Read Tshiluba Yirmeya 28 Bible Online

Yirmeya 28 - Tshiluba bible

Yirmeya 28

¹Tshidimu atshi, mu ngondu muitanu[187] wa tshidimu tshinayi tshivua Sedekiya mu bukalenga bua bena Yuda, muambi Ananiya, muana wa Azure, wa mu tshimenga tshia Ngibone, uvua mu nzubu wa Mvidi Mukulu. Kuambilaye Yirmeya, batuangaji, ne bantu bakuabu bonsu bavua muaba awu, bamuteleja, ne:

²— Maweja-Nangila Mvidi Mukulu wa bukole buonsu, Mvidi Mukulu wa Izrayele, udi wamba ne: “Ndi ngumusha mutshi wa bupika udi mukalenga wa Babilone muteke pa makaya enu, nengutshibule.

³Nkushale amu bidimu bibidi bua meme kupingaja kuneku bintu bia tshijila bionsu bia mu nzubu wa Mvidi Mukulu, ne bintu bionsu bivuabu bangatamu, baye nabi mu Babilone kudi mukalenga Nebukadnesare.

⁴Nempingaje kabidi mu ditunga diabu Yekonya,[188] muana wa Yoyakime, mukalenga wa bena Yuda, too ne bantu bonsu bavuabu bakuate baye nabu mu Babilone. Ke mundi meme Maweja-Nangila ngamba. Eyowa, nentshibule mutshi wa bupika udi mukalenga wa mu Babilone muteke pa makaya enu.”

⁵Kadi muambi Yirmeya kuandamuna muambi Ananiya, batuangaji ne bantu bakuabu bonsu bavua mu nzubu wa Mvidi Mukulu bamuteleja ne:

⁶— Eyowa, ndi njinga bua Maweja-Nangila enze bu muudi wamba amu, akumbaje biuvua muambe, apingaje bintu bia tshijila bia mu nzubu wa Mvidi Mukulu bidi mu Babilone, ne bantu bonsu badi mu bupika.

⁷Kadi teleja bimpe tshindi nnuambila, wewe ne bantu bonsu badi muaba ewu ne:

⁸Nansha wewe, nansha meme, katuyi banji kukuata mudimu wa buambi, kuvua bambi kale. Bambi abu bavua bambila bantu ba mu matunga manene, ne ba mu makalenga manene, malu a Mvidi Mukulu. Bavua bapita kumanyisha amu bua mvita, makenga[189] ne disama dia tshiambu.

⁹Kadi padi muambi umanyisha bantu ne: nenupete dikasa dimpe, mmunyi mutudi mua kumanya ne: muambi ewu mbamutume menemene kudi Maweja-Nangila? Netumanye amu padi malu adiye wamba akumbana, enzeka.

¹⁰Nanku, muambi Ananiya kuangata mutshi wa kuambula bujitu uvua muambi Yirmeya muambule pa makaya, kuutshibula.

¹¹Pashishe kuambilaye bantu bonsu bavua muaba awu ne: — Maweja-Nangila udi wamba ne: “Nkushale amu bidimu bibidi bua meme kutshibula amu mushindu ewu mutshi wa bupika udi mukalenga Nebukadnesare, mukalenga wa mu Babilone muteke pa makaya a bena bisamba bionsu.” Ke muambi Yirmeya kumuka muaba awu, kuya muaba mukuabu.

¹²Muambi Ananiya mumane kutshibula mutshi uvua muambi Yirmeya muambule pa makaya, Maweja-Nangila kuambila Yirmeya ne:

¹³— Uye kuambila Ananiya ne: Maweja-Nangila udi wamba ne: “Bu muudi utshibula mutshi wa dibaya nenku, nempingaje mulonda.”

¹⁴Yirmeya kuamba kabidi ne: — Maweja-Nangila wa bukole buonsu Mvidi Mukulu wa Izrayele udi wamba ne: “Ndi nteka mulonda pa makaya a bantu ba mu bisamba bionsu. Nebakuatshile Nebukadnesare, mukalenga wa mu Babilone mudimu. Nansha nyama ya muitu mene neitabe ku diyi diende.”

¹⁵Pashishe, Yirmeya kuambila muambi Ananiya ne: — Ananiya, teleja bimpe. Maweja-Nangila kena mukutume to. Wewe udi usaka bantu aba bua bitabe malu a dishima.

¹⁶Nenku Maweja-Nangila udi ukuambila ne: kuena kabidi ne muaba pa buloba apa to. Neufue tshidimu etshi katshiyi tshianji kujika, bualu udi usaka bantu bua batombokele Maweja-Nangila.

¹⁷Nanku muambi Ananiya kufua tshidimu[190] atshi mu ngondu wa muanda mutekete.