Read Tshiluba Yirmeya 44 Bible Online

Yirmeya 44 - Tshiluba bible

Yirmeya 44

¹Maweja-Nangila kuambila Yirmeya malu avuaye ne bua kumanyisha bena Yuda bonsu bavua baye kusokoma mu Ejipitu mu tshimenga tshia Migdole, tshia Tapanese, tshia Memfise, ne mu buloba bua Patrose.[287] Ke Yirmeya kubambila ne:

²— Maweja-Nangila wa bukole buonsu, Mvidi Mukulu wa Izrayele, udi wamba ne: “Nuvua bamone makenga onsu amvua mutumine bena Yerushalayime ne bimenga bikuabu bia Yuda. Bimenga ebi lelu mbimane kubutuka bishale makolu.

³Bualu bantu badi basombamu bavua bangenzele bibi, bamfikishe munda. Bavua baye kulambula ne kutendelela mvidie ya bantu ba bisamba bikuabu. Kadi mvidie ayi, nansha nuenu, nansha bankambua benu, kanuvua bayimanye to.

⁴Meme kunutumina bambi misangu ne misangu, bena mudimu banyi, bua nulekele kuenza malu mabi andi mubenge.

⁵Kadi kanuena banteleje, kanuena bangata mibelu yabu ne mushinga, kanuena balekele kuenza malu mabi, nansha kulambula milambu kudi mvidie ya bantu ba bisamba bikuabu.

⁶Nanku mvua mufike munda bikole, mvua ne kanyinganyinga. Ke mumvua mubutule bimenga bia Yuda ne misesu ya mu Yerushalayime. Ke mudi bimenga biandamuke makolu, bishale miaba idi ikuatshisha bantu bowa, bu munudi numona lelu.”

⁷Yirmeya kuamba ne: — Mpindiewu Maweja-Nangila wa bukole buonsu Mvidi Mukulu wa Izrayele udi unukonka ne: “Nuenu nudi basue kudienzela anu bibi bua tshinyi? Nudi basue kujimija tshisamba tshijima tshia bena Yuda, balume, bakaji, bansonga ne bana batekete mene, anyi? Nudi basue bua bena Yuda bonsu bafue anyi?

⁸Nudi nukeba kumfikisha munda ne malu enu mabi, ne milambu inudi nulambula mvidie ya bantu ba bisamba bikuabu mu ditunga dia Ejipitu, munuvua baye kusokoma. Nudi basue bua banubutule, banuteke tshilejilu tshibi tshia kutshipa natshi bantu, tshia kufuisha natshi bantu bundu ku mesu a bisamba bionsu bia pa buloba anyi?

⁹Nukadi bapue muoyi malu mabi onsu avua bankambua benu, bakalenga ne balombodi ba mu bukalenga mu Yuda,[288] nuenu mene, ne bakaji benu, benza mu ditunga dia Yuda ne mu misesu ya mu Yerushalayime anyi?

¹⁰Too ne mpindiewu, muntu nansha umue kena unyingalala bua bionsu abi. Muntu nansha umue kena muangate bumfumu buanyi ne mushinga. Kena muenze bimvua mulongeshe. Kena mulame mikenji imvua munupeshe nuenu ne bankambua benu.”

¹¹Yirmeya kujikija meyi ende, wamba ne: — Ke padi Maweja-Nangila wa bukole buonsu, Mvidi Mukulu wa Izrayele, wamba ne: “Ndi musue kunutumina makenga. Ndi musue kubutula tshisamba tshia Yuda tshionsu.

¹²‘Nengangate bena Yuda bavua bashale, baye kusokoma mu Ejipitu. Bonsu nebafue. Mu ditunga edi ke muafuilabu bonsu nansha ku mvita, nansha ku tshiyole tshia nzala. Muntu kakushala ne muoyi to. Eyowa, nebafue nanku. Bantu nebabateke tshilejilu tshia kutshipa natshi, tshia kukuatshisha natshi bowa, tshia kufuisha natshi bundu.

¹³Nennyoke bonsu badi basombe mu Ejipitu ne mvita, ne tshiyole tshia nzala, ne disama dia tshiambu, bu mumvua munyoke bena Yerushalayime.

¹⁴Munkatshi mua bena Yuda bavua bashale, baye kusokoma mu Ejipitu, muntu nansha umue kakunyema, kupingana mu ditunga dia Yuda to. Nansha bobu bikale ne dijinga dia kupingana kuabu, anu bena Yuda bakese nebapanduke,[289] bua bapingane mu ditunga diabu, basombemu.”

¹⁵Bantu balume bonsu, bavua bamanye muvua bakaji babu balambula mvidie ya bantu ba bisamba bikuabu milambu. Bakaji bonsu aba bavua tshisumbu tshinene bunguile muaba awu. Mu tshikosu ke bantu bavua base mu Ejipitu, ne mu Patrose.[290] Kuambilabu muambi Yirmeya ne:

¹⁶— Udi wamba ne: ndi nnuambila malu mu dina dia Maweja-Nangila. Kadi tudi tubenga kukuteleja.

¹⁷Netuenze anu tshitu-vua balaye. Netuambule Astarte, mvidie wetu, Mukalenga mukaji wa diulu, milambu ya manananshi ne ya maluvu a mvinyo. Ke mutuvua benza tuetu, ke muvua kabidi bankambua betu, bakalenga betu ne balombodi betu ba bukalenga benza mu bimenga bia Yuda ne mu misesu ya mu Yerushalayime. Nanku tuvua ne biakudia bungi bukumbane. Bionsu bivua bienda amu bimpe. Katuvua tukenga nansha.

¹⁸Kadi katshia tulekela kufila milambu eyi ya manananshi ne ya maluvu kudi mvidie Astarte, Mukalenga mukaji wa mu diulu, tukadi bapange bintu bionsu. Tudi bapungile ne mvita kabidi ne tshiyole tshia nzala.

¹⁹Ke bakaji kuamba ne: — Patudi tulambula Mukalenga mukaji wa mu diulu milambu, katuvua bumvuangana ne babayetu anyi? Badi bamanye bimpe ne: tudi bimuenzela mikata idi ileja mpala wende, tudi tumutuadila kabidi milambu ya maluvu.

²⁰Nanku, Yirmeya kuambila bantu bonsu, balume ne bakaji, bavua bamuandamuna nanku ne:

²¹— Mu bimenga bia Yuda ne mu misesu ya mu Yerushalayime nukavua balambule milambu eyi, nuenu, bankambua benu, bakalenga benu, balombodi benu ba mu bukalenga ne bana benu. Kadi binuvua benza ebi Mvidi Mukulu kavua mubimanye anyi? Nudi nuela meji ne: mmubipue muoyi anyi?

²²Nansha kakese! Maweja-Nangila kavua mua kuanyisha kabidi malu mabi enu. Ke pavuaye mubutule ditunga dienu, mudinyangakaje, bantu kabayi base kabidi mu ditunga edi. Dikadi dikuatshisha bowa. Dikadi bu tshilejilu tshia kutshipa natshi bantu. Nuenu bonsu nudi mua kujadika tshidiye wamba.

²³‘Lelu dikenga didi dinukuata edi, ndifike bualu nudi nulambula mvidie ya bantu ba bisamba bikuabu milambu. Nudi bena tshibawu. Kanuena bateleje tshivua Maweja-Nangila munuambile. Kanuena balonde tshivuaye munulongeshe. Kanuvua bangate mikenji ne mibelu yende ne mushinga.

²⁴Yirmeya kuambila kabidi bantu bonsu abu balume ne bakaji ne: — Nuenu bonsu bena Yuda badi basomba mu Ejipitu, telejayi tshidi Maweja-Nangila unuambila.

²⁵Maweja-Nangila wa bukole buonsu Mvidi Mukulu wa Izrayele, udi unuambila ne: “Nuenu mene, ne bakaji benu, nuvua nuamba ne: netukumbaje malaya atuvua balaye Mukalenga mukaji wamu diulu. Nuvua bambe ne: netulambule milambu ya manananshi ne ya maluvu. Nuenu benza nanku, mbimpe! Nukumbaje tshinuvua bambe. Enzayi tshinuvua balaye!

²⁶Kadi diba adi, nuteleje bimpe tshindi nnuambila. Meme Maweja-Nangila ndi nnuambila bualu. Ndi nditshipa mu dina dianyi dialumu ne: Muena Yuda nansha umue kena mua kuditshipa, utela dina dianyi mu ditunga dia Ejipitu nansha. Kena mua kuamba kabidi ne: ‘Bu mudi Maweja-Nangila Mvidi Mukulu ne muoyi…’

²⁷Nennutumine dikenga. Tshiena nnutumina kabidi disanka to. Bena Yuda badi basombe kabidi mu Ejipitu nebafue bonsu, too ne wa ndekelu, ku mvita nansha ku tshiyole tshia nzala.

²⁸Anu bantu bakese nebashale ne muoyi, nebanyeme ku mvita ya mu Ejipitu, nebapingane mu ditunga dia Yuda. Nanku bena Yuda bikale bashale ne muoyi nebajingulule ne: muaku udi ukumbana nnguanyi meme anyi, peshi nguenu nuenu?

²⁹Nennunyoke anu muaba ewu. Ndi nnuleja tshimanyinu. Nenku nenumanye mundi nkumbaja bimvua munumanyishe. Tshimanyinu mene ngetshi:

³⁰Nemfile Ofra, mukalenga wa bena Ejipitu mu bianza bia baluishi bende, badi bakeba kumushipa, anu mumvua mufile Sedekiya, mukalenga wa bena Yuda, kudi muluishi wende Nebukadnesare, mukalenga wa mu Babilone.[291] Meme Maweja-Nangila ndi ngamba nanku.”