Read Tshiluba Yirmeya 17 Bible Online

Yirmeya 17 - Tshiluba bible

Yirmeya 17

¹— Tshilema tshia bena Yuda tshidi mu muoyi wabu kashidi. Tshidi amu bu miaku idibu bafunde ne ntapu wa tshiamu, nansha ne lusongu lua dibue dia mbongu. Bavua batshifunde kabidi ne ku matumba adi ku bilambuilu[115] biabu.

²Bualu bena Yuda badi batendelela mvidie, bayilambula milambu, bayashila makunji kuinshi kua mitshi, pa mikuna,[116]

³ne mu mpata mitumbuke.[117] Nuenu bena Yuda telejayi. Ndi ntuma bantu, bua kupawula biuma bienu bionsu, bua banyange miaba inudi nutendelela. Ke mundi nnunyoka bua bubi bunudi nuenza mu ditunga dijima.

⁴Nenushiye ditunga divua dienu, dimvua meme munupeshe. Ndi nnutuma mu bupika, mu ditunga dinudi kanuyi bamanye. Bualu nudi balundule tshiji tshianyi. Tshikadi bu kapia kadibu kabayi mua kujima.

⁵Maweja-Nangila udi wamba ne: — Ndi ndiwula muntu yonsu udi umbenga meme, utekemena kudi muntu mukuabu, ukeba bukole anu kudi bantu badi kabayi nabu.

⁶Muntu awu kena mua kupeta diakalenga to. Udi anu bu mutshi udi uma mu mpata, bu mutshi udi munkatshi mua mabue adi mu tshipela, mu buloba buatuke, budi muntu nansha umue kayi wasa.

⁷Kadi muntu udi utekemena kundi, udi ukeba ditalala kundi, ndi mmuela lupemba.

⁸Muntu awu neikale bu mutshi, udibu bakuna ku muelelu wa mayi. Miji yawu idi ifika ne ku mayi. Mutshi awu kawena utshina tshintu.[118] Nansha mu munya mukole, mabeji awu adi amu mabishi. Nansha mu tshikondu tshia munanga mukole, mutshi awu kawena ufubidila. Udi ukuama amu kukuama bimuma.

⁹— Udi mua kumanya muoyi wa muntu nnganyi? Muoyi wende udi usama, kabayi mua kuondapa. Udi udinga bantu, kabayi mua kujingulula.

¹⁰Maweja-Nangila udi wamba ne: — Meme ndi mmona munda mua muoyi. Ndi mumanye malu masokome a bantu. Ke mundi mua kupesha muntu bidiye ne bua kupeta, bilondeshile malu adiye wenza.[119]

¹¹Mudi nzolu uladila mayi a dibata,[120] ke mudi muntu udi upeta bubanji mu buivi. Patshidiye ne bukole, bintu biende bidi bimujika. Yeye mumane kukulakaja, udi bu muntu mutatakane.

¹²Nzubu wetu wa tshijila[121] wa Maweja-Nangila udi ne nkuasa wa butumbi, udi ku mutu kua bionsu biangatshile ku ntuadijilu.

¹³Maweja-Nangila, bena Izrayele badi bakutekemena amu wewe. Nanku badi bakubenga, bundu buasangana kubakuata anyi? Buabakuata! Bonsu badi bakubenga wewe, mbajimine bu mena adibu bafunde mu lupuishi. Bualu mbumuke kuudi wewe, Maweja-Nangila mpokolu wa muoyi.[122]

¹⁴Maweja-Nangila nempete bukole, anu paudi wewe ujikija disama dianyi. Nempande, anu paudi wewe umpandisha. Bualu undi mua kutumbisha pa bualu udi anu wewe nkayebe.

¹⁵Bantu bonsu badi bankonka ne: “Makenga adi Mvidi Mukulu mutulaye adi penyi? Atukuate mene tumone!”

¹⁶Maweja-Nangila, meme tshivua mukusake bua wewe kubatumina dikenga.[123] Tshivua mujinge ne: babutuke. Amu wewe ke uvua mujadike malu onsu amvua muambe.

¹⁷Udi musue kunkuatshisha bowa anyi? Kadi kundi mua kunyemena mu tshikondu tshia dikenga, kudi anu kuudi wewe!

¹⁸Bantu badi bankengesha, bundu bubakuate amu bobu! Kadi kabunkuatshi meme! Bowa kabidi bubakuate amu bobu! Kabunkuatshi meme! Ubatumine dituku dia dikenga. Ubazaze kashidi.

¹⁹Maweja-Nangila kungambila ne: — Nanku, wimane ku tshiibi tshia Bantu tshia ku tshimenga, tshidi bakalenga ba bena Yuda babuelela, bapatukila. Pashishe, wenze nanku kabidi ku biibi bikuabu bia mu bimenga.

²⁰Wambile bantu bonsu badi bapitshile ku mishiku ayi ne: “Nuenu, bakalenga, nuenu kabidi bena Yuda ne bantu bonsu badi basombe mu Yerushalayime, telejayi tshidi Maweja-Nangila wamba ne:

²¹Panudi basue kushala ne muoyi, dituku dia Dikisha ka-nuambudi bujitu. Kanuena mua kupitshila nabu ku biibi ebi.[124]

²²Dituku adi kanuena mua kupatula bintu mu nzubu yenu. Kanuena mua kuenza mudimu. Bualu dituku adi ndianyi meme, bu mumvua muambile bankambua benu.[125]

²³Bushuwa bankambua benu kabavua banteleje, kabavua bavuluke bimvua muambe. Bavua bantombokele. Bavua ne tshitunu, babenge mikenji yanyi.

²⁴“Meme Maweja-Nangila ndi ngamba ne: Nuenu bonsu nunteleje bimpe. Dituku dia Dikisha kanupitshidi ne bujitu ku biibi bia bimenga. Nunemeke dituku edi, dikale dianyi meme. Midimu yonsu ipumbe.

²⁵Diba adi, bakalenga badi mu nkuasa wa Davide, badi babanda pa nyama ya tubalu nansha pa matempu, balombodi babu ba mu bukalenga, bena Yuda ne bantu badi basomba mu Yerushalayime, bonsu nebapitshile amu kupitshila ku biibi bia bimenga. Tshimenga atshi netshikale kashidi ne bantu badi basombamu.

²⁶Nanku, bantu nebabuele mu nzubu wa Mvidi Mukulu, bafume ku bimenga bia Yuda, ku buloba bua ku mpenga kua Yerushalayime, ku buloba bua bena Binyamine, ku matunga a ku muelelu wa mayi, ne a ku mutu, ne a kuinshi kua ditunga. Bantu nebafike bua kulambulamu milambu mishilangane, bintu bia mu madimi ne kamonya, ne milambu ya kuela tuasakidila.

²⁷Kadi nuenu kanuyi banteleje, nuenu balengulule dituku dianyi dia Dikisha, nuenu bapitshile ku biibi bia mu Yerushalayime dituku adi ne bujitu panyima, nengoshe tshimenga. Kapia nekabutule nzubu mimpe yonsu, kabayi mua kukajima.”