Read Tshiluba Yirmeya 48 Bible Online

Yirmeya 48 - Tshiluba bible

Yirmeya 48

¹Maweja-Nangila wabukole buonsu, Mvidi Mukulu wa Izrayele udi umanyisha mukenji udi utangila bena Mowabe, wamba ne: Bena Nebo nebakenge! Tshimenga tshiabu netshinyanguke! Bena Kiriyatayime[309] nebafue bundu. Nebakuate tshimenga tshiabu. Bena Mowabe nebafue bundu, kabakuikala ne bukole kabidi!

²Butumbi bua Mowabe buajiki. Mbelele tshimenga tshia Eshebone[310] tshifufu tshibi bamba ne: “Tuyayi kubutula tshimenga etshi. Katshikadi kabidi ne muaba munkatshi mua bisamba bikuabu!” Wewe kabidi tshimenga tshia Madmene neubutuke. Bena mvita nebafike bua kukuluisha.

³Bena mu tshimenga tshia Oronayime nebalombe diambuluisha, bela miyenga ne: “Badi batubutula! Badi banyanga bantu!”

⁴Mowabe mmubutuke! Muadi wende udi umvuika too ne ku Soware.[311]

⁵Bantu badi bashale ne muoyi nebabande ku mukuna wa Lukite, badila. Badi bapueka ku tshimenga tshia Oronayime, nebele mbila ya dikenga[312] ne:

⁶“Nyemayi muaba ewu bua kanufu to! Nushale mu tshipela bu nyama wa mpunde wa mu tshipela.[313]”

⁷Mowabe, wewe udi udimona ne bukole, ne bintu bia bungi. Kadi nebakukuate wewe kabidi! Kemoshe, mvidie webe, neaye mu ditunga dia bende mu bupika, kabidi ne batuangaji bebe, ne balombodi ba mu bukalenga buebe.

⁸Muena tshinyangu neapitshile ku tshimenga ne ku tshimenga, bua kubinyangakaja bionsu. Nansha bidi mu tshibandabanda, nansha bidi mu mpata nebinyanguke. Ke mudi Maweja-Nangila muambe nanku.

⁹Longololayi lukita lua Mowabe. Bualu neabutuke kamuyi mpata.[314] Bimenga biende nebinyanguke. Nebishale kabiyi ne bantu.

¹⁰Maweja-Nangila atshipe bantu, badi benza mudimu wende ne lulengu, babenga bua muele wende kaushipi bantu.

¹¹Bituadije ku buana buende, Mowabe kavua ne dikenga nansha. Kabavua banji kuya nende mu bupika. Uvua musombe ku matshi talalaa, mudi maluvu a mvinyo mashale mu mulondu, bisekaseka bimane kupueka panshi. Kabavua banji kupongolola mu mulondu mukuabu. Maluvu awu avua amu ne muenyi wawu.

¹²Ke padi Maweja-Nangila wamba ne: dituku dikuabu nentumine Mowabe bantu bua bamupongolole. Nebapumune maluvu onsu adi mu milondu. Nebashipe milondu.

¹³Nebafuishe Mowabe bundu kudi mvidie wende Kemoshe, muvuabu bafuishe bena bukalenga bua bena Izrayele bundu kudi mvidie wabu wa ku Betele uvuabu batekemena bikole.

¹⁴Nuenu bena Mowabe, mmunyi munudi mua kuamba ne: “Tudi bilobu, tudi bantu badi bamanye mvita?”

¹⁵Bantu badi ne bua kubutula[315] ditunga dienu dia Mowabe bakadi bafike bua kuluisha bimenga bionsu. Bansongalume benu balenga nebaye kupetangana nabu bua kubashipa. Ke tshidi mukalenga munene, udi dina ne: Maweja-Nangila wa bukole buonsu wamba.

¹⁶Nuenu bena Mowabe kabutu kadi pabuipi, dikenga nedinukuate lukasa.

¹⁷Nuenu bonsu bena mutumba ne Mowabe badi bamumanye bimpe, muelayi muoyi wenu wa dibungama. Nudile ne: “Eyi mbabutule bukalenga buenu ne bukole buabu! Lumu luabu ndujimine!”

¹⁸Bena Dibone, nutuluke mu nkuasa wenu wa lumu, nusombe mu lupuishi.[316] Bualu baluishi bavua babutula Mowabe badi bafika bua kunuluisha nuenu. Badi bashimbula nzubu yenu inuvua bakoleshe ne bimana.

¹⁹Nuenu badi basombe mu Aroyere, nuimane ku muelelu wa njila nutentekele. Nukonke bantu badi banyema, badi bapanduka mu mvita ne: mvita mmipite munyi?

²⁰Nebanuandamune ne: — Bena Mowabe mbafue bundu! Mbabutuke! Elayi mbila, elayi mikunda, ambilayi badi basombe ku mielelu ya musulu wa Amone[317] ne: Mbabutule Mowabe.

²¹Maweja-Nangila udi ukosa nsambu, unyoka ditunga didi mu mpata, ne tshimenga tshia Olone, tshia Yakase, tshia Mefaate,

²²tshia Dibone, tshia Nebo, tshia Bete-Diblatayime,

²³tshia Kiriyatayime, tshia Bete-Ngamule, tshia Bete-Meyone,

²⁴tshia Keriyote ne tshia Bosra. Dinyoka didi dikuata bimenga bikuabu bionsu bia mu ditunga dia bena Mowabe, bidi kule ne bidi pabuipi.

²⁵Maweja-Nangila udi wamba ne: bukole bua bena Mowabe mbujike, bumfumu buabu mbumane kunyanguka.

²⁶Bena Mowabe mbatombokele Maweja-Nangila. Nembanuishe maluvu[318] bua bakuatshike, baluke, badishinde mu bilushi, bantu bonsu kubaseka.

²⁷Bena Mowabe, mwuluke munuvua nuseka bena Izrayele, munuvua nukupa mutu, nubaseka bu bantu badibu bajikila biba bintu.

²⁸Umukayi mu bimenga bienu, nuenu bena Mowabe. Nuase mu mbuebue nuidikije nyunyi ya nkutshi, idi yenza masua ayi ku mushiku wa lubuebue.

²⁹Tuvua bumvue muvua bena Mowabe baditambisha, badisua bikole, bapepeja bantu bakuabu, baleja dikamakama, baditemba, baditeka ku mutu kua bantu bakuabu.[319]

³⁰Maweja-Nangila udi wamba ne: “Meme kabidi ndi mubamanye. Badi bela nseke, baditambisha, kadi malu adibu benza kaena ne mushinga.”

³¹Nanku pandi mvuluka bena Mowabe, ndi ndila muadi, nsengelela bantu bua bambuluishe bena Mowabe bonsu aba. Ndi ngela mbila, ndila bantu ba mu Kire-Erese.[320]

³²Ndi nkudila, wewe udi bu budimi bua mvinyo bua mu Sibma, bipite mundi ndila bantu ba mu Yazere.[321] Wewe Sibma uvua molole mionji yebe, ivua mifike too ne ku Yazere, dishiya dia Mayi manene a luepu. Kadi baluishi bavua bakubutula, mu tshikondu tshivuabu bapole, bakama tumuma tua mvinyo.

³³Mu madimi a mvinyo a bena Mowabe, kamuena kabidi disanka, kamuena kabidi musangelu. Kamuena maluvu a mvinyo adi mashale mu milondu. Kamuena kabidi bantu badi mua kukama tumuma[322] tua mvinyo. Bantu kabena bumvua kabidi mbila yabu ya disanka, kadi amu dikenga.

³⁴Bena Eshebone badi balomba diambuluisha. Bantu badi bumvua mbila yabu too ne ku Elale. Badi bumvua diyi diabu too ne ku Yakase, kabidi biangatshile ku Soware too ne ku Oronayime ne ku Eglate-Selishiya. Bualu nansha mpokolu wa ku Nimrime[323] ukadi muume.

³⁵Maweja-Nangila udi wamba ne: “Nembutule bena Mowabe badi baye muaba wa kutendelela, bua kulambula mvidie yabu milambu.”

³⁶Ke pandi ndila bena Mowabe ne bena Kire-Erese, mudi muntu wimba kasala ka madilu ne lushiba, bualu bionsu bivuabu nabi mbijimine.

³⁷Bantu balume bonsu neakungule nsuki, babeya miedi yabu. Bavua batapa nsalu ku bianza biabu bienza mputa, bavuale bilamba bia lufuila.

³⁸Kulu kua nzubu ne miaba yonsu idi bantu basangila, mu Mowabe, badi bumvua amu miyenga. Maweja-Nangila udi wamba ne: — Ndi mubutule ditunga dia Mowabe, mudibu bashipa luesu ludi kaluyi ne mudimu. —

³⁹Nudile muadi ne: “Mowabe mmubutuke! Mmumvue bundu, bualu mmunyeme mvita!” Bena mutumba ba bena Mowabe, badi babaseka, babatshina.

⁴⁰Maweja-Nangila udi wamba ne: “Baluishi badi bajemba padi bena Mowabe, mudi nyunyi ya mikanku ijemba mulu.”

⁴¹Nebakuate bimenga, nebabuele mu nzubu mikolesha ne bimana. Bilobu bia mvita bia bena Mowabe, bidi ne dikenga bu dia mukaji pa lulelu.

⁴²Ditunga dia Mowabe ndibutuke. Tshisamba tshia bena Mowabe katshienaku kabidi to. Bualu tshivua tshitombokela Maweja-Nangila.

⁴³Maweja-Nangila udi wamba ne: “Bowa, dijimba ne bukondu bidi bimuindile!

⁴⁴Muntu udi unyema mvita, bua bowa, neadishinde mu dijimba. Udi upatuka mu dijimba, nebamukuate mu bukondu. Ke dikenga[324] dindi mulongoluele ditunga dia Mowabe, pangafika bua kudinyoka.

⁴⁵Badi banyema mvita mbapungile. Badi bakeba muaba wa kuikisha mu tshimenga tshia Eshebone, tshivuabu balombole kale kudi mukalenga wa Sikone.[325] Kadi kapia kavua kuosha ditunga dijima dia bilobu ebi, ku mikalu too ne munda mua ditunga.

⁴⁶Nuenu bena Mowabe, nudi bena diakabi. Nuenu bavua batendelela mvidie wa Kemoshe, nudi nufua. Bana benu ba balume ne ba bakaji badi babakuata mu lukanu, baye nabu.

⁴⁷“Kadi dituku dikuabu, ditunga dia Mowabe nedipete kabidi diakalenga kundi. “Meme Maweja-Nangila ndi njadika bualu ebu.” Ke muvua Maweja-Nangila mukose tshilumbu tshia bena Mowabe nanku.