Read Tshiluba Yirmeya 43 Bible Online

Yirmeya 43 - Tshiluba bible

Yirmeya 43

¹Yirmeya uvua muambile bantu bonsu malu aa avua Maweja-Nangila Mvidi Mukulu wabu mumanyishe.

²Ke Azarya, muana wa Oshaya, Yowanane, muana wa Kareya, ne bakuabu bonsu, kuandamuna Yirmeya ne dikamakama ne: — Udi ushima. Maweja-Nangila Mvidi Mukulu wetu kena mukuambile bua kutubela bua katuyi kusokoma mu Ejipitu to.

³Barake, muana wa Neriya, ke udi ukusonsola bua wewe kutuambila nanku. Barake mmusue bua batukuate kudi bena Babilone, batushipe, nansha baye netu kuabu mu bupika.

⁴Nanku, Yowanane, muana wa Kareya, balombodi bakuabu ba bena mvita ne bonsu bavuabu nabu, kubengabu kuteleja tshivua Maweja-Nangila mubambile, bua basombe mu ditunga dia Yuda.

⁵Pashishe, Yowanane, ne balombodi bakuabu ba bena mvita, kuangata bena Yuda bavua bashala mu ditunga diabu, ne bonsu bavuabu bapeta mu matunga avua nabu mutumba, bakavua bamane kupingana mu ditunga dia Yuda:

⁶ke balume, bakaji, bana, bana ba bakaji ba mukalenga, ne bantu bonsu bavua Nebuzaradane, mulombodi wa bena mvita balami mushile Ngedaliya, muana wa Akikame, muikulu wa Shafane. Bavua baye kabidi ne muambi Yirmeya ne Barake, muana wa Neriya.

⁷Bavua babenga kukumbaja bivua Maweja-Nangila muambe. Kuyabu mu Ejipitu, too ne mu Tapanese.[283]

⁸Mu Tapanese, Maweja-Nangila kuambila Yirmeya ne:

⁹— Angata mabue manene, wajike mu lutanda ludi ku mushiku wa mbelu[284] wa nzubu wa bukalenga udi mu Tapanese. Wenzananku bena Yuda batangile.

¹⁰Pashishe ubambile ne: “Maweja-Nangila wa bukole buonsu, Mvidi Mukulu wa Izrayele, udi wamba ne: Nentume bantu bua kunkebelabu muntu wanyi Nebukadnesare, mukalenga wa mu Babilone. Nenjadike nkuasa wende pa mutu pa mabue adibu bajike muaba ewu. Nease nzubu wende wa bukalenga anu muaba ewu.

¹¹Kadi pafikaye, neatshimune bena Ejipitu. Bantu bavule ne bafue. Banga nebaye mu bupika, bakuabu kabidi nebabashipe mu mvita.

¹²Neoshe[285] nzubu ya mvidie ya bena Ejipitu. Neoshe ne mpingu mene ya mvidie, nansha neaye nayi kuende. Neapawule ditunga dia Ejipitu, anu bu mudi mulami wa mikoku umusha nkusu yonsu mu tshilamba tshiende. Pashishe, neapingane kuende kakuyi udi mua kumuela diyi.

¹³Mu tshimenga tshia Eliyopolise[286] neupule makunji a mabue, neoshe nzubu ya mvidie ya bena Ejipitu.”