Read Tshiluba Mikenji ya bena Levi 11 Bible Online

Mikenji ya bena Levi 11 - Tshiluba bible

Mikenji ya bena Levi 11

¹Maweja-Nangila kuambila Moshe ne Arone

²bua bamanyisha bena Izrayele mikenji eyi[42]: “Ku nyama yonsu ya panu, nudie amu nyama eyi:

³Nudi mua kudia nyama idi ne mikonu mipanduluke, mikale ibiola bintu mukana, ibidia tshiakabidi.

⁴Kadi kanuena mua kudia nyama idi amu idiululula, nansha idi amu ne bikonu bipanduluka, bu mudi: — kamelu kadi kadia kadiululula, kadi kakena ne bikonu bipanduluke to;

⁵— kanyama ka damane,[43] kadi kadia kadiulula, kakayi ne bikonu bipanduluke;

⁶— kalulu ka mpata, kadi kadiululula, kadi kakena ne bikonu;

⁷— ngulube, bualu udi ne mikonu mipanduluke, kadi kena upingaja bintu mukana, ubidiululula.

⁸Nanku kanuena mua kudia munyinyi wayi, nansha kuyilenga padiyi mifue. Numanye ne: idi ne mikiya.

⁹“Ku nyama yonsu idi mu mayi, mu majiba, mu mayi manene ne mu misulu, nudi mua kudia minyinyi idi ne misalala ne mamba.

¹⁰Kadi minyinyi yonsu ya mu mayi idi kayiyi ne misalala nansha ne mamba, kanuyidi to, nansha tusha tudi tuvuandulula mayi, nansha tunyinyi tukuabu tua mu mayi.

¹¹Numanye ne: minyinyi ayi idi ne mikiya. Kanuena mua kuyidia, nansha kuyilenga padiyi mifue.

¹²Nanku, minyinyi yonsu ya mu mayi idi kayiyi ne misalala nansha ne mamba, kanuena mua kuyidia to.

¹³“Kanuena mua kudia nyunyi eyi to: tshiminyi, mukanku, kabemba ka mvulu,

¹⁴ntuba, nansha nyunyi idi mifuane mukanku,

¹⁵tshikololu,

¹⁶kasonga nyunyi, mfiondu, mukuekue, nansha nyunyi idi mifuane kabemba,

¹⁷tshipungulu, tshiowa, kakutukutu,

¹⁸mukute, kakololu, nkumbikumbi,

¹⁹kalama ngomba, kasongu mule, miena kasuba, nansha mudima.

²⁰“Kanuena mua kudia bishi bidi ne masala, bikale kabidi ne mapangu anayi.

²¹Kadi ku bintu bionsu bidi ne masala, bikale kabidi ne mapangu anayi, nudi mua kudia anu bidi ne mikolu, bitupika.

²²Ke mpasu yonsu, nsua, bintunta ne mintuntu.[44]

²³Nanku kanuena mua kudia bishi bikuabu bionsu bidi ne masala, kabidi ne mapangu anayi. Numanye ne: bidi ne mikiya.

²⁴“Nyama mikuabu idi ipetesha muntu mikiya too ne ku dilolu, padiye uyilenga, yoyi mimane kufua.

²⁵Padi muntu wambula nyama ayi mimane kufua, nansha yeye musukule bilamba biende, utshidi amu ne mikiya too ne ku dilolu.

²⁶Nyama idi ne mikiya idi nunku: — nyama idi kayiyi ne mikonu mipanduluke, kayiyi ipingaja bintu mukana, ibidia kabidi. Padi muntu ulenga nyama eyi, udi upia mikiya;

²⁷— nyama yonsu idi yenda pa munda mua diikasa.[45] Padiyi mifue, muntu muyilenge, udi upia mikiya.

²⁸Muntu yonsu udi uyambula, padiyi mifue, nansha yeye musukule bilamba biende, utshidi anu ne mikiya too ne ku dilolu.

²⁹“Ku tunyama tukese tudi tuenda panshi, numanye ne: tudi ne mikiya tudi nunku: tshibulebule, mpuku, misodi ya mishindu yonsu,

³⁰dibula mutshi, dimemba, tshimpulumunzu, lomba ne lungonyonyi.

³¹Nanku, numanye ne: tunyama etu tuonsu tudi ne mikiya. Padi tunyama etu tufua, muntu utulenga, neapie mikiya too ne ku dilolu.

³²Kadi padi kanyama kamue ka ku tunyama etu kapona, kafuila mu tshintu bu mudi: luvu, tshilamba, tshiseba nansha tshibombi, badi ne bua kusukula tshintu atshi. Kadi, tshidi ne mikiya too ne ku dilolu, pashishe mikiya idi ijika.

³³Padi kanyama kamue ka ku tunyama etu kapona mu luesu lua dibumba, bintu bionsu bidi mu luesu bidi bipia mikiya. Luesu alu badi ne bua kulushipa.

³⁴Padi mayi avua mu luesu alu masampukila ku tshintu tshidibu mua kudia nansha kunua, tshintu atshi tshidi ne mikiya, nansha tshiotshi mu luesu lua mushindu kayi.

³⁵Padi kanyama kafue kaponena pa tshintu kampande, bu mu ditshiwa, tshintu atshi netshipie mikiya. Mbimpe kutshinyangakaja, bualu ntshipie mikiya.

³⁶Padi kanyama kamue kafue, kaponena mu mpokolu nansha mu tshiina tshia mayi, mayi awu kaena ne bualu to, adi mimpe. Kadi muntu udi upatula kanyama kafue aku mu mayi, neapie mikiya.

³⁷Padi kanyama kafue kaponena pa ntete ya kukuna, ntete ayi kayena ne bualu to, idi anu mimpe.

³⁸Kadi, padi kanyama aka kafue, kaponena mu ntete mimane kubombeka mu mayi bua kuyidia, ntete ayi idi ipia mikiya.

³⁹“Padi nyama wa ku inudi nudia mudifuile, muntu mulenge nyama awu neapie mikiya too ne ku dilolu.

⁴⁰Muntu udi udia munyinyi wa nyama awu, nansha yeye musukule bilamba biende, udi amu upia mikiya too ne ku dilolu. Muntu udi wambula nyama awu mufue, nansha yeye musukule bilamba biende, utshidi ne mikiya too ne ku dilolu.

⁴¹“Nanku tunyama tuonsu tukese tudi tuenda panshi, kanuena mua kudia munyinyi watu to.

⁴²Bintu bidi bilandala, nansha bidi bienda ne mikolu inayi, nansha ne ya bungi, kanuena mua kubidia to.

⁴³Nudimuke, kanulengi bintu ebi, bualu nudi mua kupia mikiya. Kanudinyangi.

⁴⁴Meme ndi Maweja-Nangila Mvidi Mukulu wenu. Nuikale bantu ba tshijila, bualu meme ndi wa tshijila. Kanudinyangi nuenu ne bintu ebi bibi, bidi bilandala panshi, bualu nudi mua kupia mikiya.

⁴⁵Meme ndi Maweja-Nangila, udi munupatule mu ditunga dia Ejipitu, bua ngikale Mvidi Mukulu wenu. Nuenu nuikale bantu ba tshijila, bu mundi meme wa tshijila.[46]”

⁴⁶Mikenji eyi idi itangila nyama, nyunyi, minyinyi ya mu mayi ne bionsu bidi bienda pa buloba.

⁴⁷Mikenji eyi idi bua nuenu kumanya bintu bidi ne mikiya ne bidi kabiyi ne mikiya. Kadi mbua numanye binudi mua kudia ne binudi kanuyi mua kudia.