Read Tshiluba Mikenji ya bena Levi 15 Bible Online

Mikenji ya bena Levi 15 - Tshiluba bible

Mikenji ya bena Levi 15

¹Maweja-Nangila kuambila Moshe ne Arone bua

²bamanyishe bena Izrayele ne: “Padi muntu mulume mupete disama ku butaka buende, tufina tupatukamu, muntu awu mmupie mikiya.

³Nanku padi tufina atu tupatuka, nansha tupatakaja mubidi wende awu, tufina atu tudi ne mikiya, tudi lukuatshisha kabidi muntu mikiya.

⁴Muaba onsu udi muntu awu usomba, nansha bulalu budiye ulala, bidi anu bipia mikiya.

⁵Kabidi muntu yonsu udi ulenga bulalu abu, asukule bilamba biende, wowe mayi. Kadi neikale mupie mikiya too ne ku dilolu.

⁶Muntu yonsu udi usomba pa tshintu tshivua muena disama musombe, neasukule bilamba biende, wowe mayi. Kadi neikale mupie mikiya too ne ku dilolu.

⁷Muntu yonsu udi ulenga muena disama adi, neasukule bilamba biende, wowe mayi. Kadi neikale mupie mikiya too ne ku dilolu.

⁸Padi mate a muena disama amatshila muntu udi kayi ne mikiya, muntu awu asukule bilamba biende, wowe mayi. Kadi neikale mupie mikiya too ne ku dilolu.

⁹Padi muena disama edi musombe pa tshiseba tshia kabalu, tshiseba etshi netshikale tshipie mikiya.

¹⁰Muntu yonsu udi ulenga tshintu tshivua muena disama edi musombe, neapie mikiya too ne ku dilolu. Kabidi muntu yonsu udi wambula tshintu tshivua muena disama edi musombe, neasukule bilamba biende, wowe mayi. Kadi neikale mupie mikiya too ne ku dilolu.

¹¹Padi muena disama edi kayi muanji kuowa mayi ku bianza, ulenga muntu mukuabu, udiye mulenge awu wowe mayi, asukule bilamba biende. Kadi neikale mupie mikiya too ne ku dilolu.

¹²Kadi luesu lua dibumba luvua muena disama adi mulenge, nebaluzaze. Luvu luvuaye mulenge, nebalukone ne mayi mavule.

¹³“Diba didi tufina, tuvua tupatuka, tupisha muntu awu mikiya, tujika, muntu awu udi ne bua kushala muindile matuku muanda mutekete bua mikiya yende kujika payi. Nanku asukule bilamba biende, wowe mayi a mpokolu bua mikiya kujikayi.

¹⁴Padi dituku dia muanda mukulu dikumbana, udi wangata nkudimba ibidi, nansha tumanda-nkutshi tubidi, ubipeshila mutuangaji mu mushiku wa ntenta wa kusambakena, kumpala kua Maweja-Nangila.

¹⁵Pashishe mutuangaji udi ulambula nyunyi umue bua mulambu wa kukobolola nawu bantu, ne nyunyi mukuabu bua mulambu wa kuosha. Ke mudi mutuangaji ujikija mikiya ya muntu nanku kumpala kua Maweja-Nangila, bua muntu kashadi ne mikiya ya dipatuka dia tufina.

¹⁶“Padi muntu upatula biana, udi ne bua kuowa mayi mubidi mujima. Kadi neikale mupie mikiya too ne ku dilolu.

¹⁷Nenku bilamba bionsu, nansha biseba, bivua biana bimatshila, neabisukule ne mayi. Kadi nebikale bipie mikiya too ne ku dilolu.

¹⁸“Padi mulume mubuelele mukaji mu nzubu, bonsu babidi nebowe mayi mubidi mujima. Kadi nebikale bapie mikiya too ne ku dilolu.

¹⁹“Padi mukaji ku tshijila tshia bakaji, mashi apatuka mu mubidi wende, udi ushala mupie mikiya matuku muanda mutekete. Muntu yonsu udi umulenga, udi upia mikiya, ushala nayi too ne ku dilolu.

²⁰Nanku muaba onsu uvua mukaji awu musombe, nansha bulalu buvuaye mulale pawaye ku tshijila tshia bakaji, bidi bipia mikiya.

²¹Muntu yonsu udi ulenga bulalu buvua mukaji awu mulale,

²²nansha tshintu tshionsu tshivua mukaji awu musombe, asukule bilamba biende, wowe mayi. Kadi neikale mupie mikiya too ne ku dilolu.

²³Muntu yonsu udi ulenga tshintu tshivua pa bulalu bua mukaji awu, nansha tshivua pa muaba uvuaye musombe, neikale mupie mikiya too ne ku dilolu.

²⁴Padi muntu ubuelela mukaji awu mu nzubu, mu matuku atshidiye ku tshijila tshia bakaji,[54] muntu awu udi upia mikiya ivua nayi mukaji awu. Kabidi udi uyipia matuku muanda mutekete, uyipisha ne bulalu buonsu budiye ulala.

²⁵“Padi mukaji umona tshijila tshia bakaji matuku mavule, katshiyi pa diba diatshi, nansha padiye ushala ku tshijila upitshisha matuku ende a tshibidilu, matuku awu onsu udi anu ne mikiya, bu muvuaye nayi mu matuku ende a tshijila tshia bakaji.

²⁶Pashishe bulalu budi mukaji awu ulala, nansha muaba onsu udiye usomba, nebikale ne mikiya, anu bu mudibi nayi padiye ku tshijila mu matuku ende a tshibidilu.

²⁷Muntu udi ulenga bulalu abu, nansha muaba uvuaye usomba, udi ne bua kusukula bilamba biende, kuowa mayi. Kadi mmupie mikiya too ne ku dilolu.

²⁸“Diba didi tshijila atshi tshijika, mukaji indile matuku muanda mutekete, bua mikiya ijike.

²⁹Kadi dituku dia muanda mukulu, mukaji awu angate nkudimba ibidi nansha tumanda-nkutshi tubidi, abipeshile mutuangaji mu mushiku wa ntenta wa kusambakena.

³⁰Mutuangaji alambule nyunyi umue bua mulambu wa kukobolola nawu muntu, nyunyi mukuabu bua mulambu wa kuosha. Pashishe neajikije mikiya ya mukaji awu kumpala kua Maweja-Nangila, bua kumukobolola ku mikiya ya tshijila tshiende tshia bakaji.

³¹“Nuambile bena Izrayele bonsu badi bapia mikiya ne: ‘Kanusemenyi pabuipi ne muaba wa tshijila.’ Bualu padibu bapia mikiya, badi mua kunyanga ntenta undi musombe munkatshi muabu, kupeta njiwu ya lulu.”

³²Mikenji eyi idi itangila muntu mulume udi ne disama dia tufina, nansha udi ne biana bipatuka mu butaka, bimupisha mikiya.

³³Idi itangila kabidi mukaji udi umona tshijila tshia bakaji, nansha mulume udi ubuelela mukaji mu nzubu patshidiye mu matuku ende a tshijila tshia bakaji.