Read Tshiluba Mikenji ya bena Levi 21 Bible Online

Mikenji ya bena Levi 21 - Tshiluba bible

Mikenji ya bena Levi 21

¹Maweja-Nangila kuambila Moshe bua amanyishe batuangaji, bana ba Arone, mikenji idi ilonda eyi ne: “Mutuangaji kena ne bua kusemena pabuipi ne tshitalu tshia muntu wa mu diku diabu to. Yeye muenze nanku udi upia mikiya.

²Kadi padi tshitalu atshi tshikale tshia tatuende, nansha mamuende, nansha muanabu wa balume, nansha tshia muanende wa balume nansha wa bakaji, mikiya ayi kayena

³Padiye ulenga tshitalu tshia muanabu wa bakaji, udi kayi muanji kuya ku dibaka, kena upia mikiya to. Bualu nsongakaji awu utshidi mu diku dia mutuangaji, kena muanji kubuela mu diku dikuabu to.

⁴Mutuangaji munkathi mua bana babu udi ne bumfumu. Nanku, kena mua kuikala ne mikiya.[114] Bualu yeye ne mikiya, kabena mua kumunemeka to.

⁵“Padi batuangaji mu madilu, kabena mua kubeya biketu mu nsuki, kabena mua kukungula miedi ku nseke, nansha kuditapisha nsalu pambidi.[115]

⁶Batuangaji badi ne bua kungenzela mudimu. Kabena ne bua kufuisha dina dianyi bundu. Badi ne bua kundambula meme Maweja-Nangila Mvidi Mukulu wabu milambu. Ke mundi musue ne: bikale bantu ba tshijila matuku onsu.

⁷“Mutuangaji kena ne bua kubanjija mukaji mudisombele, nansha uvuabu bamane kubanjija, nansha uvua ku dibaka dikuabu, bualu mutuangaji mmuntu wa tshijila, udi ungenzela mudimu.

⁸Nuenu bena Izrayele, numanye ne: batuangaji mbantu ba tshijila. Nubanemeke, bualu bobu ke badi bafikisha milambu yenu kundi meme, Mvidi Mukulu wenu. Muntu kena mua kunyanga tshijila tshiabu to. Bualu meme ndi Maweja-Nangila wa tshijila. Mvua musungule bena Izrayele bua bikale bantu ba tshijila.

⁹“Padi muana wa bakaji wa mutuangaji mushale ndumba, udi ufuisha tatuende bundu. Nenku badi ne bua kuosha muana awu ne muoyi mu kapia.

¹⁰“Mutuangaji munene udi ku mutu kua batuangaji. Bavua bamujidile, bamuele mafuta a tshijila, dituku divuabu bamubanjije mu muanzu wende. Nenku udi mua kuvuala bilamba bia tshijila. Kadi kena mua kuikala ne nsuki mivuanduluke ku mutu, nansha kupanda bilamba biende.[116]

¹¹Kabidi, kena mua kusemena pabuipi ne muntu mulue, nansha yeye tatuende nansha mamuende, bua kavu kupia mikiya.

¹²Padi mutuangaji awu mumane kujidila ne mafuta, bua kungenzela mudimu, kena mua kumuka mu nzubu wa Mvidi Mukulu to. Bualu udi mua kunyanga muaba wanyi wa tshijila. Bualu meme Ndi Maweja-Nangila.

¹³“Mutuangaji munene awu, asele mukaji amu udi kayi muanji kumanyangana ne mulume.

¹⁴Kena mua kusela mukaji mukamba, nansha mukaji udi bayende mubenge, nansha ndumba. Kadi asele amu nsongakaji wa mu diku diabu, utshidi mushikankunde,

¹⁵bua ndelanganyi ya bantu badi kabayi batuangaji, kayimonyi mua kuvua kubuela mu diku dia batuangaji. Bualu meme ndi Maweja-Nangila, udi mumujidile bua kungenzela mudimu.”

¹⁶Maweja-Nangila kuambila Moshe ne:

¹⁷— Manyisha Arone mikenji idi ilonda eyi ne: “Mu ndelanganyi yenu idi ilonda, muntu ne bulema pambidi, kanuena mua kumuanyisha bua asemene ku tshilambuilu, andambule milambu yanyi to.

¹⁸Bualu muntu mulema kena mua kunkuatshila mudimu to, nansha yeye muikale mpofu, muntu udi utebuka, muikale ne diulu tshibatabata, nansha ne tshidimba tshile ne tshipi,

¹⁹nansha muntu uvua mutshibuke mukolu nansha diboku,

²⁰nansha muntu ne katonta nyima, nansha muntu mushawuke, nansha muntu ne lusonga mu disu, nansha muntu ne lubika, nansha muntu mutungu.

²¹Nenku muntu nansha umue wa ku ndelanganyi yebe udi ne bulema pambidi, kena ne bua kusemena ku tshilambuilu, kundambula milambu to. Bualu udi ne bulema, kena mua kuenza midimu ya tshibidilu ya batuangaji to.

²²Kadi muntu awu, udi mua kudia biakudia bidibu bandambula, nansha biobi bia tshijila menemene, nansha bia tshijila.

²³Kadi bualu bua bulema buende, kena mua kusemena pabuipi ne tshilamba tshidi tshilembeleja muaba wa tshijila, nansha kutantshila pabuipi ne tshilambuilu, bualu udi mua kunyanga muaba wanyi wa tshijila.[117] Meme ndi Maweja-Nangila udi ujidila batuangaji.”

²⁴Moshe kufikisha mikenji ayi yonsu kudi Arone, kudi bana bende ba balume, ne kudi bena Izrayele bonsu.