Read Tshiluba Yirmeya 27 Bible Online

Yirmeya 27 - Tshiluba bible

Yirmeya 27

¹Sedekiya,[182] muana wa Yoshiya, kudiaye bumfumu mu bukalenga bua bena Yuda. Matuku makese mamane kupita, Maweja-Nangila kumanyisha Yirmeya ne:

²— Udienzele mabaya, kabidi ne mionji, mitshi ya kuambula nayi bujitu. Uyambule pa makaya.

³Pashishe, uyitume kudi mukalenga wa bena Edome, wa bena Mowabe, wa bena Amone, kudi mukalenga wa bena Tire, too ne kudi mukalenga wa bena Sidone. Bua bakalenga aba bayipete, ufile mitshi eyi kudi bamienampala ba bakalenga abu bavua bafika mu Yerushalayime bua kumonangana ne Sedekiya mukalenga wa bena Yuda.

⁴Bamienampala abu, ubambile ne: Numanyishe bakalenga tshidi Maweja-Nangila wa bukole buonsu Mvidi Mukulu wa Izrayele, ubambila ne:

⁵Mvua muleje bukole buanyi ne meji anyi, pamvua mufuke buloba, bantu ne nyama bidi bisombamu. Tshindi mufuke, ndi ntshifila kudi muntu undi musue.

⁶Nanku ndi mujadike bua kufila matunga enu onsu, too ne nyama ya muitu, kudi muntu wanyi Nebukadnesare, mukalenga wa bena Babilone.

⁷Matunga onsu neikale ku bumfumu buende, ku bumfumu bua muanende, ne bua muikuluende. Kadi tshikondu netshifike tshidi baluishi bakuata ditunga diende. Nedishale ku bumfumu bua matunga adi madipite ku bukole. Mukalenga wadi neikale ku diyi dia bakalenga badi bamupita bukole.

⁸Pikala bena tshisamba kampanda, anyi bena bukalenga, babenga kuitaba ku diyi dia mukalenga Nebukadnesare, nansha babenga kuambula mutshi wa bupika udiye ubateka pa makaya, nembanyoke ne mvita, ne tshiyole tshia nzala, kabidi ne disama dia tshiambu. Nengambuluishe Nebukadnesare bua amone mua kubutula bantu aba.[183]

⁹Nanku, nuenu kanuteleji bambi benu to. Kanuteleji batshidi banuambila malu adi kumpala, banudinga ne: ke atuvua bamone mu ndota, mu mbuku, ne mu majimbu. Bualu bonsu badi banuambila ne: Kanuitabi ku diyi dia mukalenga wa Babilone.

¹⁰Badi banudinga. Nuenu babateleje, nebaye nenu muaba mule. Nennuipate mu buloba buenu, nennubutule.

¹¹Kadi pikala bena tshisamba kampanda mua kuambula mutshi wa bupika udi mukalenga wa mu Babilone muteke pa makaya abu, bitabe ku diyi diende, nebashale mu buloba buabu. Nebasombe, badime. Ke mundi meme Maweja-Nangila ngamba nanku.

¹²Yirmeya uvua mumanyishe Sedekiya, mukalenga wa bena Yuda, malu a mushindu umue, umuambila ne: — Wewe ne bantu bebe, nudi ne bua kuanyisha mua kuambula mutshi wa bupika udi Nebukadnesare, mukalenga wa mu Babilone, muteke pa makaya enu. Numuenzele mudimu, yeye ne bantu bende. Nanku kanuakufua to.

¹³Wewe ne bantu bebe, nudi basue kufua mu mvita, ku tshiyole tshia nzala, nansha ku disama dia tshiambu, anyi? Bualu Maweja-Nangila mmuambe ne: tshisamba tshionsu tshidi tshibenga kuenzela Nebukadnesare, mukalenga wa mu Babilone mudimu, netshibutuke.

¹⁴Kanuteleji bambi badi banuambila ne: kanuena mua kuenzela mukalenga wa mu Babilone mudimu to. Badi banudinga.

¹⁵Maweja-Nangila udi ujadika ne: “Tshiena mutume bambi abu to. Padibu bambila bantu malu mu dina dianyi, badi babadinga. Panudi nubateleja, nennuipate muaba ewu. Nenufue, nuenu ne bambi badi banumanyisha malu aa.”

¹⁶Yirmeya uvua umanyisha kabidi batuangaji, ne bantu bakuabu bavua muaba awu, bivua Maweja-Nangila mumuambile bualu buabu ne: — Kanuteleji bambi badi banuambila ne: bintu bia tshijila bia mu nzubu wa Mvidi Mukulu bivuamu Babilone,[184] nebipingane mu Yerushalayime amu mpindiewu. Badi banudinga.

¹⁷Kanubateleji to. Enzelayi amu mukalenga wa mu Babilone mudimu. Nanku kanuakufua to. Tshimenga etshi ki mbimpe batshibutule nansha.

¹⁸Yirmeya kuamba kabidi ne: — Pikala bantu aba bambi balelela, pikalabu bamba malu adi Maweja-Nangila wamba, basengelele Maweja-Nangila wa bukole buonsu, bua biuma bidi bishale mu nzubu wa Mvidi Mukulu, mu nzubu wa mukalenga wa bena Yuda, nansha mu tshimenga, kabayi nabi mu Babilone to.

¹⁹Pashishe, Maweja-Nangila udi ne malu a kuamba adi atangila makunji[185] a nzubu wa Mvidi Mukulu, dilongu dinene dia tshijengu, malongu manene adi pa matempu, ne bintu bikuabu bionsu bidi bishale mu Yerushalayime.

²⁰(Bualu Nebukadnesare, mukalenga wa mu Babilone, kavua mubiangate mu Yerushalayime bua kuya nabi ku Babilone, pavuaye mukuate balombodi bonsu ba mu Yerushalayime ne ba mu ditunga dia Yuda, ne Yekonya,[186] muana wa Yoyakime, mukalenga wa bena Yuda.)

²¹Kadi Maweja-Nangila wa bukole buonsu Mvidi Mukulu wa Izrayele udi wamba ne:

²²“Biuma bionsu bidi bishale mu nzubu wa Mvidi Mukulu, nansha mu nzubu wa mukalenga wa bena Yuda, anyi mu Yerushalayime, nebaye nabi mu Babilone. Nebishale aku too ne diba dindi meme muine musue bua bapingane nabi kuneku.” Ke mudi Maweja-Nangila wamba nanku.