Read Tshiluba Mikenji ya bena Levi 14 Bible Online

Mikenji ya bena Levi 14 - Tshiluba bible

Mikenji ya bena Levi 14

²“Bua nuenu kukobolola muntu uvua ne nsudi, nuye nende kudi mutuangaji.[53]

³Mutuangaji umuke ne muntu awu mu mitanda, aye kujadika mushindu udi disama. Padi disama diende dijika,

⁴mutuangaji neatume diyi bua batuale nyunyi ibidi ya muoyi idi kayiyi ne mikiya, mitshi ya sedre, bilamba bienza ne miosa ya nyama bilaba kakula, ne mabeji a mutshi wa isope.

⁵Mutuangaji atume diyi bua bakosele muminu wa nyunyi umue pa luesu lua dibumba, luikale ne mayi a mu mpokolu.

⁶Pashishe neangate mitshi ya sedre, bilamba bienza ne miosa ya nyama bilaba kakula, mabeji a mutshi wa isope pamue ne nyunyi uvua mushale ne muoyi. Abitue mu mashi adi mu luesu a nyunyi uvuabu bakose muminu.

⁷Pashishe amiamine mashi awu pambidi pa muena nsudi misangu muanda mutekete bua kumukobolola, wamba ne: ‘Muntu ewu kena ne mikiya.’ Nenku mutuangaji alekele nyunyi uvua mushale ne muoyi, aye mu tshisuku.

⁸Muena nsudi uvuabu bakobolola awu, asukule bilamba biende, akungule nsuki ne boya buonsu, wowe mayi adi umusha mikiya. Pashishe apingane mu mitanda. Kadi ashale matuku muanda mutekete kayi ubuela mu ntenta wende.

⁹Dituku dia muanda mutekete, muena nsudi awu asukule bilamba biende, akungule nsuki, miedi, makiki ne boya buonsu budi pambidi pende. Pashishe wowe mayi. Nanku kena kabidi ne mikiya.

¹⁰“Dituku dia muanda mukulu, muena nsudi awu, afile bana ba mikoku babidi badi kabayi ne bulema, ne lukungulu lua mukoku lua tshidimu tshimue kaluyi bulema. Afile kabidi kilo tshitema ya bukula bua mulambu busambakaja ne mafuta, ne tshitupa tshia litre tshia makuabu mafuta.

¹¹Mutuangaji imanyike muena nsudi awu ne bintu biende bionsu kumpala kua Maweja-Nangila, mu mushiku wa ntenta wa kusambakena.

¹²Pashishe mutuangaji udi wangata muana wa mukoku umue, bu mulambu wa dinua tshibalu, ne tshitupa tshia litre tshia makuabu mafuta, abiele mulu, abinyukule.

¹³Akosele muana wa mukoku awu muminu anu muaba wa tshijila, udibu bakosela nyama miminu ya milambu ya kuosha ne ya kukobolola nayi bantu. Nanku, bintu bia mulambu wa kukobolola nawu bantu ne bia mulambu wa dinua tshibalu, nebabiangate kudi mutuangaji, bualu mbintu bia tshijila menemene.

¹⁴Mutuangaji neangate mashi a nyama wa milambu, aalabe muntu udi udikobolola awu ku lusongu lua ditshi, ku tshiala ne ku muana nkasa munene bia luseke lua dia balume.

¹⁵Mutuangaji neangate kabidi mafuta, aele mu tshianza tshiende tshia luseke lua dia bakaji.

¹⁶Pashishe atue munu wende wa tshianza tshia balume, udi ulonda tshiala, mu mafuta adi mu tshianza tshiende tshia bakaji, amiamine mafuta awu ne munu misangu muanda mutekete kumpala kua Maweja-Nangila.

¹⁷Nanku mafuta adi mashale mu tshianza awu, mutuangaji neaalabe muntu udi udikobolola miaba iwaye mulabe mashi a mukoku wa mulambu wa dinua tshibalu: ku lusongu lua ditshi, ku tshiala, ne ku muana nkasa munene bia luseke luende lua dia balume.

¹⁸Kadi mafuta makuabu adi mashale mu tshianza, mutuangaji neaele muntu awu mu mutu bua kumukobolola, kumpala kua Maweja-Nangila.

¹⁹Mutuangaji neambule mulambu wa kukobolola nawu muntu awu. Pashishe neamuenzele bionsu bidi bikengela bua muntu kikadi ne mikiya. Nanku neakose muminu wa nyama wa mulambu wa kuosha.

²⁰Neamoshile mujima pa tshilambuilu pamue ne bukula. Musangu wa ndekelu neajikije bionsu bidi bikengela bua muntu ashale kayi ne mikiya.

²¹“Padi disama dia nsudi dikuata mupela, mupange bintu bionsu ebi, alambule anu muana wa mukoku umue bu mulambu wa dinua tshibalu, udibu balambula Maweja-Nangila bua kudikobolola. Alambule kabidi kilo isatu ya bukula busambakaja ne mafuta, kabidi ne mafuta tshitupa tshia litre.

²²Angata kabidi nkudimba ibidi nansha tumanda-nkutshi tubidi. Nyunyi umue ikale bua mulambu wa kudikobolola nawu, mukuabu bua mulambu wa kuosha.

²³Dituku dia muanda mukulu, muntu udi udikobolola awu, neafile bintu ebi kudi mutuangaji kumpala kua Maweja-Nangila mu mushiku wa ntenta wa kusambakena.

²⁴Pashishe mutuangaji neangate muana wa mukoku ne mafuta. Neabiele mulu, abinyukule kumpala kua Maweja-Nangila.

²⁵Mutuangaji akose muana wa mukoku muminu, angate mashi, aalabe ku lusongu lua ditshi lua muntu awu, ku tshiala ne ku muana nkasa munene bia ku luseke lua dia balume dia muntu, udi udikobolola awu.

²⁶Mutuangaji ele mafuta mu tshianza tshiende tshia bakaji,

²⁷pashishe atue munu wende watshianza tshia balume, udi mulonde tshiala mu mafuta adi mu tshianza tshia bakaji, amiamine mafuta awu ne munu wende misangu muanda mutekete kumpala kua Maweja-Nangila.

²⁸Nanku mafuta adi mashale mu tshianza awu, mutuangaji aalabe kabidi makese muntu, udi udikobolola awu, miaba ivuaye mulabe mashi a nyama wa mulambu, ku lusongu lua ditshi, ku tshiala ne ku muana nkasa munene bia luseke luende lua dia balume.

²⁹Kadi mafuta makuabu adi mashale mu tshianza, mutuangaji aele mu mutu wa muntu udi udikobolola, bua ajikije mikiya yonsu, amuenzele bionsu bidi bikengela bua muntu ashale kayi ne mikiya kumpala kua Maweja-Nangila.

³⁰Mutuangaji angate nyunyi umue wa ku idi muntu mufile, kamanda-nkutshi nansha nkudimba,

³¹alambule nyunyi umue bu mulambu wa kudikobolola, mukuabu bu mulambu wa kuosha. Mutuangaji alambule mulambu awu pamue ne mulambu wa bukula. Ajikije mikiya yonsu kumpala kua Maweja-Nangila bua muntu ashale kayi ne mikiya.”

³²Mikenji eyi idi itangila muntu yonsu udi ne disama dia nsudi, kadi kayi ne mushindu wa kupeta bintu bia tshibidilu bia kudikobolola nabi.

³³Maweja-Nangila kuambila Moshe ne Arone ne:

³⁴“Panuikala bafike mu ditunga dia Kenaane dindi munupeshe, pandi mmuenesha butu mu nzubu wa muntu mu ditunga adi dipiadipia,

³⁵muena nzubu awu aye kuambila mutuangaji ne: ndi mumone ditoba dia butu mu nzubu muanyi.

³⁶Mutuangaji kayi muanji kubuela mu nzubu amu bua kutangila mudiye mukuate butu, neatume diyi bua bapatule bintu bionsu bivua mu nzubu. Padiye muenza nanku, bintu bionsu bivua mu nzubu nebishale kabiyi bipie mikiya to. Pashishe mutuangaji neabuele mu nzubu bua kukenketa mushindu udi ditoba.

³⁷Padi ditoba didi ku tshimana dikale dikunze nansha difike, kabidi diumbule tshimana,

³⁸mutuangaji apatuke, injile, akange ku nzubu aku matuku muanda mutekete.

³⁹Padi dituku dia muanda mutekete dikumbana, mutuangaji apingane kabidi bua kukenketa mushindu udi ditoba. Padi ditoba adi ditampakane ku tshimana,

⁴⁰mutuangaji atume diyi, balamune mabue adi makuate butu awu. Baye kuimansha ku mpenga kua tshimenga muaba wa bintu bibi.

⁴¹Pashishe neatume diyi bua bakone ku bimana bionsu bia munda mua nzubu, baye kuimansha bionsu bidibu bakone abi ku mpenga kua tshimenga, muaba wa bintu bibi.

⁴²Nenku, nebapingaje mabue makuabu, basunguile tshiakabidi miaba ivua mabue ayi.

⁴³“Kadi padibu bamane kulamuna mabue a nzubu awu ne matoba avuaku, bakone bimana babishinguila, kadi nzubu awu mukuate kabidi butu,

⁴⁴mutuangaji neaye kukenketa kabidi mushindu udi ditoba. Padi ditaba adi dimueneka menemene, nunku neajadike ne nzubu udi mupie mikiya, bualu kakuena mushindu wa kumusha butu abu to.

⁴⁵Nebupule nzubu awu, bumushe bintu bionsu bivua bimuibaka nabi: mabue, mabaya ne bionsu bivua bishinguila nabi. Nebimanshe bintu abi ku mpenga kua tshimenga muaba wa bintu bibi.

⁴⁶“Muntu yonsu udi ubuela mu nzubu awu matuku avuabu bamuinjile, bamukange, neapie mikiya too ne ku dilolu.

⁴⁷Muntu yonsu udi ulala mu nzubu awu, nansha udilamu biakudia, udi ne bua kusukula bilamba biende.

⁴⁸“Padibu bamane kushinguila nzubu awu, mutuangaji usangana butu kabuyi bumueneka tshiakabidi, neambe ne: nzubu ewu kena mupie mikiya to, bualu butu mbujike buonsu.

⁴⁹“Bua kujikija mikiya ya mu nzubu awu, mutuangaji angate nyunyi ibidi, mitshi ya sedre, bilamba bienza ne miosa ya nyama bilaba kakula, ne mabeji a mutshi wa isope.

⁵⁰Akosele muminu wa nyunyi umue pa luesu lua dibumba, luikale ne mayi a mpokolu.

⁵¹Pashishe mutuangaji neangate nyunyi udi mushale ne muoyi, mitshi ya sedre, bilamba bienza ne miosa ya nyama bilaba kakula, ne mabeji a mutshi wa isope. Neabitue mu mashi a nyunyi uvuaye mukose muminu, ne mu mayi a mpokolu adi mu luesu. Neamiamine mashi awu ne mayi mu nzubu misangu muanda mutekete.

⁵²Bua kujikija mikiya ya nzubu awu, mutuangaji neangate nanku mashi a nyunyi, mayi a mpokolu, nyunyi uvua mushale ne muoyi, mitshi ya sedre, bilamba bienza ne miosa ya nyama bilaba kakula, ne mabeji a mutshi wa isope.

⁵³Nenku mutuangaji neapatuke mu tshimenga ne nyunyi uvua mushale ne muoyi, amulekele, abuke, aye mu tshisuku. Ke mushindu udiye ujikija mikiya ku nzubu nanku.”

⁵⁴Mikenji eyi idi itangila disama dia nsudi dia mishindu yonsu: kababa,

⁵⁵biwuja, muaba muwule, dikeji ditoke pambidi pa muntu,

⁵⁶butu budi bukuate pa bilamba, nansha ku nzubu.

⁵⁷Mikenji eyi idi ijadika mudibu mua kusunguluja bantu nansha bintu bidi ne mikiya, ne bidi kabiyi nayi.