Read Tshiluba Yirmeya 46 Bible Online

Yirmeya 46 - Tshiluba bible

Yirmeya 46

¹Maweja-Nangila udi wambila muambi Yirmeya malu adi atangila bisamba bikuabu.[293]

²Umvuayi malu avua Mvidi Mukulu mumanyishe bua Ejipitu, ne tshiluilu tshia Neko, mukalenga wa bena Ejipitu. Neko uvua mu Karkemishe, ku muelelu wa musulu wa Perate, pavua Nebukadnesare, mukalenga wa Babilone mumutshimune. Bivua bienzeka tshidimu tshinayi tshivua Yoyakime, muana wa Yoshiya, mu bukalenga bua Yuda.[294]

³Balombodi ba bena mvita ba bena Ejipitu badi bela mbila ne: “Longololayi ngabu, minene ne mikese. Tuyayi ku mvita.

⁴Suikayi nyama ya tubalu ku matempu. Bandayi pa nyama ya tubalu! Asayi tshifulu tshia mvita. Buelayi mu milongu! Nonayi mafuma enu, vualayi kazaku ka tshiamu.”

⁵Kadi Maweja-Nangila udi webeja ne: Bidi bienzeka mbinganyi? Tshindi mmona ntshinyi? Badi bumuka muaba udibu bimane, basemena panyima. Nansha bobu bilobu, badi babatshimuna! Bonsu badi banyema lubilu eku ne eku. Kabena batangila kunyima. Bowa budi butampakana miaba yonsu![295]

⁶Nansha bena lubilu kabena mua kupanda. Nansha bilobu kabiena mua kupanduka. Kuaka ku mutu kua ditunga, ku muelelu wa musulu wa Perate, badi batetuka, badishinda panshi.

⁷Udi wenda uya kumpala bu musulu wa Nile udi uwula, upasalala ne muenji mukole, nganyi mene awu?

⁸Ke Ejipitu! Uvua wamba ne: “Bu mudi musulu wa Nile upasalala ne muenji mukole, meme kabidi nempasalale nguwuje buloba bujima. Ndi nnyanga bimenga, ne bantu bavua basombemu.

⁹Nyama ya tubalu, tuyayi. Matempu a mvita, nyemayi lubilu! Nuenu bena Kushe, bilobu bia mvita. Nuenu bena Pute, bambudi ba ngabu mikese. Nuenu bena Lude, bedi ba mikete,[296] nyemayi tumone! Pitayi kumpala tumone!”

¹⁰Edi ke dituku didi Maweja-Nangila, Mvidi Mukulu wa bukole buonsu, utekemena. Ke dituku didiye usombuela bena lukuna bende! Muele wende udi bu nyama wa tshidika, udi ukuata bantu, udia uukuta! Udi unua mashi abu ukuatshika! Maweja-Nangila Mvidi Mukulu wa bukole buonsu udi ubutula bantu badi mu ditunga dia ku mutu, ku muelelu wa musulu wa Perate!

¹¹Wewe Ejipitu muena dikenga, banda too ne ku Ngilaade, ukeba buanga bua kudiondapa. Kadi udi ukeba manga, uditatshisha amu tshianana. Mputa yebe kayena mua kuuma nansha kakese.

¹²Bantu ba mu matunga makuabu mbumvue lumu lua makenga avuabu bakukengesha nawu. Miaba yonsu bavua bumvua miadi yebe! Tshilobu tshidi tshituuta kudi tshikuabu. Bonsu babidi badi batetuka, badishinda panshi.

¹³Musangu uvua Nebukadnesare, mukalenga wa Babilone, mufike bua kuluisha[297] bena Ejipitu, Maweja-Nangila uvua muambile muambi Yirmeya ne:

¹⁴Manyisha bena Ejipitu, benamu Migdole, bena mu Memfise, ne bena mu Tapanese ne[298]: “Elayi mualu wa mvita! Angatayi bia mvita mu bianza!” Bualu mvita ikadi yenda ibutula bena mutumba nenu!

¹⁵Kadi bidi bienzeka mbinganyi? Bilobu biebe bidi panshi,[299] Maweja-Nangila mmubole panshi kabayi batua nkanana!

¹⁶Maweja-Nangila udi ushinda[300] bena mvitaba bungi. Bakadi bambilangane ne: “Tupinganayi mu buetu buloba. Tunyemayi mvita, mmikole.”

¹⁷Kadi mukalenga wa bena Ejipitu, bamubikile ne: “Muena kabuabua![301]”

¹⁸— Mukalenga udibu babikila ne: “Maweja-Nangila wa bukole buonsu”, udi wamba uditshipa ne: Bu mundi ne muoyi bulelela, bu mudi mukuna wa Tabore munkatshi mua mikuna mikuabu, bu mudi mukuna wa Karmele mupite mayi manene bule. muluishi neafike[302] munkatshi muenu ne bukole bupite.

¹⁹Bena Ejipitu, suikayi bintu bienu. Nukadi pa kuya mu ditunga dia bende mu bupika! Bualu tshimenga tshia Memfise netshikale tshipela tshidi tshienza bowa, muaba udi bantu kabayi mua kuasa.

²⁰Ejipitu udi bu ngombe mulengele. Kadi dingulungu didi difuma ku mutu[303] wa ditunga didi difika bua kumusuma.

²¹Nansha bena mvita bavua bena Ejipitu basumbe, badisha bimpe bu tuana tua ngombe, bonsu kuela nyima, kunyema lubilu. Muntu nansha umue kena utua nkanana, pandi mfika bua kubabutula, pandi musue kubanyoka.

²²Bena mvita ba bena Ejipitu badi banyema, bela tshiona tshikese bu tshia nyoka, padi baluishi bafika basempela, mudi bakoshi ba mitshi benza mudimu ne bisuyi.

²³Baluishi badi babakosa bu mitshi ya mu ditu dikole. Badi bafika bapite bungi bu mikongolu ya mpasu ya mukumbi.

²⁴Ejipitu udi ne bundu, bualu udi mushale mu bianza bia bantu, badi bafume mu ditunga dia ku mutu.

²⁵Maweja-Nangila wa bukole buonsu Mvidi Mukulu wa Izrayele udi wamba ne: “Nennyoke Amone, mvidie wa mu Tebe,[304] nennyoke Ejipitu ne mvidie yende ne bakalenga bende. Nennyoke mukalenga wa bena Ejipitu ne bena diende.

²⁶Nembafile kudi bantu badi bajinga kubashipa, mmomumue ne kudi Nebukadnesare, mukalenga wa mu Babilone, ne bena mvita bende. “Kadi kunyima kua bidimu, bantu nebasombe tshiakabidi mu Ejipitu, bu muvuabu basombe kale.” Ke mudi Maweja-Nangila wamba.

²⁷Wewe Izrayele, muena mudimu wanyi, kutshinyi nansha. Kutekeshi mu maboku to. Nuenu ndelanganyi ya Yakobe, ndi mvua kunusungidila mu matunga a kule. Ndi mvua kupikula bana benu mu ditunga didibu baya nabu mu bupika. wewe Izrayele neupete kabidi ditalala ne bupole. Muntu nansha umue kakukuenzela kabidi bibi to.

²⁸Maweja-Nangila udi wamba ne: Wewe Izrayele muena mudimu wanyi, kuikadi ne bowa to. Bualu ndi nebe. Nembutule bisamba bionsu, miaba yonsu imvua munutangalaje. Kadi tshiakukubutula wewe to. Bushuwa mvua anu ne bua kukunyoka, bualu tshiena mua kukutangila bu muntu udi kayi muena tshibawu!