Read Tshiluba Yirmeya 38 Bible Online

Yirmeya 38 - Tshiluba bible

Yirmeya 38

¹Shefatya, muana wa Matane, Ngedaliya, muana wa Pashekure, Yukale, muana wa Shelemiya, ne Pashekure, muana wa Malkiya bavua bajingulule malu avua Yirmeya wambila bantu bavua bapitshila muaba awu. Uvua ubambila ne:

²— Maweja-Nangila udi wamba ne: “Muntu yonsu washala mu tshimenga etshi neafue ku mvita, ku tshiyole tshia nzala, nansha ku disama dia tshiambu. Kadi muntu yonsu umuka mu tshimenga etshi, bua kuya kudifila kudi bena Babilone, neashale ne muoyi.[266]”

³Yirmeya uvua wamba kabidi ne: — Maweja-Nangila udi wamba ne: ndi mumane kushindika bua kufila tshimenga etshi kudi tshiluilu tshia mukalenga wa mu Babilone. Yeye mene ke watshikuata.

⁴Balombodi ba bena mvita aba mbamane kumvua muvua Yirmeya muambe, kuambilabu mukalenga Sedekiya ne: — Tudi tulomba bua kushipa Yirmeya ewu. Bionsu bidiye wamba, bidi bitekesha bikole bena mvita ne bantu badi bashale mu tshimenga. Muntu ewu udi utukebela amu diakabi. Kena bualu ne diakalenga dietu to.

⁵Nanku, mukalenga Sedekiya kuandamuna ne: — Ee mbimpe! Numuenzele munudi basue. Bualu nansha meme mukalenga, tshiena ne bumfumu bua kunukandika to.

⁶Balombodi banayi ba bena mvita aba kukuatshisha Yirmeya, kumuela mu tshiina tshia mayi tshia Malkiya, mulombodi wa bena mvita.[267] Tshiina atshi tshivua tshiumbula mu lupangu lua bena mvita balami bamukalenga. Kupuekeshabu Yirmeya ku muonji mu tshiina atshi. Mu tshiina amu kamuvua mayi nansha. Kadi muvua amu bitotshi. Yirmeya kubuelamu.

⁷Muena Kushe mukuabu, dina diende Ebede-Meleke, uvua mufidi wa ngenyi mu nzubu wa bukalenga. Kumvuaye ne: mbele Yirmeya mu tshiina tshia mayi. Bu muvua mukalenga Sedekiya muimane ku tshiibi tshia Binyamine.[268]

⁸Ebede-Meleke kupatuka mu nzubu wa bukalenga, kuya kumuambila ne:

⁹— Mukalenga, bantu aba mbenze bualu bubi, mbele muambi Yirmeya mu tshiina tshia mayi! Neafuemu ne nzala. Kabidi mu tshimenga kamuena diampa nansha dimue.

¹⁰Nanku, mukalenga kuelelaye Ebede-Meleke, muena Kushe, mukenji ne: — Wangata bantu makumi asatu, uye nabu. Nupatule Yirmeya mu tshiina tshia mayi bua kafuidimu.

¹¹Nanku, Ebede-Meleke kuangata bantu makumi asatu, kuya nabu ku nzubu wa bukalenga. Kubuelaye mu tshibambalu muaba udibu balama bintu. Kuangataye bilamba bia kale bipandike. Kubituminaye Yirmeya mu tshiina, bisuike ku mionji.

¹²Pashishe, Ebede-Meleke muena Kushe, kuambila Yirmeya ne: — Ubueje mikusu ya bilamba eyi mu mapa, ne mionji muinshi mua mikusu. Yirmeya mumane kuenza nanku,

¹³bantu kukoka mionji, kumupatulabu mu tshiina. Ke Yirmeya kushala mu lupangu lua bena mvita balami ba mukalenga.

¹⁴Mukalenga Sedekiya uvua mutume bantu bua bafike ne muambi Yirmeya. Kumubikilaye ku mushiku muisatu wa nzubu wa Mvidi Mukulu. Kumuambilaye ne: — Ndi musue kukukonka. Kunsokoki bualu nansha bumue.

¹⁵Yirmeya kuandamuna mukalenga Sedekiya ne: — Bu meme mubandamune tshindi ne bua kuandamuna, neunshipeshe. Nansha meme mukubele, bakuitaba mibelu yanyi to.

¹⁶Kadi mukalenga kuditshipa kudi Yirmeya, bobu bikale amu babidi, wamba ne: — Bu mudi Maweja-Nangila ne muoyi, mutupe kabidi muoyi, ndi nditshipa ne: tshiena mua kukushipesha, nansha kukufila kudi bantu aba badi bajinga lufu luebe to.

¹⁷Nanku Yirmeya kuandamuna mukalenga Sedekiya ne: — Maweja-Nangila Mvidi Mukulu wa bukole buonsu, Mvidi Mukulu wa Izrayele udi ukuambila ne: “Wewe mumuke bua kuya kudi mulombodi wa mvita wa bena Babilone, newikale ne muoyi, wewe ne bena diku diebe, tshimenga etshi kabakutshibutula kudi kapia to.

¹⁸Kadi paudi ubenga kuya kudi balombodi ba mukalenga wa bena Babilone, tshimenga etshi, nebatshikuate kudi bena Babilone, nebatshibutule batshioshe. Wewe mene kuakushala, kuakupanda to.”

¹⁹Mukalenga Sedekiya kumuandamuna ne: — Bowa budi bunkuata bua bena Yuda bavua badifile kudi bena Babilone. Ndi ntshina ne nebainfile kudi bantu abu bua bampetule.

²⁰Kadi Yirmeya kumuandamuna ne: — Too, kabakukufila kudibu nansha. Teleja tshindi ngamba mu dina dia Maweja-Nangila, nanku wewe ne bena diku diebe nenupande. Bionsu nebiende amu bimpe.

²¹Kadi wewe mubenge kudifila kudi bena Babilone, malu adi Maweja-Nangila mundeje neakuenzekele:

²²bakaji bonsu badi bashale mu nzubu wa bukalenga nebabakuate kudi balombodi ba bena mvita ba mukalenga wa mu Babilone. Bakaji abu, nebanusake mu musambu bimba ne: Balunda bebe baudi munange, badi bakudinga! Paudi ne ntatu, kabena nebe kabidi bualu to!

²³Eyowa, nebafile bakaji bebe ne bana bebe ba balume kudi bena Babilone. Nansha wewe kuakunyema to. Mukalenga wa bena Babilone neakuele mu lukanu. Neabutule tshimenga etshi ne kapia.

²⁴Nanku, mukalenga Sedekiya kuambila Yirmeya ne: — Paudi musue kuikala ne muoyi, muntu nansha umue kamanyi kalu nansha kamue ka mu diyuki dietu.

²⁵Kadi balombodi banene ba bena mvita nebajingulule ne: ndi muyukile nebe. Nanku nebafike bua kukukonka pa malu atudi bambilangane. Nebakulaye ne: katuakushipa paudi utuambila bualu bujima.

²⁶Kadi ubandamune ne: “Mvua nsengelela mukalenga bua kampingaji kabidi mu nzubu wa Yonatane. Bualu ndi mua kufuilamu.”

²⁷Bulelela, balombodi banene ba bena mvita kufika kudi Yirmeya bua kumukonka. Kadi Yirmeya kubandamuna anu muvua mukalenga Sedekiya mumuambile. Nanku nanshabu kumuenzela bibi to. Bualu muntu nansha umue kavua mumvue tshivua mukalenga Sedekiya ne muambi Yirmeya bambilangana.

²⁸Yirmeya pende uvua mushale mu lupangu lua bena mvita balami ba mukalenga too ne diba divuabu bakuate Yerushalayime.[269] Malu avua menzeke pavuabu bakuate Yerushalayime adi nenku: