenga wa bena Yuda, mukalenga Resine wa bena Arame kufika ne Peka, muana wa Remalya, uvua mukalenga wa bena Izrayele, bua kuluisha tshimenga tshia Yerushalayime. Kadi kabavua batshikuate to.[38]

²Bantu kumanyisha Akaze, mukalenga waku ndelanganyi ya Davide, ne bena lubanza luende ne: bena Arame mbase mitanda yabu mu buloba bua bena Efrayime.[39] Bualu abu kutonda Akaze ne bantu bende. Kutuadijabu kunyungakana, bu mitshi ya muitu idi lupepele lunyungisha.

³Maweja-Nangila kuambila Yeshaya ne: — Angate muanebe Sheyare-Yashube, uye kumonangana ne Akaze. Udi ku ndekelu kua mukidi wa mayi adi afuma ku tshiina tshia ku mutu. Nulonde amu njila wa ku budimi bua Basukudi ba bilamba.[40]

⁴Wambile Akaze ne: “Udimuke! Kuzakadi, kutshinyi tshiji tshia Resine wa bena Arame ne tshia Peka, muana wa Remalya. Badi amu bu bishelele bia nkunyi bibidi bidi bifuima.

⁵Ndi mumanye mudi bena Arame, Peka, ne bena mvita ba bena Efrayime, basue kukuluisha. Bavua bamba ne:

⁶‘Tuyayi kuluisha bena mu bukalenga bua Yuda! Tubatshinyishe, tukuate ditunga diabu, mbapeshe muana wa Tabeyele, bua ikale mukalenga wabu.[41]’

⁷Kadi Maweja-Nangila Mvidi Mukulu udi wamba ne: ‘Ebi kabiena mua kuenzeka to.

⁸Bualu, Damase udi tshimenga tshikulu tshia bena Arame, Resine udi mukalenga amu wa bena Damase. Samariya udi tshimenga tshikulu tshia bena Efrayime, Peka udi mukalenga amu mu Samariya. Kadi nkushale amu bidimu makumi asambombu ne bitanu, bua tshisamba tshia bena Efrayime kubulukatshi.’ Panudi kanuyi nushindika muoyi wenu kudi Maweja-Nangila, kanuakuikala bantu bashindame to.”

¹⁰Maweja-Nangila kumanyisha kabidi Akaze ne:

¹¹— Lomba tshimanyinu kudi Maweja-Nangila, Mvidi Mukulu webe, nansha tshiotshi tshifuma ku kandondu ka bafue, nansha tshifuma muulu muamua.

¹²Kadi Akaze kuandamuna ne: — Too, tshiena ndomba tshintu nansha. Tshiena musue kuteta Maweja-Nangila.

¹³Nanku Yeshaya kumuamba ne: — Wewe Akaze ne bena diku diebe, ndelanganyi ya Davide, ntelejayi. Nudi nusuya bantu bikole, nudi basue kusuya kabidi ne Mvidi Mukulu wanyi anyi?

¹⁴Nanku Maweja-Nangila nkayende neakupeshe tshimanyinu: nsongakaji neimite difu. Nealele muana wa balume. Neamuinyike Emanuwele, mmumue ne: “Mvidi Mukulu udi netu.[42]”

¹⁵Muana neanue mabele, neadie buitshi, too ne diba diamanyaye mua kusunguluja bualu buimpe ne bubi.

¹⁶Bangabanga ne muana ewu kusunguluja bualu buimpe ne bubi, buloba bua bakalenga babidi baudi utshina, nebushale munda mutupu, kamuyi bantu.

¹⁷Kadi Maweja-Nangila neanukengeshe, wewe ne bantu bebe, ne bena diku diebe dia bukalenga. Nenubuele mu dikenga dinudi kanuyi banji kumona, katshia bukalenga bua Izrayele babulukangana ne bukalenga bua Yuda. — Mukalenga wa bena Ashure neakumbaje bionsu ebi.

¹⁸Dimue dituku, Maweja-Nangila neele kashiba, abikile njiji ya ku muaba udi musulu wa Nile ubuelela mu mayi manene, ne mbulubulu ya mu ditunga dia bena Ashure.

¹⁹Bishi bionsu ebi nebifike, nebikile mu mbuwa, mu milundu ya mbuebue, mu bipuka bia meba, ne mu bijibajiba bionsu.[43]

²⁰Dituku adi, Maweja-Nangila neanubeye nsuki, ne miosa ya pambidi ponsu, ne miedi, ne kapaya kadiye usomba, dia muamua dia musulu wa Perate.[44] Kapaya kende aka, ke mukalenga wa bena Ashure.

²¹Dituku adi, muntu yonsu, neamune amu ngombe umue, ne mbuji ibidi.

²²Kadi nyama ayi neimupetele mabele makumbane, bua bamone mua kunua mabele. Nanku bonsu badi bashala ne muoyi mu ditunga, nebanue mabele, badie ne buitshi.

²³Dituku adi kabidi, budimi buvua ne mionji ya mvinyo tshinunu, buvuabu mua kupana ku nkanu mitoke ya mushinga mukole tshinunu, nebushale amu meba ne mingonga.

²⁴Nanku nebabuelemu ne mata ne mikete, bua kuta nyama. Bushuwa, ditunga dijima nedikale amu meba ne mingonga.

²⁵Bantu kabakuya kabidi kudima ne lukasu pa mikuna. Nebatshine meba ne mingonga.[45] Nemushale amu mpata ya kudisha ngombe ne mikoku, muaba udi ngombe ukeba biakudia, muaba udi mikoku inayila.