Read Tshiluba Yirmeya 15 Bible Online

Yirmeya 15 - Tshiluba bible

Yirmeya 15

¹Kadi Maweja-Nangila kungambila ne: — Nansha Moshe ne Samuwele bandombe[102] bua kufuila bantu aba luse, tshiena mua kuanyisha to. Yirmeya, ubipate, ubumushe kundi, baye!

²Pikalabu bakukonka ne: “Netuye penyi” wandamune ne: Maweja-Nangila udi wamba ne: Muntu yonsu neaye muaba udibu bamufundile. Udibu bafundile disama dia tshiambu neadipete. Udibu bafundile kufua mu mvita, neafuilemu. Udi ne bua kufua ku tshiyole tshia nzala, neafue. Udibu ne bua kuya nende mu bupika, nebaye nende![103]

³Maweja-Nangila udi wamba ne: nembakengeshe mishindu inayi: muele wa mvita neubashipe, mbua neyikoke bitalu iye nabi kule, nyunyi ya mikanku neizokole bitalu, nyama ya mibuabua neidie bionsu bidi bishale.

⁴Nanku makalenga onsu a panshi pa buloba neakuatshike bowa, pamonawu malu onsu aa. Ke mudibu banyoka bantu bua malu mabi avua Menashe, muana wa Izkiya, mukalenga wa bena Yuda, muenze mu Yerushalayime.[104]

⁵Maweja-Nangila udi wamba ne: Bena Yerushalayime, kakuena muntu udi mua kunufuila luse kabidi to. Kakuena muntu udi mua kunudila, kakuena muntu udi uditatshisha bua kunuebeja ne: malu kaayi?

⁶Maweja-Nangila udi wamba ne: Nuenu ke badi bambenga, bangela nyima. Ke mumvua mufike bua kunubutula, bualu bidi bintonda bua kunufuila luse.

⁷Mu tshimenga tshionsu tshia ditunga, mvua muenze ne bantu banyi bu muntu udi upepula bintu, bua lupepele luya ne bisota.[105] Mvua mutangalaje bantu banyi. Mvua mushipe bana badibu balela. Kadi kabavua bapingane kundi.

⁸Mu ditunga amu, bakaji bakamba bavua bashale bapite lusenga lua ku muelelu wa mayi manene ku bungi. Meme kunyingalala munda munya, mamuende wa nsongalume, uvua tshilobu tshia mvita.[106] Diakamue meme kukuatshisha mamuende bowa ne kanyinganyinga.

⁹Mamu muena bana muanda mutekete, uvuabu bela ka lumbandi, udi ushala kayi ne muana. Kena ne mushindu wa kueyakana bimpe kabidi to. Diende diba divua dibuela munda munya. Bundu buamukuatshi! Lumu luende ndujimine! Pikala bakuabu bashale ne muoyi, baluishi babu nebabashipe. Meme Maweja-Nangila ndi njadika nanku.

¹⁰Mamu wanyi, ndi muena diakabi! Udi mundele bua tshinyi? Miaba yonsu mu ditunga badi amu bambenga, badi amu banduisha! Kadi meme tshiena musombe, tshiena musombeshe muntu tshintu. Mudi bantu bonsu bangela mulawu mmunyi?

¹¹Eyowa, Maweja-Nangila, milawu yabu idi mua kunkuata, bu meme tshiyi mukuenzele mudimu muanyi muonsu,[107] bu meme tshiyi muakuile baluishi banyi kumpala kuebe, diba divuabu mu dikenga, banyingalala!

¹²Badi mua kutshibula tshiamu tshifike, nangananga tshidi tshifumina ku mutu kua ditunga, nansha tshiamu tshikunze anyi?[108]

¹³Yuda, ndi musue bua baluishi bapawule biuma biebe ne bintu biebe bionsu. Ke mudibu bakunyoka bua malu mabi auvua muenze miaba yonsu mu ditunga diebe.[109]

¹⁴Nenkufile kudi baluishi bebe,[110] bua baye nebe ku bupika, mu ditunga diudi kuyi mumanye. Bualu tshiji tshianyi ntshimane kutema bu kapia. Ndi mukufikile munda.

¹⁵Kadi wewe, Maweja-Nangila, udi mumanye bimpe malu anyi onsu. Umvuluke, ungambuluishe. Unsombuele kudi baluishi banyi, Wewe mulame lutulu kuyi ubanyoka lukasa, nebanshipe. Umanye ne: bipendu ebi ndi mbilengulula anu bualu buebe.

¹⁶Paudi mungambile malu, diakamue meme kuteleja bimpe, kuvuluka muaku webe onsu. Muaku webe kunguwuja ne disanka, kungenza muena diakalenga. Bualu mbanjidile mu dina diebe wewe, Maweja-Nangila wa bukole buonsu.

¹⁷Tshivua muye kusomba ne bantu bakuabu, bua kuseka nabu nansha. Bualu udi munteke tshianza tshiebe pambidi, munsombeshe ku mpenga pa nkayanyi, tshiji tshiudi mutekele bantu abu ntshimbuele munda bikole.

¹⁸Kadi dikenga dianyi kadiena dijika bua tshinyi? Mudibu kabayi mua kuondapa mputa yanyi mmunyi? Mudi mputa wanyi kayi uma mbishi? Bushuwa, wewe kundinga mudi musulu mume udinga bantu badi bakeba mayi kabayi baasangana!

¹⁹Kadi Maweja-Nangila kungandamuna ne: Wewe mupingane kundi, nenkuakidile, ushale muena mudimu wanyi. Pawikala kuyi wamba kabidi malu a tshianana, kadi umanyishe bantu malu adi ne bualu,[111] newikale tshiakabidi muambi wanyi. Meme nengikale mukana muebe. Bena Yuda badi ne bua kukulonda, kadi wewe kuena ne bua kubalonda bobu!

²⁰Wewe muenze bindi ngamba, kabakukuenzela bibi to. Nebakuluishe, kadi kabakukutshimuna to. Bualu nenkuenze bu tshimana tshienza ne tshiamu tshitoke, tshidibu kabayi mua kunyungisha. Bualu ndi nebe, bua kukusungidila, kukupandisha. Ke mundi ngamba meme Maweja-Nangila.[112]

²¹Nenkupatule ku njiwu yonsu, tshiakukushiya mu bianza bia badi bakukengesha to.