Read Tshiluba Yirmeya 31 Bible Online

Yirmeya 31 - Tshiluba bible

Yirmeya 31

¹Maweja-Nangila udi wamba ne: “Pakumbana tshikondu, nengikale Mvidi Mukulu wa meku onsu a bena Izrayele. Bobu nebikale bantu banyi.”

²Maweja-Nangila udi wamba ne: Meme ndi mfuila bantu banyi luse. Nensangishe mu tshipele bonsu bavua muele kauyi mushipe. Nanku bena Izrayele nebapingane kuabu, basombe mu bupole.

³Bantu banyi bavua bamba ne: “Maweja-Nangila mmutumuenekele mufume kule!” Ke meme kubambila[206] ne: “Ndi mununange tshiendelele. Ke pandi nnulamata kashidi.

⁴Izrayele wanyi munanga, ndi nkujula tshiakabidi, ndi ngasulula tshimenga tshiebe. Bantu nebimbe ngoma. Nebaje maja, basanka.

⁵Nenukune kabidi mionji ya mvinyo pa mikuna ya mu Samariya. Nuenu babidime nenupole tumuma tua mvinyo mu madimi enu.

⁶Dituku adi batentekedi nebele mbila pa mikuna ya Efrayime bamba[207] ne: ‘Tuyayi ku mukuna wa Siyone kudi Maweja-Nangila Mvidi Mukulu!’ ”

⁷Elayi mbila ya disanka, nusankidile Izrayele,[208] bualu ke tshisamba tshidi tshipite bisamba bikuabu. Tumbishayi Mvidi Mukulu, nuambile bantu bonsu ne: “Maweja-Nangila mmusungidile bantu bende, mumpikule bena Izrayele bonsu bavua bashale ne muoyi!” Telejayi tshidi Maweja-Nangila wamba ne:

⁸Eyowa, meme Maweja-Nangila ndi mbasangisha ku matunga a ku mutu.[209] Ndi mbakunguja ku ntengu ne ntengu ya buloba. Bantu bonsu nebikaleku: bampofu, ne badi batebuka, bakaji badi ne mafu, ne bakadi balele. Bantu banyi bonsu nebapingane tshisumbu tshinene.

⁹Badi bapingana badila muadi, kadi meme ndi ngenda nabu, mbasamba. Nembafile ku misulu idi ne mayi mavule. Ndi mbafile mu njila muimpe, udi kayi ne biniina, bua kabayi kudishinda. Bualu meme ndi tatu wa bena Izrayele. Efrayime[210] ke muananyi muanabute.

¹⁰Nuenu bisamba bikuabu, telejayi tshidi Maweja-Nangila wamba. Numanyishe bantu too ne ba mu bidiila bidi kule ne: “Maweja-Nangila uvua mutangalaje bena Izrayele. Kadi mpindiewu udi mubakunguje. Udi ubakuba mudi mulami wa mikoku ukuba mikoku yende.”

¹¹Bualu Maweja-Nangila mmupikule bena Izrayele, mubapatule mu bianza bia muluishi wabu, uvua mubapite bukole.

¹²Nebafike pa mukuna wa Siyone, bela mbila ya disanka. Nebaleje mpala wa disanka, pamonabu bionsu bidibu bapeta kudi Maweja-Nangila: ntete ya kuenza bukula, maluvu mapiamapia, mafuta mimpe, mikoku, mbuji ne ngombe. Nebikale bu budimi budi ne mayi ntavule. Nebapete bionsu bidibu nabi dikenga.

¹³Nanku, bansongakaji nebaje maja a disanka. Nansha bansongalume mene, ne bakulumpe nebasanke. Bualu Maweja-Nangila udi wamba[211] ne: Nenkudimune kanyinganyinga kabu, kandamuke disanka. Nembasambe, ngumusha ntatu buabu nayi. Nembuwuje ne disanka.

¹⁴Nempeshe batuangaji munyinyi muimpe[212] wa nyama ya mafuta ya milambu. Nenkumbaje majinga onsu adi bantu banyi nawu.

¹⁵Maweja-Nangila udi wamba ne: Umvuayi mudibu badila muadi mu Rama, bela miyenga mikole. Rakele[213] ke udi udila bana bende. Kena musue bua bantu bamusambe, bualu mmujimije bana bende.

¹⁶Kadi Maweja-Nangila udi umuambila ne: Lekela muadi, kupula binsonji biebe, bualu nenkufute bua bionsu biuvua wenzela bana bebe. Ke meme Maweja-Nangila udi wamba nanku! Bana bebe nebumuke kudi baluishi, kudi bena lukuna babu, bua kupingana kuabu.

¹⁷Maweja-Nangila udi wamba ne: Kutekeshi mu maboku to. Bana bebe nebapingane mu ditunga.

¹⁸Mvua mumvue bena Efrayime[214] badila muadi, bamba ne: “Maweja-Nangila, udi mutunyoke bikole, mudibu banyoka muana wa nyama wa ngombe wa balume, udibu kabayi banji kutekesha bimpe. Kadi mpindiewu utupingaje kuudi, bua tupingane kuudi bulelela, bualu wewe Maweja-Nangila ke udi Mvidi Mukulu wetu.

¹⁹Eyowa, tuvua bakubenge, kadi mpindiewu tudi tunyingalala, bua bubi butuvua benza. Udi mutuleje mutuvua benza bibi. Nanku mpindiewu tudi tudituuta bianza pa tshiadi tudila. Tudi ne bundu, tudi ne kanyinganyinga, bua tshionsu tshituvua benze patutshivua bansonga.”

²⁰Maweja-Nangila udi wamba ne: Efrayime ke muananyi musuibue, ke muana undi mupite kunanga. Misangu yonsu indi ntela dina diende, ndi mmuvuluka tshiyi mua kumupua muoyi. Ndi mumunange bikole, tshiena ne mushindu wa kubenga kumufuila luse.

²¹Mu njila, wasa mitshi idi mua kukuvuluija njila,[215] uudi ne bua kulonda. Nanku, Izrayele musuibue, neumone mua kupingana mu bimenga biebe.

²²Nsongakaji mutomboke, newindile too ne ku tshikondu kayi, bua wewe kupingana? Bualu Maweja-Nangila mmupatule bualu bupiabupia pa buloba ne: ke mukaji udi uya kukeba mulume.[216]

²³Maweja-Nangila wa bukole buonsu, Mvidi Mukulu wa Izrayele, udi wamba ne: Pangapingaja bantu mu ditunga diabu ne mu bimenga bia Yuda,[217] nebambe tshiakabidi ne: “Maweja-Nangila akuele lupemba, wewe mukuna wa tshijila wa Siyone, muaba udiye usomba!”

²⁴Nanku bantu nebasombe mu bimenga, nebasombe mu ditunga. Bakuabu nebasombe mu mpata, badima. Balami ba mikoku bobu kabidi nebendakane mu mpata ne bisumbu biabu bia mikoku.

²⁵Bualu badi bapungila ne nyota, nembapeshe mayi a kunua, badi batekete ne nzala, nembadishe.

²⁶(Ke mudibu bamba ne: “Ke meme kujuka ku tulu kudiunwua ne bukole bua mubidi.[218]”)

²⁷Maweja-Nangila udi wamba ne: Dituku adi, nenguwuje Bukalenga bua Izrayele ne bua Yuda ne bantu, kabidi ne nyama, mudibu bamiamina ntete mu budimi.

²⁸Bu mumvua mukuate mudimu bua kujula, kushimbula, kupula, kunyanga, kuela panshi, ke mundi nkuata mudimu mpindiewu bua kuibaka[219] ne kukuna. Ke mundi meme Maweja-Nangila ngamba.

²⁹Nanku, muntu nansha umue kakuela lusumuinu lua ne: “Bavua badie tumuma tua mvinyo tua buanji mbaledi, kadi bana kumvua buanji ku menu.[220]”

³⁰Bushuwa, anu muntu udi udia tumuma tua mvinyo tubishi ke udi buanji bubuela ku menu. Nanku, muntu yonsu neafue anu bua bilema biende.

³¹Maweja-Nangila udi wamba ne: nkadi pa kutua ndondu mupiamupia ne bena mu bukalenga bua Izrayele, kabidi ne bena mu bukalenga bua Yuda.[221]

³²Kayakuikala bu ndondu imvua mutue ne bankambua babu, pa-mvua mubakuate ku tshianza bua kubapatula mu Ejipitu. Bualu ndondu ayi bavua bayinyanga! Eku meme mvua mfumu wabu.

³³Kadi Maweja-Nangila udi wamba ne: ndondu indi ntua ne bena Izrayele neikale nenku: Nemfunde mikenji yanyi mu muoyi wabu wa munda. Tshiena nyifunde kabidi pa mabue to. Nenyifunde munda muabu. Nengikale Mvidi Mukulu wabu, bobu nebikale bantu banyi.

³⁴Maweja-Nangila udi wamba ne: muntu nansha umue kakulomba balunda bende, nansha bana babu, bua bamulongeshe bua ammanye. Bualu bonsu, bakulumpe ne bana, nebammanye. Nembafuile luse bua mibi yabu. Tshiakuvuluka kabidi bilema biabu.[222]

³⁵Udi ubandisha diba bua munya kutemawu nnganyi? Udi utumina ngondu ne mitotu diyi bua bitokeshe buloba butuku nnganyi? Udi uvuandulula mayi manene bua enze mutoyi nnganyi? Amu Maweja-Nangila wa bukole buonsu, ke dina diende. Yeye mene udi wamba ne:

³⁶— Bu mundi muitabe bua bintu bionsu abi biende bimpe kashidi, ke mundi muitabe kabidi bua bena Izrayele bashale bantu banyi kashidi.

³⁷Pikala muntu ne bukole bua kupima butumbuke bua diulu, pikalaye ne bukole bua kubuela mu kandondu ka buloba, diba adi, nembenge bena Izrayele bonsu, bua malu mabi avuabu benze. Ke malu adi Maweja-Nangila unumanyisha.

³⁸Maweja-Nangila udi wamba ne: Matuku makese aa, nebasulule bimana bia tshimenga tshianyi tshia Yerushalayime, kutuadija ku kaleya ka Ananeyele too ne ku tshiibi tshia mu Ditumba.[223]

³⁹Nebateke mikalu mipiamipia ku tshimenga. Neyituadije luseke ludi diba dibuelela, ilonda mukuna wa Ngarebe, ifika too ne Ngowa.[224]

⁴⁰“Tshibandabanda tshijima, muaba udibu bajika bitalu, udibu bela butu bua milambu,[225] netshikale tshianyi meme. Mpata yonsu too ne ku Kedrone, musulu wa muenji mukole, too ne ditunga dia ku tshiibi tshia Nyama ya tubalu,[226] luseke ludi diba dipatukila, neyikale yanyi meme. Kabena mua kunyenga, kabena mua kubutula kabidi tshimenga to.