Read Tshiluba Yirmeya 18 Bible Online

Yirmeya 18 - Tshiluba bible

Yirmeya 18

¹Maweja-Nangila kuntumina diyi ne:

²— Yirmeya, juka uye kua mufumbi wa ngesu. Pawafika, nenkuambile bualu bundi musue kukumanyisha.

³Meme kufika kua mufumbi wa ngesu, kumusangana wenza mudimu wende.

⁴Pavua luesu luvuaye ufumba kaluyi luimpe, mufumbi uvua wangata buloba bua diima abu, wenzulula nabu luesu lukuabu, muvuaye musue.

⁵Nenku Maweja-Nangila kungambila ne:

⁶“Nuenu bena Izrayele, meme Maweja-Nangila tshiena ne bukole bua kuenza nenu mudi mufumbi wa ngesu ewu wenza anyi? Nudi mu tshianza tshianyi, bu buloba bua diima mu tshianza tshia mufumbi.

⁷Musangu mukuabu ndi musue kubutula, kunyanga, nansha kushimbula ditunga anyi tshisamba.[126]

⁸Kadi, padi bena ditunga edi babenga malu abu mabi avua abakebela tshiji kundi, ndi nkudimuna meji amvua nawu, ngumusha makenga amvua mubalongoluele.

⁹Misangu mikuabu, ndi musue kuibakulula, kukuna tshiakabidi ditunga nansha tshisamba.

¹⁰Kadi padi tshisamba etshi tshienza malu andi mubenge, tshipanga kuteleja mibelu yanyi, tshiena nkumbaja malu mimpe amvua mubalaye nansha.”

¹¹— Yirmeya, mpindiewu ambila bena Yuda ne badi basombe mu Yerushalayime ne: “Maweja-Nangila udi wamba ne: ndi mupangadike bua kununyoka. Ndi nnulongoluela dikenga. Muntu yonsu alekele kuenza malu mabi. Nukudimune malu enu, enzayi amu malu mimpe.”

¹²Kadi badi bandamuna ne: “Nansha kakese! Katuena basue kuenza malu mimpe. Netuenze anu malu mabi, netuikale bena tshitunu amu mutudi basue.”

¹³Maweja-Nangila udi wamba ne: Konkayi bantu ba bisamba bikuabu, bakadi bumvua bantu balonda bualu nenku anyi? Bualu buvua bena Izrayele benze budi bupite bubi.

¹⁴Nukadi bamona nsongu ya mikuna ya Lebanone kayiyi ne neje anyi? Musulu wa mayi a muenji mukole udi mua kukama anyi? To![127]

¹⁵Kadi bantu banyi bakadi bampue muoyi. Badi balambula milambu kudi mvidie idi kayiyi mvidie mene. Ke mudibu badishinde mu njila wabu, ke mudibu bumuke mu njila wabu wa kale, benda mu njila udi bantu kabayi banji kuenda.

¹⁶Bantu banyi bavua banyanga ditunga diabu bikole. Ke mudi bantu badi bapitshila mu njila bakema, bazakala, bakupa mitu, bakuatshika bowa.

¹⁷Padi muluishi usemena pabuipi, nentangalaje bantu banyi, mudi lupepele lua kudi diba dipatukila lujula lupuishi. Nembele nyima! Tshiakubambuluisha diba dia dikenga.[128]

¹⁸Bantu bakuabu bavua bamba ne: “Tuyayi, tuelela Yirmeya tshitungu amu mpindiewu. Bualu batuangaji badi mua kutulongesha, tudi amu nabu. Tudi ne bena meji, bua bafile ngenyi. Tudi ne bambi badi mua kutumanyisha tshidi Mvidi Mukulu wamba. Tumufunde ku tshilumbu, katuteleji kabidi tshidiye wamba.[129]”

¹⁹Maweja-Nangila, teya matshi kundi, teleja tshilumbu tshidi baluishi banyi bamfunde.

²⁰Badi mua kupingaja bubi pa buimpe anyi? Apu badi bateya buteyi bua kunkuata. Kadi vuluka mumvua muimane kumpala kuebe bua kubakuila, bua kaubafikidi munda.

²¹Kadi mpindiewu wanyishe bua tshiyole tshia nzala tshishipe bana babu, bua muele wa mvita ubabutule bonsu, bua bakaji babu bashale bianza bitupu, kabayi bamona bana, bafuishe kabidi babayabu. Disama dia tshiambu dikuate bantu balume, dibabutule. Bansongalume bafuile mu mvita!

²²Tuma bantu bena mvita bua kubaluisha diakamue. Tumvue muadi wabu. Bualu badi badilongolole bua kunkuata, banteya mu makasa.

²³Wewe Maweja-Nangila udi mumanye bionsu, bidibu benza bua kunshipesha. Kuena mua kubafuila luse. Kuena mua kulengulula bilema biabu. Ubele panshi, ubaleje tshiji tshiebe!