Read Tshiluba Yirmeya 42 Bible Online

Yirmeya 42 - Tshiluba bible

Yirmeya 42

¹Pashishe balombodi ba bena mvita, nangananga Yowanane, muana wa Kareya, Azarya,[280] muana wa Oshaya, ne bantu bonsu bavua muaba awu kuyabu bonsu,

²kudi muambi Yirmeya, bamuambila ne: — Wanyishe tshitudi tukulomba. Utendelele Maweja-Nangila Mvidi Mukulu webe bua tuetu bonsu badi bashale ne muoyi. Tudi bakese be. Udi mudimuene nkayebe.

³Ulombe Maweja-Nangila Mvidi Mukulu webe, atumanyishe muaba utudi mua kuya, ne tshitudi mua kuenza.

⁴Muambi Yirmeya kubandamuna ne: — Mbimpe munudi nundomba! Nentendelele Maweja-Nangila Mvidi Mukulu wetu. Pashishe tshiakunusokoka bualu nansha bumue. Nennumanyishe muikale Maweja-Nangila muambe.

⁵Kuandamunabu Yirmeya ne: — Kayanda ketu, netuenze menemene tshionsu tshikale Maweja-Nangila Mvidi Mukulu webe mukumanyishe bua wewe kutuambila. Maweja-Nangila ikale mujadiki wa mutshipu wetu.

⁶Tudi bakulombe bua umonangane ne Maweja-Nangila Mvidi Mukulu wetu. Nanku netuitabe tshionsu tshiatuenzelaye, nansha tshiotshi tshitusankisha, nansha katshiyi tshitusankisha. Nanku netupete anu dikasa dimpe, bualu netutumikile Maweja-Nangila Mvidi Mukulu wetu.

⁷Kunyima kua matuku dikumi, Maweja-Nangila kuandamuna muambi Yirmeya.

⁸Yirmeya kubikidisha Yowanane, muana wa Kareya, ne balombodi bakuabu ba bena mvita bavuaye nabu, too ne bantu bonsu bavua muaba awu.

⁹Pashishe, kubambilaye ne: — Nuvua bandombe bua meme kuebeja Maweja-Nangila Mvidi Mukulu wa Izrayele. Diandamuna diende didi nenku:

¹⁰“Panuikala bapingana mu ditunga, nengasulule tshisamba tshienu. Tshiakutshibutula to. Nentshishindike tshiasa miji. Tshiakutshitula[281] to. Nanku, nennyingalale bua dikenga dimvua munutumine.

¹¹Kanutshinyi mpindiewu mukalenga wa bena Babilone. Meme Maweja-Nangila ndi nnuambila ne: kanutshinyi, bualu ndi nenu, bua kunusungidila, bua kumukandika, bua kankengeshi.

¹²Nennuambuluishe, mukalenga awu neanufuile luse, bua nupingane mu buloba buenu.”

¹³Yirmeya kuamba kabidi ne: — Bumue nuenu nudi mua kubenga kuitaba meyi a Maweja-Nangila Mvidi Mukulu wenu. Nudi mua kuamba ne: Katuena mua kuya kusomba mu ditunga dietu edi to.

¹⁴Tudi mua kuya kuasa mu Ejipitu mutudi katuyi mua kumona mvita, katuyi mua kumvua miyenga ya miadi, katuyi mua kufua nzala. Ke kutuaya kusomba.

¹⁵Nanku nuenu bantu ba ndekelu badi mu bukalenga bua Yuda, nuteleje bimpe tshidi Maweja-Nangila wamba. Maweja-Nangila wa bukole buonsu, Mvidi Mukulu wa Izrayele, udi unuambila ne: “Nuenu bajadike bua kuya mu Ejipitu, nuenu baye kusombamu,

¹⁶nenku mvita inudi nutshina bikole neyinulonde mu Ejipitu amu. Nzala inudi nuzakela, neyilonde too ne muaba awu. Nenufuileku.

¹⁷Bonsu badi bajadike bua kuya kusomba mu Ejipitu, nebafue ku mvita, ku tshiyole tshia nzala, nansha ku disama dia tshiambu. Muntu wa kudibu nansha umue. kakupanduka ku dikenga dingabatumina.”

¹⁸Yirmeya kuamba kabidi ne: — Maweja-Nangila wa bukole buonsu, Mvidi Mukulu wa Izrayele, udi wamba ne: “Mvua mufikile bena Izrayele munda bikole. Nuenu kabidi nennufikile munda panudi nuya mu Ejipitu. Diba edi nebanuteke tshilejilu tshia tshintu tshibi tshidi tshikuatshisha bantu bowa, tshienza bundu. Nuenu mene kanuakumona kabidi ditunga edi to.”

¹⁹Yirmeya kuamba kabidi ne: — Maweja-Nangila udi unukandika bua kanuyi mu Ejipitu, bualu nuenu nudi bantu ba ndekelu ba bena Yuda. Umvuayi bimpe bindi ngamba, nnujadikila lelu.

²⁰Panuvua bangambile bua kukonka Maweja-Nangila Mvidi Mukulu wenu, panuvua bandombe bua kumutendelela bualu buenu, nuvua nuamba ne: “Utumanyishe bimpe tshionsu tshidi Maweja-Nangila wetu mua kuamba, nentshienze.” Kadi tshikondu atshi nuvua balaye bualu ebu amu ku mishiku[282] patupu.

²¹Bualu lelu ndi munutuadile diandamuna dia kudi Mvidi Mukulu wetu. Kadi kanuena bateleje bualu nansha bumue budiye mungambile bua kunumanyisha.

²²Nanku numanye ne: nenufue mu mvita, ku tshiyole tshia nzala, nansha ku disama dia tshiambu, muaba mene unudi nujinga mua kusokomena awu!