Read Tshiluba Yirmeya 32 Bible Online

Yirmeya 32 - Tshiluba bible

Yirmeya 32

¹Pavua Sedekiya,[227] mukalenga wa bena Yuda mukumbaje tshidimu tshiende tshia dikumi mu bukalenga, mmomumue ne: pakavua Nebukadnesare mukalenga wa mu Babilone mumane kukumbaja tshidimu tshiende tshia dikumi ne muanda mukulu mu bukalenga, Maweja-Nangila kuleja Yirmeya tshivuaye ne bua kuenza.

²Tshikondu atshi, bena mvita ba mu bena Babilone bavua baluisha Yerushalayime. Muambi Yirmeya uvua mu nzubu wa lukanu mu lubanza lua bena mvita balami ba mukalenga wa bena Yuda.

³Sedekiya uvua mumuelemu bualu uvua mufike munda bua muaku uvua Yirmeya muakule mu dina dia Maweja-Nangila ne: “Nemfile Yerushalayime mu bianza bia mukalenga wa mu Babilone. Yeye neakuate tshimenga.

⁴Nansha Sedekiya, mukalenga wa bena Yuda, kakunyema bena Babilone to. Bualu ndi musue kumufila kudi mukalenga wa mu Babilone. Nebamonangane ne Nebukadnesare mpala ne mpala. Neikale ne tshilumbu tshia kuandamuna ku nkonku idibu bamuela.

⁵Maweja-Nangila udi wamba ne: Pashishe nebaye ne Sedekiya mu Babilone. Neashalemu too ne ku lufu luende. Nansha nuenu batungunuke ne mvita, nuluisha bena Babilone, kanuakubatshimuna to.”

⁶Yirmeya uvua wamba ne: Meme kumvua Maweja-Nangila ungambila ne:

⁷— Anameyele, muana wa Shalume, tatuebe mukuabu, neafike kuudi bua usumbe budimi buende budi mu Anatote. Bualu wewe udi muanabu menemene. Nanku wewe ke muntu wa kumpala udi mua kubupikula.[228]

⁸Bu muvua Maweja-Nangila mungambile, Anameyele, muana wa tatu mukuabu, kufikaye kundi mu lupangu lua bena mvita balami ba mukalenga. Kungambilaye ne: — Wewe udi ne bua kusumba budimi bundi nabu ku Anatote, mu buloba bua bena Binyamine. Bualu wewe udi muanetu menemene. Wewe ke wa kumpala udi mua kubuangata, kubupikula bua buikale buebe. Ke meme kujadika ne: Maweja-Nangila ke uvua mungambile malu.

⁹Nanku, meme Yirmeya kusumba budimi bua Anameyele buvua ku Anatote, kufuta nkanu dikumi ne muanda mutekete ya tshiamu tshitoke tshia mushinga mukole.

¹⁰Meme kufunda mikanda ibidi ya disumba, kukanga mukanda umue, kutua tshitampi tshianyi,[229] bantu bajadike. Meme kupima kabidi bujitu bua tshiamu tshitoke tshia mushinga mukole.

¹¹Pashishe meme kuangata mukanda uvuabu bakanga ne tshitampi, mudi mikenji yambe, kuangata kabidi mukanda mukuabu uvuabu kabayi bakange.

¹²Meme kupesha Baruke, muana wa Neriya, ne muikulu wa Masheya,[230] mikanda yonsu ibidi. Anameyele, muana wa tatu mukuabu, ne bantu bakuabu bavua batua tshiala ku mikanda ya disumba, bavua muaba awu, kabidi ne bena Yuda bakuabu bonsu bavua mu lupangu lua bena mvita balami ba mukalenga.

¹³Ke meme kuambila Baruke, bantu bakuabu bonsu bateleje, ne:

¹⁴— Maweja-Nangila wa bukole buonsu, Mvidi Mukulu wa Izrayele, udi utuma diyi ne: angata mukanda wa disumba dia budimi uvuabu batue tshitampi, ne mukuabu uvuabu kabayi bakanga, uyiteku mu mulondu wa diima, bua tumone mua kuyilama bidimu bivule.

¹⁵Bualu Maweja-Nangila wa bukole buonsu, Mvidi Mukulu wa Izrayele, udi wamba ne: “Mu ditunga edi, dituku dikuabu nebasumbe kabidi nzubu, madimi, kabidi ne madimi a mvinyo.”

¹⁶Meme mumane kufila mukanda wa disumba budimi kudi Baruke, ke meme kutendelela Maweja-Nangila ngamba ne:

¹⁷— Eyi, Maweja-Nangila Mvidi Mukulu, uvua muleje bukole buebe ne meji ebe, pauvua mufuke diulu ne buloba. Wewe udi mua kuenza bionsu biudi musue.

¹⁸Udi unanga bantu too ne ku ndelanganyi yabu tshinunu. Kadi padi baledi benza tshilema, udi unyoka ne bana babu mene. Udi Mvidi Mukulu munene ne wa bukole. Dina diebe mMvidi Mukulu wa bukole buonsu.

¹⁹Udi wela meji ku malu manene audi musue kuenza. Kabidi udi ne bukole bua kuakumbaja. Udi utangila bimpe malu adi bantu benza. Udi ufuta muntu yonsu bilondeshile bidiye wenza.

²⁰Uvua muleje bantu bukole buudi nabu pa kuenza malu a dikema. Matuku avua bankambua betu mu Ejipitu, nansha lelu kabidi, kuena wenzela bena Izrayele nkayabu malu a dikema, udi wenzela kabidi bantu ba pa buloba bujima. Ke tshitudi tumona ne lelu.

²¹Udi muleje bukole buebe ne meji ebe, paudi muenze malu a dikema adi akuatshisha bowa, paudi mupatule bantu bebe bena Izrayele mu Ejipitu.

²²Uvua mulaye bankambua betu, muditshipe ne: nennupeshe ditunga. Ke muaba utudi tusomba lelu. Ditunga edi didi ne mabela ne buitshi, wewe kubapeshadi.

²³Bushuwa, bavua bangata ditunga edi. Kadi kabavua bateleja tshiuvua wamba. Kabavua balonda mikenji yebe. Kabavua benza tshiuvua mubatumine diyi. Ke muuvua mutume makenga onsu aa atudi tumona lelu.

²⁴Bena Babilone badi basemena pabuipi ne tshimenga bua kutshiluisha. Nebatshikuate. Tudi mua kuamba ne: tshikadi mu bianza biabu. Badi bakeba kutshikuata ku mvita, ku tshiyole tshia nzala, ne ku disama dia tshiambu. Bionsu biuvua muambe mbimane kuenzeka, wewe mene udi mua kubijadika.

²⁵Eyowa, tshimenga tshikadi pa kuya ku bianza bia bena Babilone. Maweja-Nangila Mvidi Mukulu mungambe bua meme kusumba buloba ebu, kufuta mushinga wabu diakamue bua tshinyi?

²⁶Ke Maweja-Nangila kungandamuna ne:

²⁷— Meme Maweja-Nangila Mvidi Mukulu wa bantu bonsu badi pa buloba, ndi mua kuenza bionsu bindi musue.

²⁸Nanku, ndi ngamba ne: Nemfile tshimenga etshi kudi Nebukadnesare, mukalenga wa mu Babilone, ne kudi bena mvita bende. Yeye neatshikuate.[231]

²⁹Bena Babilone badi batshiluisha mpindiewu, nebabuelemu. Nebatshinyenge, batshioshe. Neboshe nangananga nzubu eyi ivuabu bampendele pa kuosha musenga wa kamonya bua kutendelela Baale, ne pa kulambula milambu ya maluvu bua kutendelela mvidie ya bantu ba bisamba bikuabu.

³⁰Maweja-Nangila kuamba kabidi ne: biangatshile ku ntuadijilu, bena Izrayele ne bena Yuda bavua benze malu andi mubenge. Eyowa, bionsu bivua bena Izrayele benza bivua anu bitufikisha munda.

³¹Tshimenga tshia Yerushalayime etshi katshia batshibaka, tshivua amu tshimfikisha munda, tshingenza tshiji, too ne lelu. Nanku, tshiena musue kutshimona kabidi ne mesu to.

³²Ndi musue kutshibutula bua malu mabi avua bena Izrayele ne bena Yuda benza, ne avuabu benza kabidi kudi bakalenga babu, kudi bamfumu babu, kudi batuangaji babu, kudi bambi babu, kudi bantu ba mu ditunga dia Yuda ne ba mu Yerushalayime.

³³Pa mutu pa kupingana kundi meme, badi amu bambenga. Eku meme mvua mbabela amu kubabela. Kadi muntu nansha umue kena muitabe, ki mmuteleje mene mibelu yanyi.

³⁴Kabidi bavua bateke mpingu yabu indi mbenga mu nzubu udi munjidila. Ke muvuabu bamunyanga ne mikiya.[232]

³⁵Bavua bateka mu tshibanda tshia Inome[233] miaba ya kutendelela mvidie Baale, bua kulambulamu mvidie Moleke bana ba balume ne ba bakaji. Meme tshivua mubalombe bua benza nanku to. Tshivua nansha muele meji ku bualu bua nanku to. Kadi pa kuenza malu mabi aa, bavua basaka bena Yuda bua benze pabu malu andi mubenge.

³⁶Kadi nansha biobi bikale nanku, meme Maweja-Nangila Mvidi Mukulu wa Izrayele, ndi ne bualu bua kuamba kabidi bua bidi bitangila tshimenga etshi. Wewe ne bantu bakuabu nudi nuamba ne: “Mvita, tshiyole tshia nzala, ne disama dia tshiambu,[234] bivua bifila tshimenga etshi mu bianza bia mukalenga Nebukadnesare.”

³⁷Bushuwa, mvua mufike munda, munyingalale ne tshiji tshikole bua bantu ba mu tshimenga etshi. Ke mumvua mubatangalaje mu matunga mashilangane. Kadi nembakunguje, nembapingaje munemu. Nembasombeshe mu ditalala.

³⁸Nebikale tshiakabidi bantu banyi. Meme nengikale Mvidi Mukulu wabu.

³⁹Nembape muoyi umue, bua bandamate, bua bapete diakalenga, bobu ne ndelanganyi yabu.

⁴⁰Ndi ndaya ne: tshiena musue kubabenga kabidi to. Nanku nentue nabu ndondu wa kashidi. Nenbambuluishe bua bannemeke, bua kabalamuki kabidi kundi.

⁴¹Nengikale ne disanka dia kubenzela malu mimpe. Nengenze muanyi muonsu bua basombe kashidi mu ditunga edi.

⁴²Maweja-Nangila udi wamba kabidi ne: Meme ke uvua mutume dikenga dinene edi divua dikuate bena Yuda. Meme kabidi ke wabatumina disanka dionsu dimvua mubalaye.

⁴³Wewe ne bantu bakuabu nudi nuamba ne: ditunga edi bena Babilone nebadikuate, dishale tshipela, kamuyi bantu nansha nyama. Kadi mu ditunga edi ke muatuadijabu kabidi kusumba madimi.

⁴⁴Eyowa, mu buloba bua Binyamine, bu buloba bua Yerushalayime, mu bimenga bia Yuda, mu bimenga bidi pa mikuna bidi mu bibandabanda, bidi mu Negebe,[235] nebasumbe kabidi madimi, nebafunde mikanda ya disumba, nebatue tshitampi, nebabikile bantu bua bajadike bualu. Bualu nempingaje bantu mu ditunga diabu.[236] Ke meme Maweja-Nangila udi wamba nanku.