Read Tshiluba Mikenji ya bena Levi 3 Bible Online

Mikenji ya bena Levi 3 - Tshiluba bible

Mikenji ya bena Levi 3

¹“Padi muena Izrayele ulambula ngombe bu mulambu wa bobumue, ngombe awu ikale mulume nansha mukaji, kayi bulema. Aye nende muaba wa tshijila,

²ateke tshianza pa mutu pa ngombe awu, amukosele muminu mu mushiku wa mbelu wa ntenta wa kusambakena. Batuangaji, bana ba Arone, bamiamine mashi a ngombe awu ku nseke yonsu ya tshilambuilu.

³Pashishe, batuangaji balambule Maweja-Nangila bintu ebi: mafuta onsu[5] adi malamate ku bia munda,

⁴tuonyi tubidi ne mafuta onsu adi malamataku, mafuta adi malamate ku mulemba, lutandatanda ludi ku mutshima ludibu balamuna pamue ne tuonyi.

⁵Batuangaji boshe munyinyi onsu ewu pa tshilambuilu, pamue ne mulambu wa kuosha, bualu udi mulambu wa dipembu dimpe didi disankisha Maweja-Nangila.

⁶“Kadi padi muena Izrayele ulambula Maweja-Nangila mbuji nansha mukoku bu mulambu wa bobumue, tshimuna atshi tshikale tshilume nansha tshikaji, katshiyi bulema.

⁷Padiye ulambula mukoku, aye nawu muaba wa tshijila.

⁸Ateke tshianza pa mutu pa mukoku awu. Aukose muminu kumpala kua ntenta wa kusambakena. Batuangaji bamiamine mashi a mukoku awu ku nseke yonsu ya tshilambuilu.

⁹Pashishe, mutuangaji ele bintu ebi mulu, abinyukule bua kubilambula Maweja-Nangila: ke mukila[6] mujima mulamuina ku makunku, mafuta onsu adi malamate ku bia munda,

¹⁰tuonyi tubidi ne mafuta onsu adi malamate ku mulemba, ne lutandatanda ludi ku mutshima, ludibu balamuna pamue ne tuonyi.

¹¹Mutuangaji oshe bintu bionsu abi pa tshilambuilu, bualu mmulambu udibu boshila Maweja-Nangila.

¹²“Padi muena Izrayele ulambula mbuji, aye nende muaba wa tshijila.

¹³Ateke tshianza pa mutu wa mbuji awu, amukosele muminu kumpala kua ntenta wa kusambakena. Batuangaji bamiamine mashi a mbuji awu ku nseke yonsu ya tshilambuilu.

¹⁴Pashishe mutuangaji ele bintu bionsu ebi mulu, abinyukule bua kubilambula Maweja-Nangila: ke mafuta onsu adi malamate ku bia munda,

¹⁵tuonyi tubidi ne mafuta onsu adi malamateku, mafuta adi malamate ku mulemba, ne lutandatanda ludi ku mutshima, ludibu balamuna pamue ne tuonyi.

¹⁶Mutuangaji oshe bintu bionsu abi pa tshilambuilu, bualu mmulambu wa dipembu dimpe moshila Maweja-Nangila. “Mafuta onsu ikale a Maweja-Nangila.

¹⁷Nanku nuenu ne ndelanganyi yenu, miaba yonsu inudi nusomba, kashidi ne kashidi kanudi mashi nansha mafuta to. Nulame mukenji ewu kashidi.”