Read Tshiluba Yirmeya 40 Bible Online

Yirmeya 40 - Tshiluba bible

Yirmeya 40

¹Nebuzaradane, mfumu wa bena mvita balami ba mukalenga, mumane kuanyisha bua Yirmeya umuka ku Rama, Maweja-Nangila kuyukila ne Yirmeya. Yirmeya musuike ne nkanu, uvua usomba munkatshi muabena Yerushalayime ne bena Yuda bavuabu bakuate bua kuya nabu mu Babilone. Muine muaba awu ke kuvua mfumu wa bena mvita balami mumushe Yirmeya ku tshisumbu tshia bantu bavuabu ne bua kuya nabu.

²Kuyaye ne Yirmeya pa nkayende, umuambila ne: — Maweja-Nangila Mvidi Mukulu webe uvua mumanyishe bena tshimenga etshi dikenga didi dibakuata.

³Mpindiewu Maweja-Nangila mmuenze tshionsu tshivuaye mumanyishe, bualu nuvua bena tshibawu. Kanuvua bitabe tshivuaye munuambile. Ke padi malu awu onsu manuenzekele.

⁴Nanku, lelu ndi nkusulula nkanu ivuabu bakusuike ku bianza. Paudi musue kuya nanyi ku Babilone mbimpe tuye. Nenkulame. Kadi paudi kuyi musue, bidi anu bimpe. Udi mua kuya kusomba mu ditunga, muaba onsu uudi musue.

⁵Kadi muambi Yirmeya kavua muye to.[277] Ke Nebuzaradane kuamba kabidi ne: — Udi mua kupingana kudi Ngedaliya, muana wa Akikame, muikulu wa Shafane. Mukalenga wa mu Babilone mmumuteke bua kuludika bimenga bia bena Yuda. Uye kusomba kudiye munkatshi mua bantu. Nansha uye miaba mikuabu kuonsu kuudi mumone ne nkuimpe. Mfumu wa bena mvita balami, kupesha Yirmeya biakudia bua luendu luende, kumusankishaye kabidi ne bintu bikuabu. Bobu kulayangana bimpe.

⁶Nanku Yirmeya kuya ku Mispa, muaba uvua Ngedaliya. Kusombaye munkatshi mua bantu bavua bashale mu ditunga.

⁷Mu misoku ya ku mpenga mutshivua bisumbu bia bena mvita ba bena Yuda. Balombodi ba bisumbu bia bena mvita abi, ne bantu babu, bavua bumvua muvua mukalenga wa Babilone musungule Ngedaliya, muana wa Akikame, bua ikale mulombodi wa ditunga, muvuaye kabidi mumupeshe bapele, balume, bakaji, ne bana bavuabu kabayi mua kuya nabu mu Babilone.

⁸Ke balombodi abu ba bena mvita ne bantu babu, kuya ku Mispa kuvua Ngedaliya. Bavua baye ke: Ishemayele, muana wa Netanya, Yowanane ne Yonatane bonsu babidi bana ba balume ba Kareya, Seraya, muana wa Tanekumete, ne bana balume ba Afayi wa mu Netofa, ne Yazanya wa mu Maaka.

⁹Ngedaliya kubambila ne: — Kanutshinyi to. Anyishayi bukalenga bua bena Babilone. Sombayi mu ditunga. Nuitabe bumfumu bua mukalenga wa Babilone. Ndi nnulaya ne: nenuikale ne diakalenga.

¹⁰Meme mene ndi ngasa mu Mispa emu, bua ngikale muena mpala wenu kudi bena Babilone badi bafika kunudi. Kadi nuenu nupole tumuma tua mvinyo, ne bimuma bikuabu, nuenze ne mafuta. Nubilame mu diyeba. Nuase kabidi mu bimenga munuvua basombe kumpala.

¹¹Bena Yuda bavua ku bena Mowabe, ku bena Amone, ku bena Edome, nansha bavua mu ditunga dikuabu, bavua bumvua pabu bonsu ne: mukalenga wabena Babilone mmushiye bantu mu bukalenga bua Yuda, mmubateke mu bianza bia Ngedaliya.

¹²Nanku ke bena Yuda bonsu aba, kumuka miaba mishilangane ivuabu babipate, kuyabu kudi Ngedaliya ku Mispa mu ditunga dia Yuda. Kupolabu bimuma bivule, ne tumuma tua mvinyo tuvule.

¹³Dituku dikuabu, Yowanane, muana wa Kareya, ne balombodi bakuabu batshi vua mu mpata, kuyabu kudi Ngedaliya mu Mispa.

¹⁴Kumukonkabu ne: — Udi mumanye ne: Balise, mukalenga wa bena Amone, udi mutume Ishemayele, muana wa Netaniya, bua kukushipa anyi? Kadi Ngedaliya kavua mubitabe to.

¹⁵Ke Yowanane kuya ku Mispa mu musokoku kudi Ngedaliya umukonka ne: — Udi musue bua nye kushipa Ishemayele anyi? Muntu kakumanya bualu to. Katuena mua kuanyisha bua akushipe to. Yeye mukushipe, bena Yuda baudi wewe musangishe nebatangalake tshiakabidi. Bantu bonsu batshidi basomba mu bukalenga bua Yuda nebabutuke!

¹⁶Kadi Ngedaliya kuandamuna Yowanane ne: — Kuenji bualu bua nanku to. Biudi wamba pambidi pa Ishemayele mbia dishima!