Read Tshiluba Yirmeya 11 Bible Online

Yirmeya 11 - Tshiluba bible

Yirmeya 11

¹Maweja-Nangila kungambila ne:

²“Nunemeke ndondu umvua mutue nenu. Kuambaye kabidi ne: — Wambile bena Yuda ne bena Yerushalayime,

³ubumvuije ne: Maweja-Nangila Mvidi Mukulu wa Izrayele, udi wamba ne: Muntu yonsu udi kayi unemeka ndondu undi mutue ne bantu banyi, muntu awu mmuena tshibawu.

⁴Mu matuku amvua mupatule bankambua benu mu dikenga dikole mu Ejipitu, meme kutua nabu ndondu. Meme kubambila ne: Nuteleje bionsu bindi nnuambila, nubikumbaje. Nanku, nenuikale bantu banyi, meme nengikale Mvidi Mukulu wenu. Ke mukenji undi nnuelela.

⁵Nanku, nenkumbaje dilaya dimvua mulaye bankambua benu dia kubapesha ditunga didi ne mabele ne buitshi. Ditunga edi ke dinudi basombe lelu edi.” Meme kuitaba ne: — Eyowa,[83] Maweja-Nangila.

⁶Maweja-Nangila kungambila kabidi ne: — Bualu ebu, ubuambe mu bimenga bia Yuda too ne mu misesu ya mu Yerushalayime: “Nunemeke ndondu utudi batue nenu, numukumbaje.

⁷Bu mumvua nsengelela bankambua benu matuku amvua mubapatule mu Ejipitu, ke mundi nnusengelela nuenu lelu. Ndi nnuambila ne: Itabayi bindi nnuambila.

⁸Kadi bankambua benu bavua babenga kunteleja ne ntema. Bavua batungunuka ne malu abu muvuabu basue, balonda muoyi wabu mubi. Meme kubabela bua bakumbaje ndondu utuvua batue nabu. Bobu kubenga. Ke mumvua ne bua kubanyoka, bilondeshile ndondu wetu awu.”

⁹Pashishe, Maweja-Nangila kuamba kabidi ne: — Bena Yuda ne bena Yerushalayime mbangelele tshifufu tshibi.

¹⁰Badi benzamalu mabi avua bankambua babu benza, kabayi banteleja. Badi banemeka mvidie ya bantu ba bisamba bikuabu, bayitendelela. Nenku bena Yuda ne bena Izrayele mbanyange ndondu umvua mutue ne bankambua babu.

¹¹Ke padi Maweja-Nangila wamba ne: “Ndi mbatumina dikenga bua kubabutula. Bobu bambikila musangu ewu bua kubambuluisha, tshiena mbateleja to.

¹²Diba adi, bantu badi basombe mu bimenga bia Yuda ne mu Yerushalayime, nebapingane kudi mvidie yabu ivuabu balambula milambu. Kadi mu dikenga diabu mvidie eyi kayena mua kubambuluisha nansha.

¹³Mu ditunga dia bena Yuda, tshimenga tshionsu tshidi ne watshi mvidie. Mu musesu onsu wa mu Yerushalayime mudi amu tshilambuilu tshia kulambula mvidie Baale udi utukuatshisha bundu.”

¹⁴Nenku wewe Yirmeya, tshimenga etshi kuena mua kutshilombela kundi. Kuena mua kuntendelela nansha kunsengelela kabidi bualu buatshi to. Bualu padi makenga abakuata nebansengelele bua meme kubambuluisha. Kadi tshiena mua kubateleja to.

¹⁵Maweja-Nangila udi wamba ne: tshisamba tshindi munange katshiena ne muoyi umue to. Tshidibu bakeba kundi mu nzubu wanyi wa tshijila ntshinyi? Badi bela meji ne: padibu bandaya malu, padibu bandambula milambu, dikenga kadiena kabidi mua kubakuata anyi? Ke tshidibu bakeba anyi?[84]

¹⁶Meme kuinyika tshisamba tshianyi dina ne: “Mutshi wa olive udi usasa, ukuama bimuma bisheme.” Kadi munkatshi mua tshipepele tshia mvunde, meme kuosha mabeji atshi, kuosha matamba onsu awu.

¹⁷Maweja-Nangila wa bukole buonsu uvua mukune Izrayele ne Yuda.[85] Kadi udi ubambila lelu ne: nennubutule. Dikenga edi nedinukuate bua bubi bunuvua benze. Bualu nuvua bampende, balambule mvidie Baale milambu.

¹⁸Maweja-Nangila uvua mungambile malu mabi adi baluishi banyi bakeba kungenzela. Nanku, ndi mumanye malu abu.[86]

¹⁹Mvua muana wa mukoku udibu baye nende ku tshishipelu, kayi ubenga. Tshivua mumanye ne: badi bangelela meji mabi. Bavua bambilangana ne: “Tujule mutshi patshidi wu ne bukole. Tuupule. Nanku muntu kamanyi ne: mutshi udi muaba ewu.”

²⁰Kadi wewe Maweja-Nangila wa bukole buonsu, udi ndumbulula udi ukosa nsambu pa yoyi. Udi mumanye malu onsu adi mu muoyi wanyi wa muntu.[87] Ndi musue kumona muudi unyoka baluishi banyi. Bualu meme ndi mufile tshilumbu tshianyi mu bianza biebe.

²¹Ke mudi Maweja-Nangila wa bukole buonsu ne bualu budiye musue kuambila bena Anatote,[88] badi bakeba kunshipa. Bena musoku wetu badi bankandika ne: “Kuena mua kuikala kabidi muambi udi umanyisha bantu malu mu dina dia Maweja-Nangila. Tshianana tudi tukushipa.”

²²Nanku, Maweja-Nangila udi wandamuna ne: “Nennunyoke. Bansongalume benu nebafue mu mvita. Tshiyole tshia nzala netshishipe bana benu ba balume ne ba bakaji.

²³Mu musoku wa Anatote kamuakushala muntu ne muoyi tshikondu tshinganunyoka, tshinganukengesha.”