Read Tshiluba Mikenji ya bena Levi 19 Bible Online

Mikenji ya bena Levi 19 - Tshiluba bible

Mikenji ya bena Levi 19

¹Maweja-Nangila kuambila Moshe

²bua amanyishe bisamba bia bena Izrayele bionsu ne: “Nudi ne bua kuikala bantu ba tshijila, bualu meme Maweja-Nangila Mvidi Mukulu[81] wenu ndi wa tshijila.

³“Muntu yonsu wa kunudi anemeke tatuende ne mamuende, kabidi anemeke dituku dia Dikisha.[82] Bualu Meme ndi Maweja-Nangila Mvidi Mukulu wenu.

⁴“Kanuena mua kutendelela mvidie ya dishima to. Kanuena mua kuengulula biamu bua kufula mpingu,[83] kuyitendelela. Bualu Meme ndi Maweja-Nangila Mvidi Mukulu wenu.

⁵“Panudi nundambula mulambu wa bobumue, nulonde mudi mikenji yawu bua meme kuwanyisha.

⁶Nudi mua kudia munyinyi wa mulambu awu, dituku dinudi nulambula, ne didi dilonda. Kadi padiwu mushale too ne ku dituku disatu, nuwoshe mu kapia.

⁷Pikala muntu muudie kabidi dituku disatu, tshiena mua kumuambuluisha to. Bualu munyinyi mmumane kunyanguka, kabayi mua kukuata kabidi nawu mudimu wa tshijila to.

⁸Muntu udi muudie mmuena tshibawu, bualu mmunyange mulambu wanyi wa tshijila. Nebamuipate munkatshi mua bena Izrayele.

⁹“Panudi nunowa biakudia, kanuena mua kukosa too ne miepu idi kumpenga kua budimi to. Kabidi kanuena mua kupingana mu budimi bua kupumbulula binuvua bapue muoyi to.

¹⁰Kanuena mua kupingana mu madimi enu bua kupumbulula tumuma tua mvinyo tunuvua bapue muoyi, nansha tuvua tumata panshi. Nubilekele bapela ne benyi. Bualu Meme ndi Maweja-Nangila Mvidi Mukulu wenu.[84]

¹¹“Kanuibi. Nulekele dishima ne kudingila bena kuenu malu,[85] bua kubakengesha.

¹²Kanutshipi mutshipu wa dishima, nutela[86] dina dianyi, to. Bualu nudi mua kupetula dina dianyi meme, Maweja-Nangila Mvidi Mukulu wenu.

¹³“Kanukengeshi mukuenu. Kanuibi tshintu tshiende. Difutu dia muena mudimu[87] webe dikale anu pa diba diadi, kuyi ulala nadi dituku nansha dimue.

¹⁴Kanupendi muena mapapa. Kanuteki tshintu kumpala kua mpofu,[88] bua adishinde panshi. Mu bionsu binudi nuenza, nuleje munudi nuntshina. Bualu Meme ndi Maweja-Nangila Mvidi Mukulu wenu.

¹⁵“Kanulumbuluishi ne kansungansunga. Kanubingishi mupela nansha muena biuma, padiye mupile. Kadi nukose nsambu ya bana benu anu pa yoyi.[89]

¹⁶Kanujanyi bena diku dienu to. Kanufundi mukuenu ku tshilumbu tshidibu mua kumufundila tshibawu tshia lufu to. Bualu Meme ndi Maweja-Nangila.

¹⁷“Kanulaminyi muanenu lukuna. Kanutshinyi[90] mua kubela muntu patoke bua tshilema tshiende, bua kanuikadi bonsu bena tshibawu.

¹⁸Kanudisombuedi ne bana benu, kanujilanganyi nabu. Muntu yonsu wa kunudi anange muanabu, bu mudiye mudinange.[91] Bualu Meme ndi Maweja-Nangila.

¹⁹“Nulame kabidi mikenji eyi: Kanuteki mu bimuna bienu nyama ya mishindu ibidi mishilangane bua kulelanganayi. Kanumiaminyi mu madimi enu maminu a mishindu ibidi mishilangane. Kanuvuadi bilamba bitela ne manda a mishindu ibidi mishilangane.[92]

²⁰“Padibu babuelelela mukaji mupika, udibu bamane kubangila, kadi kabayi banji kumupikula nansha kumulekela, mu nzubu kudi muntu mukuabu, muntu awu udi ne bua kufuta tshibawu.[93] Nanku kabena ne bua kushipa mulume nansha mukaji to, bualu mukaji utshivua mupika.

²¹Muntu awu neimanyikile mukoku wa tshimpanga mu mushiku wa ntenta wa kusambakena, bua kuulambula bu mulambu wa dinua tshibalu.

²²Mutuangaji neakobolole muena tshibawu awu kumpala kuanyi, bua meme kumufuila luse, kumujimijila bubi buende.

²³“Musangu unuikala bamane kufika mu ditunga dia Kenaane, nuenu bamane kukuna mitshi ya bimuma ya mishindu yonsu, nenutangile bimuma bu bintu bidi ne mikiya. Kanuena mua kubidia to, anu papita bidimu imukuata to, bisatu.

²⁴Nenku, bimuma bionsu biakuamayi tshidimu tshinayi, nubindambule mu tshibilu tshia dintumbisha.

²⁵Kadi biangatshile mu tshidimu tshitanu, nudi mua kutuadija kudia bimuma. Nuenu benze nanku, biakudia bienu nebivulangane. Bualu meme ndi Maweja-Nangila Mvidi Mukulu wenu.

²⁶“Kanudidi munyinyi wa nyama pa muaba muine unuvua bamushipe, bamupatuile mashi to. Kanuenji majimbu, kanubuki to.[94]

²⁷Kanubeyi nsuki yenu biketu, kanukungudi muedi wenu ku nseke to.

²⁸Panudi mu madilu, kanuditapi mputa pambidi.[95] Kanuditapi nsalu pambidi to. Bualu meme Ndi Maweja-Nangila.

²⁹“Kanufuishi nsongakaji yenu bundu, panudi nubasaka ku dienda buendenda mu nzubu ya ditendelela mvidie.[96] Buenzayi bua nanku kabutampakanyi ditunga dijima nansha.

³⁰Nuikishe dituku dia Dikisha, nunemeke muaba wanyi wa tshijila.[97] Bualu meme ndi Maweja-Nangila.

³¹“Kanubuelakanyi ne bantu badi babuka bua kumvua tshidi bakishi bamba.[98] Nuenu benze nanku, nenupie mikiya. Bualu meme ndi Maweja-Nangila Mvidi Mukulu wenu.

³²“Panudi numona muntu mukulumpe, nujuke kulu ne kanemu. Nuleje munudi nunnemeka. Bualu meme ndi Maweja-Nangila Mvidi Mukulu wenu.

³³“Kanukengeshi muntu muenyi udi muase mu ditunga dienu.

³⁴Kadi, nusombe nende bu muena ditunga. Numunange, munudi nudinanga. Nuvuluke ne: nuvua benyi mu ditunga dia Ejipitu.[99] Meme ndi Maweja-Nangila Mvidi Mukulu wenu.

³⁵“Kanuteki tshipimu tshia dishima mu bipimu bia bule, bia bujitu ne bia buwudi.

³⁶Kadi nuikale ne bipimu bia bushuwa bua buwudi, bujitu ne bule.[100] Meme ndi Maweja-Nangila Mvidi Mukulu wenu, uvua munupatule mu Ejipitu.

³⁷“Nulame meyi anyi ne mikenji yanyi bimpe. Bualu meme ndi Maweja-Nangila.”