Read Tshiluba Yirmeya 37 Bible Online

Yirmeya 37 - Tshiluba bible

Yirmeya 37

¹Nebukadnesare, mukalenga wa mu Babilone, uvua muteke Sedekiya, muana wa Yoshiya, bua kuikalaye mukalenga mu ditunga dia Yuda. Nanku Sedekiya ke uvua mupingane Koniya,[263] muana wa Yoyakime.

²Kadi Sedekiya, balombodi bende ba bena mvita, ne bana babu bena Yuda kabavua bateleja mibelu ya Maweja-Nangila ivua muambi Yirmeya ubambila.

³Nanku, mukalenga Sedekiya kutuma Yukale, muana wa Shelemiya, ne mutuangaji Sefanya, muana wa Masheya, kudi muambi Yirmeya bua kumuambila ne: — Tudi bavua kukulomba bua kutendelela Maweja-Nangila Mvidi Mukulu wetu bualu buetu bonsu.

⁴Mu tshikondu atshi, kabavua banji kuela kabidi Yirmeya mu lukanu to. Utshivua wendakana muvuaye musue.

⁵Kadi, tshiluilu tshia mvita tshia mukalenga wa bena Ejipitu, tshivua tshimane kumuka mu Ejipitu. Bena Babilone bavua baluisha tshimenga tshia Yerushalayime bavua bumvua bualu abu. Nanku kumukabu mu tshimenga tshia Yerushalayime, kuimanabu katantshi ne tshimenga.

⁶Ke Maweja-Nangila kuambila Yirmeya tshivuaye ne bua kuandamuna bantu bavua mukalenga Sedekiya umutumina ne.

⁷Maweja-Nangila Mvidi Mukulu wa Izrayele udi wamba ne: — Nuye kuambila Sedekiya mukalenga wa bena Yuda, udi munutume kundi bua kungebeja malu ne: tshiluilu tshia mukalenga wa bena Ejipitu, tshivua tshifike bua kunuambuluisha, tshikadi tshialukile kuabu ku Ejipitu.

⁸Bena Babilone nebafike kabidi bua kuluisha tshimenga etshi. Nebatshikuate, batshioshe ne kapia.

⁹Meme Maweja-Nangila ndi nnuambila ne: Kanuedi meji ne: bena Babilone mbumuke menemene to. Kabakumuka nansha!

¹⁰Nansha nuenu batshimune tshiluilu tshionsu tshia bena Babilone tshidi tshinuluisha, nansha bena Babilone badi bashale bikale amu bantu batapike mputa, yonsu wa kudibu neapete bukole, neimane kulu mu ntenta wende. Nebafike bua kuosha tshimenga etshi tshionsu ne kapia.

¹¹Pavua tshituilu tshia bena Babilone tshianji kupengamaku luseke, bualu tshiluilu tshia mukalenga munene wa bena Ejipitu tshivua tshisemena pabuipi,

¹²Yirmeya uvua musue kupatuka mu tshimenga bua kuya mu buloba bua bena Binyamine. Uvua ne bua kuyamu kuabanyangana[264] buloba ne bantu ba mu musoku wabu.

¹³Uvua mupitshile ku tshiibi tshia Binyamine.[265] Kupetanganaye ne mfumu wa balami ba bena mvita, dina diende Iriya, muana wa Shelemiya, ne muikulu wa Ananiya. Iriya kuimanyika muambi Yirmeya, kumuambila ne: — Udi uya kudi bena Babilone bua kubambuluisha anyi?

¹⁴Ke Yirmeya kumuandamuna ne: — Nansha kakese! Tshiena nya kudi bena Babilone to. Kadi Iriya kavua muitabe tshivua Yirmeya wamba to. Kumukuataye, kuya nende kudi bamfumu bende.

¹⁵Bobu abu kufikila Yirmeya munda, kumutuutabu. Pashishe kumukangilabu mu nzubu wa Yonatane, mufundi wa mikanda ya mu bukalenga. Nzubu wende bavua bamuenze nzubu wa bena lukanu.

¹⁶Kuelabu Yirmeya mu nzubu wa lukanu wa munda mua buloba. Kushalayemu mutantshi mule.

¹⁷Pashishe mukalenga Sedekiya kutuma muntu bua kukeba Yirmeya. Mukalenga uvua musue kumukonka malu mu musokoku mu nzubu wende wa bukalenga. Mukalenga kumukonka ne: — Udi ne malu a kungambila a kudi Maweja-Nangila anyi? Yirmeya kumuandamuna ne: — Eyowa, ngwowu aa: Nebakukuate, bakufile kudi mukalenga wa mu Babilone.

¹⁸Pashishe, Yirmeya kukonka mukalenga Sedekiya ne: — Ntshilema kayi tshindi mukuenzele, nansha tshindi muenzele balombodi bebe ba bena mvita, nansha bantu ba mu tshimenga etshi, bua wewe kungelesha mu nzubu wa lukanu?

¹⁹Bambi benu bavua banuambila ne: mukalenga wa mu Babilone kena ubuela mu ditunga edi bua kunuluisha, wewe ne bena ditunga edi, lelu badi penyi?

²⁰Yirmeya kuamba kabidi ne: — Mukalenga, ndi nkulomba bua uteleje tshindi nkulomba. Kuntumi tshiakabidi kua Yonatane, mufundi wa mikanda ya mu bukalenga, bualu ndi mua kufuilamu.

²¹Nanku, mukalenga Sedekiya kuela mukenji bua balame Yirmeya mu lupangu lua bena mvita balami ba mukalenga, kabidi bua bamupeshe ku dituku diampa dia tshijengu divuabu balamba mu musesu wa Boshi ba mampa, too ne ku diba didibu kabayi mua kupeta kabidi diampa! Ke muvua Yirmeya mushale mu lupangu lua bena mvita balami ba mukalenga nanku.