Read Tshiluba Yeshaya 8 Bible Online

Yeshaya 8 - Tshiluba bible

Yeshaya 8

¹Bua kukumbaja diyi divua Maweja-Nangila mungambile, meme kuangata tshibasa tshinene tshia kufunda. Ke meme kufundapu ne maleta manene avua bantu bonsu mua kubala, miaku eyi ne: “Pawulayi lubilu, Ibayi lukasa.”

²Meme kuleja Uriya, mutuangaji, ne Zekarya, muana wa Yeberekya, tshibasa atshi, bua bamone bajadike bimvua mufunde.

³Pashishe meme kubuelela muena kuanyi mu nzubu. Yeye kabidi uvua muambi wa Mvidi Mukulu mumue nanyi. Kuimitaye difu, kulelaye muana wa balume. Nenku Maweja-Nangila kungambila ne: — Umuinyike dina diende ne: Pawulayi lubilu, Ibayi lukasa.

⁴Bualu muana ewu kayi muanji kumanya mua kubikila “Tatu,” nansha “Mamu,” nebatuadile mukalenga wa bena Ashure bintu bisuabu bapawule mu Damase, ne bisuabu biibe mu Samariya.

⁵Maweja-Nangila kungambila tshiakabidi ne:

⁶— Tshisamba etshi tshidi tshibenga mayi a mu mukidi wa Shilo, adi apueka kaayi muenji. Tshidi tshiteketa mu maboku, pa kumona bakalenga babidi aba: Resine ne Peka.[46]

⁷Nenku nembueje mu ditunga diatshi, mayi a musulu wa Perate, mayi mapite bungi, a muenji mukole kabidi. Ke mukalenga wa Ashure, ne tshiluilu tshiende. Mayi a musulu wa Perate, neapasalale dia muamua ne dia munu.

⁸Mayi a musulu awu, neabuele miaba yonsu mu ditunga dia bena Yuda. Neakuate bantu too ne mu nshingu. Misapa yawu neitangalake, ibuikile ditunga diebe dijima, Emanuwele.[47]

⁹Bena bisamba bia bende, nansha nuenu batua ndondu,[48] nenutshine amu kutshina. Nuenu bena matunga adi kule, telejayi: nansha nuenu ne bia mvita, bowa nebunukuate.

¹⁰Elayi meji a kuenza bualu kampanda, kadi kanuakubukumbaja munudi basue. Umvuanganayi, kadi kanuena ne tshinuenza. Bualu Emanuwele udiku, mmumue ne: Mvidi Mukulu udi netu.[49]

¹¹Maweja-Nangila kunkuata ku tshianza, ungambila ne: kulondi malu a tshisamba etshi. Uvua umbela ne:

¹²“Kuidikiji bantu aba, padibu bakula. Kutedi buntomboji, padibu babutela. Kuena ne bua kutshina tshidi tshibakuatshisha bowa. Kuena ne bua kuzakala nanku.”

¹³Manyayi amu ne: meme Maweja-Nangila muena bukole buonsu, ndi wa tshijila. Amu meme ke wakunemeka nkayanyi, amu meme ke unudi ne bua kuzakela.[50]

¹⁴Meme ndi muaba udi bantu mua kunyemena. Kadi ndi kabidi dibue, dia kukuma dikasa kudishinda.[51] Ndi dibue didi dishinda makalenga onsu abidi, bua bena Izrayele ne bua bena Yuda. Ndi buteyi budi bukuata bena mu Yerushalayime.

¹⁵Bantu ba bungi nebatuute dikasa ku dibue, badishinde, batshibuke nyima. Bantu ba bungi nebabakuate mu buteyi emu, kabayi mua kusulukamu to.

¹⁶Ndi nsokoka bivua Maweja-Nangila mungambile. Ndi ndama bimpe bionsu bindi ne bua kuamba. Ndi mbiambila amu balongi banyi.[52]

¹⁷Ndi muindile Maweja-Nangila. Mpindiewu udi ulengulula ndelanganyi ya Yakobe. Kadi ndi amu ndama lutulu, ntekemena kudiye.

¹⁸Meme ne bana badi Maweja-Nangila mumpeshe, tudi bimanyinu bidi bilongesha bantu mu Izrayele malu a kudi Maweja-Nangila muena bukole buonsu, udi usomba mu nzubu wende pa mukuna wa Siyone.[53]

¹⁹Bantu bakuabu badi bamba ne: “Nukonke bakishi malu, bualu badi batumanyisha malu adi kaayi manji kuenzeka. Nukonke bena mbuku, bakuambile malu ku ditshi. Bualu tshisamba tshionsu tshidi tshikonka mvidie yatshi, tshikonka bakishi buakulongolola malu a bantu badi panu.” Padibu bakuambila nanku,

²⁰wandamuna ne: “Tuetu tudi bualu amu ne mikenji, kabidi ne malongesha a Maweja-Nangila.” Muntu udi kayi ulonda mukenji awu, kena utshisha bufuku to.[54]

²¹Nebapite mu ditunga[55] baletele ne nzala. Pabapita nzala, nebapende mukalenga wabu, ne Mvidi Mukulu wabu. Bantu nebatangile kulu,

²²nebatangile panshi, kadi nebamone amu dibungama, midima ne makenga. Nebabuele mu midima idi yenza bowa.[56]

²³Muntu mumane kubuela mu bufuku ebu, kakupatukamu nansha.[57] Kale Maweja-Nangila uvua mudiwule buloba bua Zebulone ne Naftali. Kadi mu matuku adi kumpala, neatumbishe maloba aa, biangatshile ku njila udi ulonda mayi manene, ne ku ditunga didi luseke ludi diba dipatukila lua Yardene, ne ku buloba bua Ngalileya, muaba udi benyi basombe.[58]