Read Tshiluba Mikenji ya bena Levi 5 Bible Online

Mikenji ya bena Levi 5 - Tshiluba bible

Mikenji ya bena Levi 5

¹“Padibu babikila muntu kampande kudi balumbuluishi bua kujadika bualu budiye mumvue nansha mumone ne mesu, kadi yeye ubenga bua kujadika bualu abu, mmuena tshibawu.[8]

²“Tuteke tshilejilu tshikuabu: Padi muntu ulenga tshintu kampande tshidi ne mikiya kayi mumanye, bu mudi nyama wa tshisuku mufue, tshimuna nansha tshilandadi tshifue, muntu awu mmuena tshibawu, udi ne mikiya.[9]

³“Mufuanyikije kabidi: padi muntu ulengangana ne mukuabu kayi mumanye, ne udi mulengangane nende ewu udi ne mikiya idi yambulukilangana, udi mulengangane awu, padiye umanya bubi buende, diakamue udi muena tshibawu.[10]

⁴“Bidi momumue padi muntu kayi muele meji bimpe, uditshipa bua kujadika bualu, nansha bua kuambuluisha muntu kampande, nansha bua kumukengesha, muntu udi uditshipa awu, padiye umanya bubi buende, udi muena tshibawu.[11]

⁵“Muntu yonsu udi wenza tshilema tshia ku bitudi batela ebi, mmuena tshibawu, atonde bubi buende budiye muenze.

⁶Kadi bua Mvidi Mukulu kumufuila luse ku bubi buvuaye muenze, udi ne bua kulambula Maweja-Nangila dishina dia mukoku nansha dishina dia mbuji. Bidi mulambu wa kudikobolola. Ke mudi mutuangaji mua kukobolola muena tshibawu amu mushindu ewu.

⁷“Padi muntu kampande kayi ne mushindu wa kupeta dishina dia mbuji nansha dia mukoku bu mulambu wa kudikobolola, udi mua kulambula Maweja-Nangila tumandankutshi tubidi nansha nkudimba ibidi. Nyunyi umue ikale mulambu wa kudikobolola nawu. Mukuabu ikale mulambu wa kuosha.

⁸Muntu awu afile nyunyi ayi kudi mutuangaji bua ayele mulu, ayinyukule, ayilambule Maweja-Nangila. Bangabanga mutuangaji alambule nyunyi wa mulambu wa kudikobolola nawu. Anyongobole nyunyi awu nshingu, kayi umukosa mutu.

⁹Itshikije mashi makese ku nseke ya tshilambuilu. Mashi onsu adi mashale, ayitshikije kuinshi kua tshilambuilu. Mulambu ewu mbua kukobolola muntu awu.

¹⁰Pashishe mutuangaji alambule nyunyi mukuabu bu mulambu wa kuosha, bilondeshile mudi mikenji ya milambu. Nunku akobolole muena tshibawu anu mushindu ewu bua Mvidi Mukulu amufuile luse.

¹¹“Kadi padi muntu kayi ne mushindu wa kupeta tumandankutshi tubidi nansha nkudimba ibidi, alambule Maweja-Nangila kilo inayi ya bukula. Kadi pa bukula abu, kena mua kuelamu mafuta, nansha kutekapu musenga wa kamonya[12] to. Bualu mmulambu wa kudikobolola nawu.

¹²Apeshe mutuangaji bukula abu, bua yeye ambule dianza dia bukula abu bu mulambu wa tshivulukilu,[13] oshe bukula abu pamue ne milambu mikuabu idibu boshila Maweja-Nangila. Bualu mmulambu wa kudikobolola nawu.

¹³Mutuangaji akobolole muena tshibawu awu anu mushindu ewu, bua Mvidi Mukulu amufuile luse. “Mutuangaji enze[14] bionsu ebi anu muvuaye wenza bua mulambu wa bintu bia mu madimi.”

¹⁴Maweja-Nangila kuambila Moshe ne:

¹⁵“Padi muntu kampande muenze bualu bubi mu mpukapuka, mupue muoyi bua kulambula milambu ya tshijila idibu balambula Maweja-Nangila, muntu awu, bua kudikobolola udi ne bua kulambula Maweja-Nangila mukoku wa tshimpanga kauyi ne bulema. Ke mulambu wa dinua tshibalu. Mukoku awu wikale wa mushinga mukumbane wa nkanu ya tshiamu tshitoke, bilondeshile tshipimu tshia nkanu tshidibu natshi muaba wa tshijila, bualu mulambu ewu ngua dinua tshibalu.

¹⁶Muntu awu afile kabidi milambu iwaye kayi mufile. Asakidile kabidi ne tshia bitanu tshimue tshia mushinga wa bintu abi. Apeshe mutuangaji bintu bionsu abi. Mutuangaji alambule nyama wa tshibawu awu, akobolole muena tshibawu bilondeshile mudi mikenji, bua Mvidi Mukulu amufuile luse.

¹⁷“Padi muntu kampande muenze bualu bubi budi bubengangana nansha ne mukenji umue wa Maweja-Nangila, nansha muenze kayi mumanye, muntu awu udi muena tshibawu.

¹⁸Udi ne bua kuya ne mukoku wa tshimpanga kudi mutuangaji. Mukoku awu wikale kauyi ne bulema, kabidi mukumbane mushinga wa mulambu wa dinua tshibalu. Mutuangaji akobolole muena tshibawu awu anu mushindu ewu, bua Maweja-Nangila amufuile luse bua bubi buvuaye muenze kayi mumanye.

¹⁹Ewu ke mulambu wa dinua tshibalu bua muntu yonsu udi mubunde tshibawu kudi Maweja-Nangila.’’

²⁰Maweja-Nangila kuambila[15] Moshe ne:

²¹“Padi muntu kampande munyangakaje mikenji ya Maweja-Nangila, muenzele mukuende bibi: Tutele tshilejilu: padi muntu uvila bua tshintu tshivuabu batekesha kudiye, tshintu tshivuaye musombe, tshintu tshivuaye muibe, tshintu tshivuaye munyenge ku bukole,

²²nansha bua tshintu tshijimine tshivuaye muangule, uvila ne: tshiena mutshimone to; nansha kabidi padi muntu uditshipa mitshipu ya dishima bua kupeta tshintu ne budimu,

²³muntu awu mmuena tshibawu, bualu mmuenze bualu bubi. Apingaje tshintu tshivuaye muibe, munyenge, muangule, nansha tshi wabu batekesha kudiye,

²⁴nansha tshintu tshivuaye muditshipe mitshipu ya dishima bua kutshipeta ne budimu. Muntu awu apingaje tshintu atshi amu bu mu watshi, asakidile kabidi ne tshia bitanu tshimue tshia mushinga wa tshintu atshi. Diakamue padiye umanya bubi buende, apingaje tshintu atshi kudi muenatshi, ne bionsu bidiye ne bua kusakidila abi.

²⁵Pashishe aye ne mukoku wa tshimpanga kudi mutuangaji. Mukoku awu wikale kauyi ne bulema, wikale mukumbane mushinga wa mulambu wa dinua tshibalu udibu balambula Maweja-Nangila.

²⁶Mutuangaji akobolole muena tshibawu anu mushindu ewu bua Mvidi Mukulu[16] amufuile luse bua tshibawu tshivuaye muenze atshi.”