Read Tshiluba Mikenji ya bena Levi 6 Bible Online

Mikenji ya bena Levi 6 - Tshiluba bible

Mikenji ya bena Levi 6

¹Maweja-Nangila[17] kuambila Moshe ne:

²— Ambila Arone ne bana bende ba balume ne: “Nungoshile milambu mushindu ewu: “Mulambu wa kuosha awu ushale pa tshilambuilu butuku bujima, kapia katema amu kutema kakayi kajima.

³Pashishe mutuangaji avuale muntumpu muenza ne buanda bua ndanda. Avuale kabidi kaputula ka tshilamba kenza ne buanda bua ndanda. Aboye butu budi pa tshilambuilu, anji kubuteka panshi ku luseke lua tshilambuilu.

⁴Pashishe avule bilamba abi, avuale bikuabu. Umbuke ne butu abu mu mitanda, aye nabu muaba musunguluke kauyi mikiya bua kubimansha.

⁵Kadi kapia kadi pa tshilambuilu kadi ne bua kutema anu kutema. Ku dituku dionsu, mutuangaji ikale uteka nkunyi pa tshilambuilu dinda, utekepu ne milambu ya kuosha bangabanga ne kuoshilapu munyinyi wa mafuta wa milambu ya bobumue.

⁶Nanku kapia kikale katema anu kutema pa tshilambuilu kashidi, kakayi kajima.

⁷“Bua kulambula mulambu wa bintu bia mu madimi, nuenze nunku: “Anu bana ba Arone ba balume ke badi mua kuela bintu abi mulu, kumpala kua tshilambuilu, kubinyukula bua kubilambula Maweja-Nangila.

⁸Nanku mutuangaji ambule dianza dia bukula budibu basambakaje ne mafuta, ambule kabidi musenga wa kamonya onsu, abioshe bionsu pa tshilambuilu, bualu bintu ebi mmulambu wa tshivulukilu[18] udi ne dipembu dimpe didi disankisha Maweja-Nangila.

⁹Bukula bua mulambu budi bushale, babuangate anu kudi Arone ne bana bende ba balume. Kadi badie mulambu awu kabayi bela buanga bua mampa. Baudile mu lubanza lua ntenta wa kusambakena, bualu ke muaba wa tshijila.

¹⁰Mulambu awu kabena mua kuulamba, kuela buanga bua mampa to. Bualu udi tshitupa tshidi Maweja-Nangila mubapeshe tshia ku bintu bionsu bidibu bamulambula. Tshitupa atshi tshidi tshia tshijila, bu mudi tshitupa tshia ku mulambu wa kudikobolola nawu, nansha wa dinua tshibalu.

¹¹Nanku anu bantu balume ba ku ndelanganyi ya Arone, ke badi mua kudia bukula bua mulambu abu. Bualu mbukula bua mulambu wa Maweja-Nangila budiye mupeshe ndelanganyi ya Arone kashidi. Kadi muntu yonsu mukuabu walenga tshitupa tshia mulambu ewu, nebamunyoke.”

¹²Maweja-Nangila kuambila Moshe ne:

¹³“Bobu bamane kujidila Arone ne bana bende ba balume, badi ne bua kulambula Maweja-Nangila kilo isatu ya bukula ku dituku dionsu, mmomumue ne: balambule tshia bibidi tshimue tshia bukula dinda, tshikuabu dilolu.

¹⁴Bukula abu, buikale busambakaja ne mafuta, bukanga pa dilata bua kuenza mukata. Pashishe bangabanga ne kulambula Maweja-Nangila[19] mukata awu, wikale mukosolola bitupa, bualu mmulambu wa dipembu dimpe didi disankisha Maweja-Nangila.

¹⁵“Nanku muntu wa ku ndelanganyi ya Arone, udibu bajidila bua ikale mutuangaji munene, neikale ulambula mulambu ewu anu mushindu ewu. Bualu mmulambu udibu boshila Maweja-Nangila onsu kashidi, ushile.

¹⁶Ku mulambu onsu wa bia mu madimi udi mutuangaji ulambula Maweja-Nangila, kena mua kudia kantu nansha kamue to.”

¹⁷Maweja-Nangila kuambila Moshe,

¹⁸bua amanyishe Arone ne bana bende ba balume ne: “Mikenji idi itangila mulambu wa dikobolola dia bantu, idi nunku: “Bakosele tshimuna atshi muminu kumpala kua Maweja-Nangila, anu muaba udibu bashipela nyama ya milambu ya kuosha. Bualu mulambu ewu ngwa tshijila menemene.

¹⁹Mutuangaji udi ulambula mulambu awu, audile amu muaba wa tshijila mu lubanza lua ntenta wa kusambakena.

²⁰Bualu munyinyi wa mulambu wa nanku udi wa tshijila menemene. Tshionsu tshidi tshilenga munyinyi wa mulambu awu netshinyanguke. Padi mashi a nyama awu masampukile ku tshilamba, tshilamba atshi batshisukuile anu muaba wa tshijila.

²¹Padibu balambile munyinyi awu mu luesu lua dibumba, kujika, babishipe. Kadi padibu bakambila mu luesu lua tshiamu tshikunze, balukone, balusukule ne mayi a bungi.

²²Nanku anu bantu balume ba mu meku a batuangaji, ke badi mua kudia munyinyi awu, bualu udi mulambu wa tshijila menemene.

²³Kadi misangu yonsu idibu babuela mu ntenta wa kusambakena ne mashi a nyama wa mulambu bua kukobolola nawu bantu muaba wa tshijila, kabena mua kudia munyinyi wa nyama awu. Bawoshe mu kapia.[20]