Read Tshiluba Yirmeya 25 Bible Online

Yirmeya 25 - Tshiluba bible

Yirmeya 25

¹Umvuayi malu avua Maweja-Nangila muleje Yirmeya, adi atangila tshisamba tshijima tshia bena Yuda. Tukavua mu tshidimu tshinayi tshivua Yoyakime, muana wa Yoshiya, mu bukalenga bua bena Yuda,[167] ne mu tshidimu tshia kumpala tshia bukalenga bua Nebukadnesare, mukalenga wa bena Babilone.

²Yirmeya kuambila bena Yuda ne bena mu Yerushalayime ne:

³— Kutuadija ku tshidimu tshia dikumi ne tshinayi tshivua Yoshiya, muana wa Amone, mu bukalenga bua bena Yuda too ne lelu, kukadi bidimu makumi abidi ne bisatu bindi nnubela, tshiyi ndekela, nnuambuluila amu malu adi Maweja-Nangila ummanyisha. Kadi kanuena nuateleja to.

⁴Maweja-Nangila uvua unutumina amu kunutumina bambi[168] bena mudimu bende, kadi kanuena babateleje nansha. Kanuvua bateya matshi bua kumvua tshivuabu bamba.

⁵Maweja-Nangila kunuambila ne: “Muntu yonsu wa kunudi adilengeje, alekele malu mabi adiye wenza! Nanku, nenusombe kashidi ne kashidi mu ditunga edi dimvua munupe nuenu ne bankambua benu.

⁶Panualekela kulonda mvidie ya bantu ba bisamba bikuabu, kuyikukuila, kuyitendelela, panualekela kumfikisha munda ne mvidie yenu inuvua nudienzela, nanku tshiakunuenzela bibi to.”

⁷Maweja-Nangila udi wamba ne: kanuvua banteleje to. Nanku bu munuvua bamfikisha munda ne mvidie inuvua benze, nenupete diakabi.

⁸Maweja-Nangila wa bukole buonsu udi wamba ne: “Kanuvua bateleje tshindi ngamba.

⁹Nanku nembikile bantu bonsu ba mu matunga a ku mutu kua ditunga,[169] ne nangananga muena mudimu wanyi Nebukadnesare, mukalenga wa bena Babilone, bua baluishe ditunga edi, ne bantu badi basombamu. — Nebaluishe kabidi bisamba bidi nabu mutumba. — Nennubutule bonsu, nuenu ne bena mutumba nenu. Mu ditunga emu nemushale amu tshipela ne lubuwa. Bantu nebakeme bela mbila ya bowa pa kumona muaba ewu. Meme Maweja-Nangila ndi ngamba nanku.

¹⁰Meme nenjikije maja mu bibilu bienu, mbila ya disanka, ne misambu ya batshidi baselangana. Bantu kabakuikala kabidi ne ntete ya kutua mu tshinu, nansha ne mafuta a kuela mu muendu.[170]

¹¹Musoku wenu ewu newikale amu tshipela. Bisamba bionsu ebi nebikale mu bianza bia Nebukadnesare, mukalenga wa bena Babilone, bidimu makumi muanda mutekete.[171]

¹²Maweja-Nangila udi wamba kabidi ne: Pajika bidimu bionsu makumi muanda mutekete ebi, nentangile tshibawu tshia Nebukadnesare, mukalenga wa bena Babilone, ne tshia bantu bende. Nenyoke ditunga diabu. Nedishale kashidi tshipela tshienza bowa.

¹³Nentume mu ditunga edi makenga onsu amvua mumane kuamba. Bavua bafunde makenga aa mu mukanda ewu. Ke malu adi muambi Yirmeya mumanyishe bantu ba mu bisamba bionsu mu dina dianyi.

¹⁴Nanku bena Babilone kabidi nebabuele ku bumfumu bua bantu ba bisamba bikuabu, ne bua bakalenga banene. Nembasombuele ku malu mabi onsu avuabu benze.”

¹⁵Maweja-Nangila Mvidi Mukulu wa Izrayele uvua mungambile ne: “Ndi nkupesha dikopu edi dia mvinyo, didi tente ne tshiji tshianyi. Udiangate, udinuishe bantu ba bisamba bionsu miaba yonsu indi nkutuma.

¹⁶Bantu ba bisamba bionsu ebi badinue, tshinyungu tshibakuate! Bazakale pa kumona mundi nshipa bantu munkatshi muabu!”

¹⁷Meme Yirmeya kuangata dikopu divua Maweja-Nangila mumpeshe. Meme kudimusha bisamba bionsu, miaba yonsu ivua Maweja-Nangila muntume.

¹⁸Meme kutuadija kunuisha bena mu Yerushalayime, bena mu bimenga bia Yuda, bakalenga ba balombodi ba mu bukalenga, bua kubabutula bonsu. Ditunga diabu ndishale lubuwa. Bionsu ebi, nebikemeshe bantu. Nebibeleshe bibingu. Nanku bantu nebatshipe batela tshilejilu tshiabu.

¹⁹Pashishe meme kunuisha bisamba bikuabu. — Ke mukalenga wa bena Ejipitu, ne balombodi bende ba mvita, ne balombodi bende ba bukalenga, kabidi ne bantu bende bakuabu bonsu,

²⁰ne bantu ba mu bisamba bishilangane badi basombe mu Ejipitu; — ke bakalenga ba ditunga dia Uze;[172] — ke bakalenga ba bena Peleshete: bakalenga ba mu Askalone, ba mu Ngaza, ba mu Ekrone ne bena Ashidode bavua bashale ne muoyi;

²¹— ke bena Edome, bena Mowabe ne bena Amone;

²²— ke bakalenga bonsu ba mu Tire, ba mu Sidone, ne ba ku matunga adi dishiya dia mayi manene;

²³— ke bantu ba mu Dedane, ba mu Tema, ba mu Buza, too ne bantu badi badibeya nsuki ku matama;[173]

²⁴— ke bakalenga ba bena Arabe, ne bisamba bishilangane bidi bisombe mu tshipela;

²⁵— ke bakalenga bonsu ba mu Zimri,[174] ba mu Elame, ne bena Madayi;

²⁶— ke bakalenga bonsu ba mu matunga adi ku mutu kua matunga, nansha badi basombe pabuipi, nansha badi basombe kule. Nanku makalenga onsu avua pa buloba avua ne bua kunua dikopu malondangane. Ku ndekelu, meme kunuisha kabidi mukalenga Sheshake.[175]

²⁷Maweja-Nangila kuntuma bua kubambila ne: “Maweja-Nangila wa bukole buonsu Mvidi Mukulu wa Izrayele udi wamba ne: Nunue, mikuatshike, nuluke, too ne munuadishinda panshi, kanuyi mua kujuka kabidi. Bualu nenumone mundi nshipa bantu munkatshi muenu.”

²⁸Maweja-Nangila kuamba kabidi ne: “Nenunue amu kunua. Ke mukenji udi Maweja-Nangila wa bukole buonsu unuelela.

²⁹Tshiena mfuila tshimenga tshidi tshianyi meme luse. Ke nuenu kuela meji ne: katuena bena tshibawu. Nentume muele wa mvita, bua ushipe bantu bonsu badi mu buloba bujima. Ke mundi meme Maweja-Nangila wa bukole buonsu ngamba.”

³⁰Maweja-Nangila kungambila kabidi ne: — Ubambile bionsu bindi nkuambila ebi, usakidila kabidi ne: Mulu muamua Maweja-Nangila udi ukungula, mudi nyama wa ntambue wenza. Mu nzubu wende wa tshijila, udi wela diyi dikole. Udi ukungula ulekela bantu bende tshiji. Mudi bantu bela mbila padibu bakama tumuma tua mvinyo, batudiata, Mvidi Mukulu kabidi udi wela mbila mikole.

³¹Mutoyi udiye wenza udi ufika kudi bantu bonsu ba pa buloba, too ne ku ndekelu kua buloba. Maweja-Nangila udi wasa bisamba bionsu tshilumbu, ubibikila ku kabadi kende. Kadi bantu bonsu bena tshibawu neabashipe. Ke tshivua Mvidi Mukulu mungambile.

³²Maweja-Nangila wa bukole buonsu udi wamba ne: Dikenga nedibuele mu ditunga ne mu ditunga. Mvunde udi ujuka, ufumine ku ndekelu kua buloba.

³³Dituku dikale malu aa mua kuenzeka, kakuakuila muntu nansha umue pa buloba bujima udi mua kudila bantu badi Maweja-Nangila ushipa. Kakuakuila muntu udi mua kuambula bitalu biabu bua kubajika. Nebishale panshi bu bufuke budi bufukisha buloba.

³⁴Asayi muadi, elayi nshiba, nuenu balombodi ba bantu. Nubunguluke panshi mu lupuishi, nuenu balami ba bantu. Bualu matuku akumbanyi a nuenu kuya ku tshishipelu. Nebanushipe mudibu bashipe bimpanga bimpe.[176]

³⁵Bualu balombodi kabakuikala ne mushindu wa kunyema. Balami ba bantu kabakuikala ne mushindu wa kuya kusokoma!

³⁶Ndi ngunwua mbila yabu, miadi yabu nya bantu badi mu dikenga! Bualu Maweja-Nangila ke udi unyanga ditunga dienu didi dinudisha.

³⁷Tshiji tshiende tshikole tshidi tshinyanga mpata yenu milenga, ishala tshipela, muaba wa lufu.

³⁸Maweja-Nangila udi mushiye ditunga diende, mudi nyama wa ntambue ushiya muaba utuye ulala. Ditunga diabu ndiandamuke tshipela, bualu bua mvita mibi, ne bua tshiji tshikole[177] tshivua Maweja-Nangila natshi.