Read Tshiluba Yeshaya 9 Bible Online

Yeshaya 9 - Tshiluba bible

Yeshaya 9

¹Bantu badi benda mu miidima, badi bamona bukenke bukole. Badi basa mu ditunga dia mufitu, butoke budi bubakenkela.

²Maweja-Nangila, wewe kubasankisha bikole,[59] kuvudija musangelu wabu! Badi basanka kumpala kuebe, mudi bantu batshionkomoka matuku a kunowa, mudibu babanyangana bivuabu bapawule mu mvita, beela mbila ya disanka.

³Bualu udi utshibula lelu mujuwu wa bupika, wa bujitu bunene butambe, mutshi udi ubashila mputa pa makaya, mulangala udi muena tshinyangu ubakuma nawu. Ke muuvua muenze kale, pauvua mutshimune bena Madiyane.[60]

⁴Bisabata bia baluishi bidi bizakaja buloba, binkutu biabu binyanguke ne mashi,[61] nebabioshe mu kapia, babishidisha.

⁵Eyowa, mbatulelele muana, mbatupeshe muana wa balume. Mvidi Mukulu mmumuteke mukalenga. Nebamuinyike ne: “Muena meji wa dikema, Mvidi Mukulu wa bukole, Tatu wa kashidi, Mukalenga muana wa bupole.”

⁶Bukalenga buende nebutangalake, bena ditunga bende nebasombe mu bupole kashidi. Neashindame mu nkuasa wa lumu lua Davide, mpindiewu ne tshiendelele. Bumfumu buende nebutungunuke kashidi, bualu udi ulongolola malu bimpe, amu mudi Mvidi Mukulu ujinga. Ke bidi Maweja-Nangila muena bukole buonsu ukumbaja, bualu udi utunanga, kayi upungila.[62]

⁷Maweja-Nangila uvua mulumbuluishe ndelanganyi ya Yakobe. Kupishaye bukalenga bua Izrayele.[63]

⁸Bantu bonsu badi mu buloba bua Efrayime, ne badi basomba mu tshimenga tshia Samariya,[64] mbamanye bualu ebu. Kadi badi amu baditambisha, bamba ne:

⁹“Nzubu ya tushole ivuabu bupule, nebibakulule ne mabue masonga! Nansha bobu bashimbule makunji a mitshi ya sikomore, ki mbualu to. Netupingaje pa mutu pawu makunji a mitshi ya sedre!”

¹⁰Nenku Maweja-Nangila mmujule Resine, muluishi wabu;[65] mmusonsole baluishi babu nseke yonsu:

¹¹kumpala kuabu kudi bena Arame, kunyima kuabu bena Peleshete. Bantu bonsu aba bakanyanga bena Izrayele bikole, babanyenga buloba buabu. Kadi tshiji tshia Maweja-Nangila katshiena tshijika. Utshidi amu ubakanyina.

¹²Ke muvua Mvidi Mukulu munyoke bantu bende nanku. Kadi bena Izrayele, nansha bobu bamone bionsu abi, kabena bapingane kudi Mvidi Mukulu wabu to. Kabena balonda tshidi Maweja-Nangila muena bukole bonsu musue.

¹³Nenku Maweja-Nangila neanyoke bena Izrayele bonsu, bamfumu ne bantu babu, amu dituku dimue, amu mudibu bakose mutu ne mukila.

¹⁴Bakulu ne bantu banene ke mutu, bambi badi bashima ke mukila.

¹⁵Balombodi ba bantu aba badi babapambula. Pa mutu pa kubaludika, badi babatangalaja.[66]

¹⁶Ke padi Maweja-Nangila kayi mua kupandisha bansongalume babu ku mvita.[67] Kena mua kufuila bakaji bakamba ne bana ba nshiye luse. Bualu bantu bonsu badi benza bibi, babenga diyi dia Mvidi Mukulu, bakula bu bantu badi kabayi bangata Mvidi Mukulu ne mushinga. Kadi tshiji tshia Maweja-Nangila, katshiena tshijika. Utshidi amu olola tshianza bua kunyoka.

¹⁷Eyowa, bubi budi butampakana kudi bantu bu kapia katua ku tshisuku, kalambuluka mu ditu, kajuula muishi mupite bungi bu mavuba.

¹⁸Tshiji tshia Maweja-Nangila muena bukole buonsu, tshidi bu kapia kadi kosha ditunga. Bantu ba mu ditunga badi bapia bu nkunyi, muntu nansha umue kena utangila muanabu to.[68]

¹⁹Badi bangata bintu ku dia balume, nzala yabu kayiyi ijika. Badi bangata binga ku dia bakaji, kabayi bukuta. Muntu yonsu udi ubutula mukuende.[69]

²⁰Bisamba bivua bibundangana, tshia Menashe kubunda tshia Efrayime, etshi kabidi kubunda tshia Menashe. Bionsu bibidi ebi kubunda tshia Yuda. Kadi tshiji tshia Maweja-Nangila katshiena tshijika. Tshianza tshiende tshitshidi tshiela mulu.