Read Tshiluba Yirmeya 33 Bible Online

Yirmeya 33 - Tshiluba bible

Yirmeya 33

¹Muambi Yirmeya utshivua mu lukanu mu lupangu lua bena mvita balami ba mukalenga. Maweja-Nangila kumumanyisha kabidi ne:

²— Meme Maweja-Nangila, mufuki wa buloba,[237] udi mubufumbe, mubulame kabidi, ndi ngamba ne:

³Umbikile meme, nenkuandamune. Nenkujinguluile malu manene masokoka audi kuyi mumanye to.

⁴Meme Maweja-Nangila, Mvidi Mukulu wa Izrayele, ndi ne bualu bua kuamba, budi butangila nzubu idi mu tshimenga etshi, ne nzubu ya bakalenga ba bena Yuda. Nebayibutule. Kanuena mua kuluisha bena Babilone badi bakeba mua kukuata tshimenga to. Nuenu babaluishe, ndi nguwuje tshimenga[238] tente ne bitalu bia bantu bandi nshipa, bua tshiji tshianyi tshikole tshindi natshi. Bena mu Yerushalayime bavua benza malu mabi a bungi. Ke mundi tshiyi kabidi bualu ne tshimenga etshi.

⁶Kadi, ndi ngondapa tshimenga etshi, mudibu bondapa muntu ne mputa. Nentshiondape, ntshipesha bukole bua mubidi. Nemfile bupole ne ditalala kudi bantu batshi.[239]

⁷Nensankishe bena Yuda ne bena Izrayele.[240] Nembapingajile diakalenga divuabu nadi kale.

⁸Netubambile bonsu ne: tshiena mvuluka bilema bionsu binuvua bangenzele. Nansha nuenu bantombokele, ndi nnufuila luse.

⁹Nanku, nengikale ne disanka pa kutela dina dia Yerushalayime. Tshimenga etshi nentshikebele lumu ne butumbi kudi bisamba bionsu bia pa buloba. Padi bantu bajingulula malu mimpe amvua muenzele Yerushalayime, nebazakale. Nebakanke pamonabu diakalenga ne disanka bimvua mupeshe bena tshimenga etshi.

¹⁰Maweja-Nangila udi wamba[241] ne: Nuenu bena Yuda, nudi nuamba misangu yonsu ne: ditunga edi didi dinyanguke. Kanuena mua kumonamu muntu nansha nyama. Bulelela, bimenga bia mu ditunga dia Yuda, ne misesu ya mu Yerushalayime, bidi lelu munda mutupu. Kanuena mua kumona muntu nansha nyama. Kadi mu ditunga edi nebumvue kabidi

¹¹misambu ne mbila ya disanka. Nebumvue kabidi meyi a bantu batshidi babuela mu dibaka. Nebumvue kabidi bantu bimbe musambu ewu ne: Tumbishayi Mvidi Mukulu wa bukole buonsu, bualu udi mulenga. Dinanga diende ndia kashidi. Nebumvue kabidi musambu wa bantu badi baya ne milambu yabu mu nzubu wa Mvidi Mukulu. Bushuwa, Maweja-Nangila udi wamba ne: nempingajile ditunga edi lumu luadi lua kale.

¹²Maweja-Nangila wa bukole buonsu udi wamba kabidi ne: Mu ditunga edi didi dinyanguke, kamuyi muntu nansha nyama, mu bimenga biadi bionsu nemuikale kabidi balami ba mikoku, badi bakuba mbuji yabu ne mikoku butuku.

¹³Mu bimenga bia pa mikuna, ne bia mu bibandabanda, mu bimenga bia mu Negebe,[242] mu buloba bua Binyamine, ne mu bimenga bia Yuda, mbuji ne mikoku neyipitemu bungi. Mulami wayi neayilombole, ayibale. Ke mundi meme Maweja-Nangila ngamba.

¹⁴— Maweja-Nangila udi wamba ne: — Nengenze lukasa bimvua mulaye bena Izrayele ne bena Yuda.

¹⁵Pakumbana tshikondu, nembikile muntu wa ku ndelanganyi ya Davide menemene. Neakose nsambu ya bantu ba mu ditunga amu pa yoyi. Neenze tshindi meme musue.

¹⁶Nenku bukalenga bua Yuda kabuakuikala kabidi mu bianza bia baluishi babu nansha. Bena Yerushalayime nebasombe talalaa. Nanku, nebinyike Yerushalayime ne: “Maweja-Nangila ke udi utusungidila.[243]”

¹⁷Telejayi bualu bukuabu budi Maweja-Nangila utumanyisha: Muntu wa ku ndelanganyi ya mukalenga Davide[244] neashale kashidi mu bukalenga bua Izrayele.

¹⁸Kabidi bantu ba ku ndelanganyi ya bena Levi[245] nebashale kashidi batuangaji badi bangenzela mudimu, bandambula milambu yakuosha, ya bia pa madimi, ne ya ditua ndondu.

¹⁹Maweja-Nangila kukonka kabidi Yirmeya ne:

²⁰— Meme Maweja-Nangila ndi nkuebejane: Wewe udi mua kushipa mikenji indi muele bua munya ne butuku, kubikandika bua kabilondianganyi mudibi ne bua kuenzeka anyi? Nansha kakese! Kuena mua kuenza nanku to.

²¹Nanku dilaya dianyi dimvua mulaye muntu wanyi Davide kadiena mua kufua to. Muntu nansha umue kena mua kukandika, bua muntu wa ku ndelanganyi ya Davide kikadi mukalenga wa Yerushalayime to, nansha bua bantu ba ku ndelanganyi ya Levi kabikadi bantu badi bengenzela mudimu.

²²Nemvudije ndelanganyi ya muntu wanyi Davide ne ndelanganyi ya Levi, badi bangenzela mudimu wa butuangaji. Nebikale bavule bu mitotu ya mulu idibu kabayi mua kubala, nansha bu lusenga ludi ku muelelu wa mayi manene ludi bantu kabayi mua kubala.

²³Pashishe Maweja-Nangila kuambila kabidi Yirmeya ne:

²⁴— Kuena mumvue mudi bantu bamba anyi? Badi bamba ne: ndi mubenge bena Izrayele ne bena Yuda, meku abidi andi musungule! Badi bamba nenku badi bapepeja bantu banyi. Kabena nansha babatangila bu tshisamba to.

²⁵Kadi ndi ngamba ne: “Ndi mutue ndondu ne munya, kabidi ne butuku. Ndi muele meyi ne mikandu bidi bitombola diulu ne buloba.

²⁶Nanku, nudi mua kuitaba ne: ndi mubenge ndelanganyi ya Yakobe ne ya muntu wanyi Davide anyi? Nudi mua kuitaba ne: munkatshi muabu tshiakuangata kabidi bamfumu badi balombola tshisamba tshia Abrahame, tshia Izake ne tshia Yakobe anyi? “Kabiena nanku to! Kadi ndi mubanange bushuwa, nembapeshe kabidi diakalenga.[246]”