Read Tshiluba Yirmeya 1 Bible Online

Yirmeya 1 - Tshiluba bible

Yirmeya 1

¹Mu mukanda emu, badi batuambila malu onsu adi Yirmeya, muana wa Ilkiya muambe, ne adiye muenze. Yirmeya uvua wa mu diku dia batuangaji. Batuangaji abu bavua basombela mu musoku wa Anatote, mu buloba bua bena Binyamine.

²Yoshiya, muana wa Amone, mumane kulala mu bukalenga bua bena Yuda bidimu dikumi ne bisatu,[1] Maweja-Nangila kutuadija kuambila Yirmeya malu onsu aa.

³Maweja-Nangila kumuambila malu tshiakabidi tshikondu tshivua Yoyakime, muana wa Yoshiya, mu bukalenga bua bena Yuda, too ne ku ndekelu wa bukalenga bua Sedekiya, muana mukuabu wa Yoshiya, mmumue ne too ne mu tshidimu tshia dikumi ne tshimue tshia bukalenga ebu, pavuabu bakuata bena Yerushalayime mu ngondu muitanu wa tshidimu atshi, baye nabu mu bupika.[2]

⁴Maweja-Nangila kungambila ne:

⁵— Nkavua mukumanye, tshiyi muanji kukufumba munda mua mamuebe. Nkavua mukusungule, kabayi banji kukulela. Nkavua mukufundile mudimu wa kuya kuambila bisamba bionsu miaku yanyi.

⁶Ke meme kuandamuna ne: — Eyi! Maweja-Nangila Mvidi Mukulu, ntshidi muana mukese. Tshiena mua kuakula munkatshi mua bantu to.

⁷Kadi Maweja-Nangila kungambila ne: — Lekela kuamba ne: ntshidi muana. Neuye kudi bantu bonsu kundi nkutuma. Neubambile miaku yonsu indi nkumanyisha.

⁸Kutshinyi bantu aba to, bualu ndi nebe bua kukusungidila. Ke bivua Maweja-Nangila mungambile.

⁹Pashishe kuololaye tshianza kundengaye mukana, ungambila ne: — Wewe, newambile bantu miaku yanyi.

¹⁰Tangila, lelu ndi nkupa mudimu wa kuenza munkatshi mua bisamba ne makalenga, wa kujuula ne miji, ne wa kushimbula, wa kubutula, ne wa kunyangakaja, kadi kabidi wa kuasulula ne kukuna.

¹¹Pashishe, Maweja-Nangila kunkonka ne: — Yirmeya, udi umona tshinyi? Meme kumuandamuna ne: — Ndi mmona ditamba dia mutshi wa amande, mutshi udi udimuja bantu.[3]

¹²Maweja-Nangila kungambila ne: — Udi mumone bimpe. Meme ndi ndimuija, bualu nenkumbaje tshindi muambe.

¹³Maweja-Nangila kunkonka kabidi ne: — Yirmeya, mpindiewu udi umona tshinyi? Meme kumuandamuna ne: — Ndi mmona luesu lunene, luwule tente ne mayi asaba. Ludi luseke lua ku mutu wa ditunga, lutangila kundi.

¹⁴Pashishe, Maweja-Nangila kunjinguluila ne: — Udi mumone bimpe. Dikenga nedifumine ku luseke lua ku mutu wa ditunga bua kukengesha bantu bonsu badi basomba mu ditunga.[4]

¹⁵Teleja tshindi ngamba: Nembikile bantu bonsu ba mu makalenga a ku mutu kua ditunga. Bamfumu babu nebafike, nebateke nkuasa yabu kumpala kua biibi bia Yerushalayime. Bimana bia Yerushalayime, ne bimenga bionsu bia bena Yuda, nebabinyungulukile bua kubikuata.

¹⁶Nennyoke bena ditunga nanku, bilondeshile mushindu undi mukose tshilumbu tshiabu, bua malu mabi onsu adibu benze. Bantu aba bavua bambenge meme, baye kulambula milambu kudi mvidie mikuabu. Bavua batendelele mvidie, mvidie ivuabu badienzele!

¹⁷Wewe Yirmeya, kolesha muoyi. Umuka! Uye kubambila bionsu bindi nkuambila bua wewe kubamanyisha. Kabatshinyi to. Wewe mubatshine, meme nenkukuatshishe bowa kumpala kuabu.

¹⁸Biangatshile lelu, nenkupeshe bukole. Newikale bu tshimenga tshikolesha ne bimana, bu dikunji dia tshiamu, bu tshimana tshiasa ne tshiamu tshikunze, kumpala kua bena ditunga bonsu, kua bamfumu ba bena Yuda, balombodi ba mu bukalenga, batuangaji ne bantu bakuabu bonsu, badi basomba mu bukalenga.

¹⁹Nebakuluishe, kadi kabena bakutshimuna to. Bualu meme ndi nebe bua kukusungidila. Meme Maweja-Nangila ndi njadika nanku.