Read Tshiluba Yirmeya 19 Bible Online

Yirmeya 19 - Tshiluba bible

Yirmeya 19

¹Maweja-Nangila kuambila Yirmeya ne: — Uye kudi mufumbi, usumbe mulondu wa diima. Pashishe wangata batuangaji, bamue bakulu, ne bantu bakuabu, uye nabu.[130]

²Upatukile nabu bua kuya mu tshibanda tshia Inome,[131] upitshile ku tshiibi tshia Ngesu mifue. Nenkumanyishe bualu buudi ne bua kubambila muaba awu.

³Newambe ne: “Nuenu bakalenga ba bena Yuda, ne bena Yerushalayime, telejayi tshidi Maweja-Nangila Mvidi Mukulu wa bukole buonsu wa Izrayele wamba. Nentume dikenga muaba ewu. Bantu badi bumvua batela dikenga adi, matshi abu neapate bu bumvua dikubakuba.

⁴Bualu bena Yuda mbambenge. Mbandamune muaba ewu, ukadi wa tshianana. Bavua balambuilapu mvidie ya bantu ba bisamba bikuabu milambu. Ke mvidie buabu kabayi bamanye, nansha bobu nansha bankambua babu, nansha bakalenga ba bena Yuda. Bavua buwuje muaba ewu ne mashi a bantu bavua kabayi ne bualu.

⁵Bavua balongoluela mvidie Baale muaba wa kumutendelela, bua kumuoshilapu bana babu milambu. Kadi meme tshivua mutume diyi, bua benze bualu bua nanku to! Tshivua nansha mubuambe. Tshivua nansha mubuelele meji.[132]

⁶“Ke pandi ngamba ne: Dituku nedifike didibu kabayi binyika kabidi muaba ewu ne: ‘Tofete,’ nansha ne: ‘Tshibanda tshia Inome.’ Kadi nebawinyike ne: ‘Tshibanda tshia kushipela bantu.’

⁷Muaba ewu nempangishe bena Izrayele ne bena Yuda, bua kabakumbaji tshidibu bela meji. Nemfile bantu aba kudi baluishi babu badi kabayi ne luse. Nenganyishe bua bitalu biabu babizokole kudi nyunyi ya mikanku, babidie kudi nyama ya mibuabua.

⁸Tshimenga etshi netshi kemeshe bantu bonsu. Bapitshi ba mu njila nebazakale. Nebele mbila ya bowa, patangilabu muvuabu banyange tshimenga etshi.[133]

⁹Baluishi, bantu badi kabayi ne luse, nebakuate tshimenga. Nebakengeshe bantu bikole bipite. Nanku benatshi nebadie minyinyi ya bana bavuabu balele. Nebadiangane bobu nkayabu!”

¹⁰Pashishe, neushipe mulondu, bonsu baudi nabu batangile.

¹¹Neubambile ne: “Maweja-Nangila wa bukole buonsu udi wamba ne: nenshipe bantu aba ne tshimenga etshi, amu mudibu bashipa mulondu wa diima, kabayi mua kuufimba kabidi.” “Nebajike bantu mu Tofete, bualu kakuena muaba mukuabu wa bafue[134] to.

¹²Meme Maweja-Nangila ndi ngamba ne: tshimenga ne bantu badi basombamu, nebikale amu bu muaba wa Tofete.

¹³Nzubu ya mu Yerushalayime ne ya bakalenga ba mu Yuda neikale ne mikiya bu muaba ewu wa Tofete. Bualu kulu kua nzubu eyi bavua balambuilaku musenga wa kamonya, bua kutendelela tshituilu tshia mitotu, bavua balambuilamu mvidie ya bantu ba bisamba bikuabu milambu ya maluvu.”

¹⁴Yirmeya kumuka mu Tofete, kuvua Maweja-Nangila mumutume bua kulongesha bantu. Kufikaye mu lupangu lua nzubu wa Mvidi Mukulu. Kuambilaye bonsu bavuamu ne:

¹⁵— Maweja-Nangila Mvidi Mukulu wa Izrayele udi wamba ne: “Nentume makenga onsu amvua muambe ku tshimenga etshi ne mu misoku idi pabuipi natshi. Bualu badi basamu mbantombokele. Kabena bateleja diyi dianyi.”